الثلاثاء، ديسمبر 26، 2006

في عيد ميلادي العشرين

مرة في مرات التهييس العظيمة طلعت لجملة عظيمة زي الحالة تمام "وما ازيك الا كلمة يقولها الغرباء ليبدو لنا بمظهر الاصدقاء ولكن هيهات هيهات هيهات"

والف هيهات كمان.. واحد ولا انا اهمه في اي حاجة ويسالني ازيك؟ يافرحتي قال يعني لو قلتله مش كويسة هيعملي حاجة ولا هتفرق معاه حتى!

طب بنقولها ليه؟؟ نفاق اجتماعي؟؟ جايز..!

افتكر جملة لصديق "احمد عطية" كان عمرو زقزوق بيسأله لو هتموت كمان اسبوعين تعمل ايه؟؟

قاله "هروح لكل واحد نافقته واقوله يا حيوان".. حكيم يا ولد!

حبه اقول كلمتين لنوعين من الناس.. ناس كانت فكراني بجد وقالتلى كل سنة وانا طيبة.. يمكن مكانوش بيكلموني علطول ولا انا على بالهم دايما اكيد بس ع الاقل افتكروا يحسسوني انى اهمهم بشكل ما.. حتى اخر حد كلمني كان الاسلوب والطريقة وكل حاجة حسستني اني اهمهم

الناس التانية "النفاق الاجتماعي" احب اسالهم ليه؟؟ موتي وسمي حد يبقى لزج وييجي يقولى سوري نسيت عيد ميلادك بس عموما بما انه فات احب اقولك كل سنة وانتي..

ساعتها ببقى نفسي اقولها اهو انتي!

ياستي نسيتي المعاد انسي للسنة الجيه مش تيجي تقوليلي انا عارفة اني نسيتك بس مش هسمحلك تفتكريني نسيتك .. يلا نمثل سوا اننا فاكرين بعض واننا صحاب!

ولله ما فاهمة الناس دي

ماعلينا يسألوني بقى "تتمني ايه يا حلوة؟؟" وياحلوة دي مش عشان انا حلوة ولا حاجة لا هي بتتقال كدة بما ان اللى بيسالني دايما بيبقى اكبر مني فحلوة بتبقى دلع ينم على الصغر.

"اتمنى ايه!! طب ارد اقول ايه؟؟ اتمنى شوية ضمانات مش مضمونة.. اتمنى حد يضمنلي بكرة.. ضمان ان بكرة مش هيغدر بيا.. ضمان اننا مش راح نتفارق.. ضمان اني راح اشوف اللى فارقوني وتعبني فراقهم واني مش راح افارق تاني حد يعز عليا

اتمنى احتواء ابدي

اتمنى حد يديني ضمان اني مش هحس بذنب تاني.. اني هعيش بدون ذنوب.. حد يضمنلي ان صوت الضحكة هفضل سامعاها في ودني.. ان دموعي تبطل تنزل بسبب وبدون سبب.

عشرين سنة مرو تمام.. مر عليا فيهم ناس كتير.. ناس جم وناس راحوا وناس فضلوا.. وناس غيروني وناس غيرتهم.. افتكر كل ما كنت اصاحب بنوتة جديدة كانت طريقة ضحكتي تتغير وتبقى زيها.. لحد ما ثبتت للاسف على الضحكة الشيطانية الماردة الحالية..

حسه انى فارقت فئة الناس اللى مش بتتحاسب على حاجة.. طول مانت تسعتاشر ولا تمنتاشر اى حاجة بتنتهي بالتاشر دي كنت تنط ولا تجري ولا تصرخ محدش بيلوم عليك وكأن الـ "تاشر" دي فئة العبط اللى هو انت هتدق عليه ده تاشر يعني!

