الخميس، أغسطس 03، 2006

في انتظار السي تي إيه!!

حسه بحالة قهر.. حالة بهدلة نزلت على حياتي.. الضحك اللى م القلب فارقني.. ولو ان الضحكاية اللي بتترسم على الوش لساها محطوطة.
اهي محطوطة والسلام!!

كل يوم اصحى عشان البس والحق انزل استنى السي تي ايه اللى مش بييجي بسأل نفسي مليون مرة انا كان ايه اللى دخلني قسم صحافة؟؟
ولحد انهاردة منيش عارفة ايه اللى خبطني في نافوخي وخلاني ادخل القسم ده.. ماله علاقات عامة.. عالم بتذاكر وتنجح ولما تخلص الف شركة يبقو عايزينهم.. ولو حتى ملقوش شغل اهو على الأقل مبيبقوش مقهورين على موضوع اتكتب ولا اتنشرش ولا فكرة اتسرقت ولا مصدر مش عارفين يوصلوله..
ولو اني احيانا تانية من كتر خبطة الشمس في نافوخي وانا مستنيه السي تي ايه برضه بتهطل عليا الفكرة العظيمة الموروثة من تقاليدنا "اتجوز واقعد في البيت" ولان نسبة العنوسة في مصر زادت فمبقتش مشكلة " اقعد في البيت بدون جواز مش ازمة"

ساعات تانية تهل على بالي الفكرة الجريئة وياخدني التحدي والبطولة "لا طبعا اقعد في البيت يعني ايه.. ايه يعني الواحد يتبهدل شوية فى اول حياته .. مهو لو متبهدلتش وانا 19 ولا 20 سنة امال هتبهدل وانا عندي 50؟ ساعتها هكون عندي سويت جاهز في مستشفى"

اما الفكرة اليائسة البائسة واللى بتوجعلي مخي من كتر ما هموت عليها او منها –مش فارقة- فهي اني هموت واجيب عربية.. وللامانة شغلة الصحافة دي متنفعش بدون عربية.. او حتى اجيب توك توك* ولو ان حتى ده رغم انه –عره طبعا- لكنه بـ 12 الف جنيه.. ومع ذلك مش أزمة ان شالله سكوتر.. أي بتاع يرحمني من وقفة السي تي ايه اللى مبيجيش ده!

آخر الافكار اللي جاتلي في التشميسة اللى باخدها اغلب ايام حياتي هي فكرة متفائله زيادة عن اللزوم "ياسلام لو واحد ينسى جمبي مليون جنيه في شنطة ويمشي.. وانا اخد الشنطة بقى.. اجيب عربية اول حاجة طبعا!!
ولما قلت الفكرة دي لاقرب حد ليا.. ركبتني ساعتها الروح الشريرة وقلتله عربية وفيلا وهسيب بيتي اللى عايشة فيه واروح اسكن هناك.. وساعتها مش هعرفك طبعا !!

انتهت كل الافكار في بصة شريرة بصهالي اخينا.. انما لازالت فكرة العربية تراودني احيانا وانا نايمه.. هموت على
عربية ياعالم.. هموت من البهدلة بجد!
------------------------------------------------------------
* التوك توك لمن لا يعرف هو عبارة عن موتوسكل وبيركبله من ورا صندوق فيه كنبتين عشان الناس تركب قدام بعض .. والسواق بيسحبهم من ع الموتوسكل والنفر بجنيه

هناك 13 تعليقًا:

محمود عزت يقول...

فكرتيني بنفسي
يارب ولو قردة حتي الشهيرة بزاستافا
يلا
ربنا يموت لنا كل قرايبنا المليونيرات اللي في المكسيك

mai يقول...

هههههههههههههههههههههههههههههههه

ضحكتني قوي يا محمود.. بجد تحفة

أحمــــــــدبــــــــــلال يقول...

فكرتينى لما كنت بنزل علشان أجيب أخبار يالهوى كنت بتبهدل على بال ما ألاقى حاجة عليها القيمة
على فكرة أنا مش أحمد بلال اللى فى الدستور

أنا واحد تانى بس صحافة برضه
كنت بكتب فى صحف حزبية و مستقلة بالهبل و أخرها جريدة تسمى نبض الأمة بس لسه مانزليش فيها شغل

أنتى منين ؟ أسكندرية ؟

...دنيتي يقول...

انا كمان نفسي اترحم من المواصلات
بس منصحكيش باعربية
اصل البنزين هيفضل يغلى كدة
عشان نوفر لأسرائيل بترول عشان الحرب
ولولا اني عارفة اني محدش هيسبني في حالي لو جبت عجلة كنت جبت
اهي موفرة ورياضة للجسم
بس الشباب المصري الأهبل مش هيسيبوا اي بنت تركب عجلة ف حالها
بوست جميل ودمه خفيف

...دنيتي يقول...

ما تيجي نجيب عجلة ;)

Amr Fahmy يقول...

هي فكرة القعاد في البيت بقت خيار مطروح اوي بين البنات اليومين دول مع انهم مكاونش كدة في الاول، الكارثة ان دي مش خيار عندنا اساسا

mai يقول...

لا يا احمد انا مش من اسكندرية -للاسف- .. عامة نورتنا يا فندم


دنيتي ياريت كنت اعرف اسوق عجلة كنت مسبتهاش ولبس خوذه عشان محدش يعرف انا ولد ولا بنت وانطلقت بس للاسف مش بعرف حاولت كتير اتعلم ولا فيش فايدة..


ولله يا عمرو انتو بالذات ملكوش الخيار ده انا لو منك اجرب الطماطم ههههههههههههههههههههههههههههه

Hassan.Moe يقول...

موضوع حلو
بس خاللي بالك من البنزين واسعاره يعني المليون حاتجيبي العربية بيها وحاتفولي بالباقي هههههههه

Sampateek يقول...

ارزقنا يا رب
تعالوا شاركوني الحلم بان يكون لنا موقف

BackBone يقول...

واضح ان مهنت الصحافه صعبه قوي كده. بس و لا يهمك انت مشكلتك سهله يابنتي, اهوه في الاخر هتتجوزي و حد و ابقي سعتها اشطرطي ان يكون عنده عربيه. بس الغلابه الولاد بقه همه اللي المفروض يجيبو العربيه ديه منين

أُكتب بالرصاص يقول...

ولا تزعلي نفسك


الرزاق هو الله

بقول لك ايه ...

الظاهر ان في شنطة وقعت مني جنبك ...

ماشوفتيهاش ؟؟؟

قلم جاف يقول...

نصيحة أخوية جداً:

حاولي تتمرني كويس جداً على مسائل الأخبار لأن في صحف مستقلة كتيرة بحسب معارف بيبقى الحساب بالقطعة ع الخبر .. دة لو كنتي زي ناس كتيرة وأنا منهم من عديمي الوسايط .. أما لو كنتي مسنودة فاتكلي على الله واتمرني في جرنال كبير زي الأخبار والأهرام والجمهورية .. بس تاخدي بالك من الضغط ليعلى أكثر من اللازم ..

الجواز قسمة ونصيب واللي يحطه كهدف دماغه حتطق وحتنفجر.. اتأخر تحقيق هدف فكري في الهدف الأقرب .. العمللللللل!

mai يقول...

منكم نستفيد يا "قلم جاف"
:)))))))