الجمعة، سبتمبر 15، 2006

بنت موديل؟؟.. كان زمان وجبر!

زمان كان فيه موديل .. ده كان قبل ما الإخوان المسلمين يعملوا مظاهرات ويتم إلغاء الموديل .. طب إيه الموديل؟؟
الموديل هي البنت اللي كانت زمان -بقى- بتقلع ويرسموها الطلبة وهي نفسها اللي كانت بتقف قدام الرسام بالساعة والساعتين عشان يرسمها والموديل برضه الراجل اللي كان بيقعد قدام شادية في فيلم " كرامة زوجتي " .. طب إيه الحكمة من كدة؟؟ ببساطة .. لازم طلبة تربية فنية وفنون جميلة يتعلموا رسم الجسم البشري.

طب ودلوقتي ؟؟؟
دلوقتي بقى الموضوع بقى حاجة تانية خالص

بمبنى مكون من عدة طوابق تعلوه لافتة "كلية تربية فنية" رحت ابحث عن سيدة مسنة وجدتها تمسك بمقشة وتقوم بتنظيف الأرضية .. وكانت الدادا –عاملة النظافة-هي بطلة بحثي .. وبعد السلامات والتحيات وأنا مين واصلي إيه بدأت أستفسر منها عن طلاب كلية فنون جميلة والذين يقومون برسم الأشخاص فيما يسمى بالبورتريه ..
وهنا سألتها :
- عمرك أترسمتي يا أم محمد؟
- طبعا يابنتي أنا بساعد الطلبة هما بيقولولى اقعدي كدة وأنا أروح قاعدة زي ما هما عايزين وأفضل ثابتة مبتحركش عشان مبوظلهمش اللوحة يا حبة عيني .. ولما اتعب من التثبيت ده أقولهم فيدوني ريست وارجع تاني ..
- و عرفتي منين يا حجة كلمة الريست دي ..
- بضحكة ممتلئة بالشقاء والتعب .. من كتر قعادي معاهم يابنتي ..
- طب قوليلي يا حجة مبتاخديش أي مقابل قدام تثبيتك ده؟
- والله على حسب .. ساعات يدوني تلاتة جنية أو خمساية أو عشراية لو تعبت معاهم قوي وبين الخمسة والعشرة فيه أرقام تانية بتدفع بس عمرها ما زادت عن كدة .. وفيه ناس تانية بيدفعولي جنية واسكت .. واخدة بالك أنتي .. بسكت لما باخد جنية !!
الحقيقة عملت عبده العبيط وعملت نفسي مخدتش بالي ..

وبعيدا عن هذا الطابق وجدت طالب يرسم بورتريه لأحد الأشخاص الذي يجلس أمامه وكان شكله ابن ناس قوى .. وأخيرا قلت هو ده .. وبكل سرعة انطلقت لأستأذن الرسام ممكن تدي الموديل بتاعك ريست الأول عشان اعرف أتكلم معاه ؟ وبالفعل سمح للأستاذ اللي كان متحنط قدامه انه يفك نفسه ويكلمني .. وبدأت أسئلتي تنزل عليه بفرحة شديدة لأني أخيرا وجدت موديل
و بدأت اسأله .. أنت خريج إيه؟ وبتاخد كام في الساعة؟ وإيه اللي بتعمله بالضبط؟ هل شغلتك فقط انك تكون موديل ؟
في اندهاشه الشديد توقفت عن الأسئلة لأرى سبب ذلك الاندهاش .. وجاءت إجاباته تخفي في طياتها ضحك لم اعرف سببه
قال : "أنا مباخدش ولا مليم من اللي بيرسمني ده .. أصل الدنيا يوم ليك ويوم عليك ولو خدت منه فلوس النهاردة طب هرجعهاله ازاي بكرة لما أجي ارسمه" .. ثم نياهاها نياهاهاها
وفى دهشة شديدة سألته : هو أنت هترسمه بكرة؟
بعد انتهاء انفجاره في الضحك واستفزازي الشديد أخيرا استطاع تماسك نفسه عشان يقدر يتكلم: "أنا طالب زيي زي اللي قدامك ده وهو بيرسمني النهاردة وأنا هرسمه بكرة وهكذا .. هنا في الكلية مفيش خالص موديل بيترسم وملناش غير أربع طرق بس عشان نرسم بورترية
يا إما نرسم بعض زي مانتي شايفه كدة ونحقق اكتفاء ذاتي –وانفجر في الضحك مرة أخرى وكأنه يتلذذ باستفزازي- أو نقوم أحيانا برسم الدادات لو لزم الأمر .. وساعات كانوا بينزلونا الشارع و أي حد معدي نثبته ونرسمه ده إذا وافق أصلا انه يثبت شوية لحد ما أحط ملامح وشه .. أو بقى لما يحن علينا الدكتور ويجيبلنا واحد منعرفش بيجيبه منين ويقعده قدامنا وكلنا نرسمه ودي بتحصل كل ألف سنة مرة مثلا – وطبعا عودة مرة أخرى لانفجاره في الضحك ودموع بتنزل وكف في كف صديقه – بعد تمالكي أعصابي على أخري وكان واضح أن منظري المستفز احد أسباب ضحك خفيف الظل ذاك .. قال: أحيانا بقى بنجيب كتب تشريح الجسم البشري و بندرسها ونعملها إعادة صياغة بدل رسم الموديل وندرس منها تفاصيل الأيد وأبعاد جسم الإنسان وكده يعني.

