الثلاثاء، أكتوبر 10، 2006

حالة برد

الواحد بيفضل ناسي فكرة ان يجيله برد ويعمل فيها اللى مش همه لحد ما يزوره المرض السنيح ده.
سناحة البرد مش في ادويته ولا انك تقوم الصبح ميطلعلكش حس ولا الرشح ولا اعراضه "عشان مش حبه اقرفكو" بس الفكرة انه مبيروحش بجد.. هو قدرك كدة هتقضي ايامه يعني هتقضيها ولما يحب هو يروح هيروح لوحده

الاظرف في دور البرد ان الناس بتستهيفه وتقولك يا راجل قوم مفيكش حاجة انت هتمثل؟
و ناس تانية بتبدا تمارس رغبتها في انها تعمل الدكتور
"شوف يابني انت تنقعلك لمون في مية وتشرب ميته"
"بصي انتي تحطي جرايد عشان الكحه تتشفط من ضهرك" ولله اول مرة اعرف ان الضهر مكان الكحه للامانة.
"لا اوعو تجيبو سمك انهاردة احسن عندنا دور برد في البيت"
والسمك يا عيني مظلوم في وسطهم.

ولا خبرة المريض.. تحت بند اسأل مجرب ولا تسالش طبيب .. فنبعد عن اللى عايشين دور الدكاترة ونروح للمجرب.. انا جربت الدوا الفلاني وكان بينيمني كتير اوى بس ايه كان ممتاز .. او حد يسالني وانتي بتاخدي ايه بقى للبرد احسن ده لازم له ادوية مخصوصة وبتاع .. وايا كان الدوا اللى هطلع باخده فهو ولا حاجة جمب المفعول الاكيد بتاع دواه
والمعروف اصلا ان كل ادوية البرد بتنيم .. طب ايه الجديد؟
وهو البرد اصلا هيروح هيروح لوحده زي ما جه لوحده

اللطيف بقى العادات الصحية اللى الناس بتبدأ تقولها غير الجرايد وغليان اللمون والنعناع والكلام ده.. النصايح التانية اللى بتجري وراك في كل خطوة في البيت.. زي كني في السرير.. وانا موتي وسمي اسمع كلمة "كني" دي.. ولا متقعديش في المروحة والحرارة اصلا 40 يعني لو مقعدتش فى المروحة هتجيلي حمى.. المروحة مضرة طب خلاص هفتح التكيف واهو ضرره اقل.. لالالا هتقلب بكحه وهتسخني.. يعني تموتوني؟؟
الحل في مرض البرد انك تقتل حامل الفيروس فالفيروس يموت.. يا فرحتي

احلى ما في البرد شخصيته المستقله.. حد قوي كدة ييجي بمزاجه ويمشي بمزاجه.. ياسلام لو كان الواحد فيروس برد ذو شخصية كدة!
حتى جاهين اتخنق م البرد فطلعت رباعيته العبقرية
ياحزين يا قمقم تحت بحر الضياع
حزين انا زيك وايه مستطاع
الحزن مبقالهوش جلال يا جدع
الحزن زي البرد زي الصداع
وعجبي

على عيني وراسي لما الدنيا تشتي.. ياريت تشتي.. بس بلاش عليا أنا!

هناك 7 تعليقات:

غير معرف يقول...

ألف سلامة عليك بجد ، عامة بغض النظر عن جعواتي ليكي بالشفاء العاجل إلا إن التدوينة هايلة ودمها خفيف زي صابتها تمام ، فعلا البرد ده مرض عجيب ودمه غلس وبيروح لوحده فعلا ، بس من حرصي عليكي برضه ، معلش تعالي على نفسك واتبعي النصايح الرمة دي عشان تقومي بالسلامة بسرعة ، مين عارف ممكن يكون غباء النصائح وتفاهتها هي السبب في تنغيص حياة الفيروس وجعل حياته معاكي نكد ولا تطاق فيروح بدري منك

ألف سلامة مرة تانية وربنا ينعم عليك بالصحة والخير

أُكتب بالرصاص يقول...

ألف سلامة عليك

شفاك الله وعفاك

بس نصيحتي لك


انت
"كني"
في السرير
وهتبقي زي الفل

أحمــــــــدبــــــــــلال يقول...

ربنا يعينك على مرضك
ده أنتى غالية علينا




و على فكرة نصيحتى ليكى

كنى
فى السرير

Mai Kamel يقول...

الله يسلمكوا.. وميرسي اوى على "كني في السرير" انا اتكنيت خلاص متشكرين لتعبكوا :S

كلمه يقول...

loool ..... 2lf salama ya m3lm ..be2olek kaman 3la mwdoo3 elbard da ... mto2feesh fel shebaak keteer l7san test.hwy :D
w 5sosan b3d eldosh da fe 7alet el mya elsa23a ...2ma lw kanet elmya so5na b2a yeb2a 2hlan bel nzla elsho3bya ... w mbrook 3leko elnoom fel sereer

de kanet elnshra else7ya :D

alf salama tany w yla egmdy b2a dnty bokra hterg3y tel3by kora zy 27sn men el2wel :))))

Amr يقول...

حلو جدا يا مي
شفاك الله

Mai Kamel يقول...

ربنا يخليك يا زقزوق
ربنا يكرمك