الثلاثاء، أغسطس 22، 2006

معاهدة صلح


ممكن نتصالح يابنتي؟؟
ولله انا ماكنت عارفة اننا متخانقين سوا بس الظاهر ان حد فينا مخنوق م التاني وعشان كدة انا وانتي تعبانين.. مهو مش طبيعي نزعل من بعض كتير
ده حتى الخصام اكتر من 3 ايام مش مستحب يعني
وبعدين مهو اصلك بتستهبلي بصراحة.. تزعلي شوية وتضايقيني شوية بعدين ترجعي كويسة.. طب اجيب طاقة منين احتملك!!
بصي.. انا اللى اعرفه اننا لو عايزين نتصالح بجد يبقى منتناقش فى سبب خناقتنا ونتعهد لبعض بالسلام وخلاص.

بصي ازاي انا بادية بالسلام وانتي ولا معبراني.. طب اعملك ايه بالذمة؟؟
من سنة واحدة مكانتش حاجة شاغلة بالي.. ولا كنت عايزة اكتر من قعدة صحاب حلوة وضحكة تملا الجو.. مكنتش عايزة اكتر من كتاب حلو اقراه استمتع بيه .. مش اكتر من فيلم يغير مودي ويحسسني ان فيه امل فى الحياة.. انهاردة حاجات كتير اتغيرت وانا اتغيرت وياها.. انهاردة بنتخانق كتير فوق العادة
عارفة اني السبب وعارفة ان طلباتي كترت وتشعبت.. عارفة انى بقيت لحوحة وملولة.. بقيت خنيقة كمان.. بقى خلقي ضيق ومبقتش بستحمل زي زمان.. بس مهو برضه الانسان طاقة يعني!!
وبعدين لو انتي مستحملتنيش طب مين يعني؟؟؟

بصي يا ستي انا شايفة حل واحد.. اننا نتصالح حتى وانا مش عجباكي.. مهو اصلك انتي كمان يعني مش الفظيعة مانتي كمان مش عجباني خالص تك نيلة اصلا!
شفتي اديني غلطت فيكي.. يا ستي حقك عليا
هما بيقولو ان الحل اننا نتصالح وانا مضطرة اصدقهم لان مفيش امل ولا سكة تانية غير دي مع ان صدقيني مكنتش اعرف اننا متخانقين اصلا
تعالى بقى للمهم..
كل اللى قالولى نتصالح سوا انا وانتي مقالوليش الطريقة
ازاي اتصالح مع نفسي؟؟؟؟

هناك 9 تعليقات:

Dr. Tantawy يقول...

تحبي اكلمهالك يا مي ؟ قوليلي مين هيه بس و انا اصالحكم على بعض .. ايه رأيك

محمد أبو زيد يقول...

وعايزنل نرجع زي زمان
قول للزمان ارجع يا زمان

Ahmoss يقول...

فكرتيني بالست أم كلثوم وهي بتقول
غلبت أصالح في روحي عشان ما ترضى عليك

mai يقول...

ولله يا احمس كوني افكرك بالست فده جميل بس بدون تريأة انا عمري ما سمعت الاغنية دي.. مش لان الاغنية مش مشهورة بس مبستحملش اسمع الست !!

انت منور وده المهم

Sampateek يقول...

بوست جميل يا مي كله روح و صدق
انت جميلة
بس الغريب ان انسانة بالمشاعر دي متحبش تسمع الست
يا ربــــــــــــــي
انا بموت في ام كلثوم
جربي تسمعيها
دي سومة هي الحب
خالص تحياتي

mai يقول...

المشكلة ان ام كلثوم فعلا محتاجة تفضيلها وقت.. مببتسمعش في تلات دقايق يعني!!
:)))

قلم جاف يقول...

الأمر عندك أسهل بكتييييييير من عندي ..

علشان أصالحني حنحتاج أنا وأنا لحوارات وجلسات استماع مطولة .. وحنتخانق أنا وأنا وحتبقى مشاكل.. وطبعاً مش حنلاقي مكان محايد نتكلم فيه .. وحتبقى المسائل بنظام الذهاب والعودة..

أحياناً بأبص لحاجات كتيرة بعملها برة السايبر سبيس ، وبألعن غبائي فيها وسذاجتي وعفويتي .. في أحيان كتيرة بأقول لنفسي إن فيه حل آخر ، فيه اختيار ماخترتهوش صح .. فيه تصرف أحسن .. مع إن أنا نفسي اللي متخذ القرارات دي..

سيجموند فرويد قال : كلنا هيستيريون بدرجات متفاوتة .. تفتكروا كلنا فصاميين بدرجات متفاوتة؟

mai يقول...

افتكر جدا.. قلم جاف تحياتي لقلمك يا فندم ومنور بجد

shrioo يقول...

سؤال صعب جدا زى الالغازومحتاج فيلسوف علشان يحله ,بوست جميل بجد