وهكذا .. أصبحت المقارنة ببساطة بين أم محمد الدادا واحد طلاب كلية فنون جميلة أو ربما احد كتب التشريح .. وللعلم المقارنة في صالح أم محمد الدادا فعلى الأقل تتحصل في نهاية الأمر في أسوأ الظروف على خمساية بينما طالب كلية فنون جميلة في أسوأ الظروف يتم معاقبته بأنه مش هيلاقي موديل تاني يوم يرسمه لو تسبب في تخريب البورتريه ..
اهو الواحد لقى حاجة يعملها لو ملقاش شغل .. حتة مقشة في أيدي وخمساية آخر اليوم والأمور تبقى تمام !

هناك 8 تعليقات:

SOLITUDE® يقول...

طيب انا ممكن اجي اشتغلكم موديل والساعة بخمسة جنيه والحسابة بتحسب

بس على فكرة...اخركم لحد البوكسر بسسسسسسسسس
بعد كده يفتح الله :D

أحمــــــــدبــــــــــلال يقول...

كانت أمنيتى أنى أدخل فنون جميلة و أنا فى الثانوية العامة و أمتحنت القدرات و نجحت بس بعيد عنكم المجموع ماكنش قد كده علشان كده مادخلتهاش

بس طول عمرى أسمع عن
nude model
الموديل العارى اللى كان طلاب الفنون بيرسموه و كان مشهورين بيه
بصراحة مصدقتش الكلام ده خالص
بس اللى أعرفه أنهم بيرسموا الوجوه و التعبيرات و الحاجات دى
قرأت كتاب عن دافنشى و أزارى أنه كان بيطلع الجثث علشان يدرس التشريح عليها و حركة أعضاء الجسم
بصراحة الكتاب كان تحفة عن الفن اللى كان بيرسمه العبقرى دافنشى
اللى تعلقت بيه زيادة طبعاً بعد رواية شيفرة دافنشى
DaVinci Code
و لو كنتى سألتى كنت قلتلك على حكاية أنهم بيرسموا بعض أوفر لأنها بقت معروفة لأن مصاريف أدوات الكلية تقطم الوسط و بيوفروا على نفسهم الفلوس

على فكرة وجه الدادا هايبقى أكثر تعبيراً و ملامح من الوجوه الشابة الناعمة

Mai Kamel يقول...

ممم وجهة نظر يا احمد

AG يقول...

موضوع الموديل العاري دا بطل من بداية الثمانيات، يعني في أساتذة النهار دا ما اشتغلوش مع موديل عار.

أحمــــــــدبــــــــــلال يقول...

محمد فهمى
BackBone
مدونة
الواحة

خطب يا جماعة
روحوا باركوا و هنوا

و عقبال عندكم

غير معرف يقول...

رسم الموديل العاري كان يهدف إلى تعويد الطلاب على تناسق النسب و تكاملها
وليس هناك ما يفوق الجسم البشري في هذا الشأن سبحان الله
لكن الموديل العاري إختفى والحمد لله
و للحق رسم الأشخاص العاديين و الذين لا يملكون قدرا من الجمال أصعب بكثير

بالمناسبة يا مي.. لينك المدونة إتغير:
http://indifferentspace.blogspot.com

أحمــــــــدبــــــــــلال يقول...

رمضان كريم

و كل رمضان و أنتوا بخير

Cheb Amadou يقول...

والله يامى انا مش شايف حاجة بعيدة عن المنطق فى الكلام اللى انتى كاتباه، لأننا ببساطة بنعيش فى وقت اصبحنا بنفتقد فيه معانى الجمال بس لأنها متعارضة مع كلام شيوخ الاسلام العباقرة...حنقول ايه بس؟!