بالرغم من ان ناس هتعتبرها اهانة فهي للاسف مدح جامد اوى في سنكو.. لانك اول ما بتم العشرين بتحس انك لازم تكبر بقى وميصحش وعيب وانتي كبرتي.. يعني ايه تنطي؟ اما للبنات فالكعب العالي بيبدأ يقتحم حياتكو بشكل اوسع

وانا طول عمري اكره الكرافت والكعب العالي "اي حاجة تنم عن الرسميات" ونفسي برضه اقابل أحمدي "الاخ بتاع البساط الاحمدي ده"

نهايته اهو عيد وعدى ووقت وبيعدي.. والرك عللى بيعمل فرق.. عموما معتقدش ان بوست زي ده هيعمل وياك فرق.. اعتبرني كنت بفضفض ووقعت عليك القرعة عشان تسمع!

لامؤاخذة.. ازعجت سيادتك!

هناك 11 تعليقًا:

whyme يقول...

اولاً انا عندى 28 سنه يعنى اكبر منك يعنى مممكن اقولك يا حلوه
ثانياً كل سنه و انتى طيبه يا حلوه
ثالثاً فضفضتك اللذيذه دي فرقت معايا كتير
رابعاً مفيش اى شئ مضمون و لكن ده ميخليناش نزعل بس اهم حاجه ان احنا نعيش اللحظه و نتعلم ازاى منخافش من بكره
خامساً ان نفسى اسمع ضحكتك الى بتقولى عليها دى و الى خدتى وقت كبير لغاية متثبتى عليها و انا متاكد انها هتكون جميله
سادساً اجمل فقره عجبتنى هى
مر عليا فيهم ناس كتير.. ناس جم وناس راحوا وناس فضلوا.. وناس غيروني وناس غيرتهم.. افتكر كل ما كنت اصاحب بنوتة جديدة كانت طريقة ضحكتي تتغير وتبقى زيها.. لحد ما ثبتت للاسف على الضحكة الشيطانية الماردة الحالية..

mai يقول...

هههههههههههههههههههههههههههههههههههههههههههههههههههههه

بداية انا كتبت رد على تعلقيك ومسحته لاني كنت فاكراك بنت في الاول معرفش ايه خلاني افتكر كدة فرديت رد بناتيتي في الاول بس لما دخلت على بلوجك اكتشفت ان حضرتك ولدٌ بضم الدال
ههههههههههههههههههههههههههههههههههههههههههههههههه
ضحكت اكتر صراحة

هههههههههههههههههههههههههههههههههههههههههههههههههههههههههههه

منورني يا فندم وسعيدة اني عملت فرق
:)

karakib يقول...

من يقولون لك أزيك و أنت كويسه يحاولون أن يأتنسون بكي من غربه هم يعيشون فيها ... فالأنسان مرأته الحقيقيه أفعاله و أقواله فعندما يجلس امامك أحدهم و يقول أنا مش مستعد أرتبط عاطفيا دلوقتي ... يبقي نفسه فعلا من جواه أوي و ممكن يكون مش عارف و رد الفعل العكسي اللي هو زي بكاء الفرح .. خلاه يقول كده فلا تظمي البشر كثيرا سألأ الروائي الفرنسي الكبير أندريه مالرو أحد القسس و قال له ماذا تعلمت من تلقي أعترافات البشر لأكثر من 15 عاما فقال له أن البشر أتعس كثيرا مما نظن
فلا تصدري أحكاما مسبقه علي كل من يحاولون التقرب أو التواصل بأسلوبهم هم لأن الكل محتاج للتواصل حتي و لو أظهر عكس ذلك ... أنا اتفلسفت كتير أوي فالجملتين اللي فاتوا ألا أنه كلامك عجبني
كل سنه و انت طيبه و عقبال 1000 سنه يا مي و عيد سعيد

قلم جاف يقول...

كل سنة وإنتي أكثر صحة وسلاماً واستقراراً وابتساماً وتألقاً .. وأهديكي أغنية الكنج منير "امبارح كان عمري عشرين"!

غير معرف يقول...

مش عارفه لية يا مى بتعجبنى أوى طريقة كلامك.!
صحيح ماشفتهاش على الحقيقة..لكن تعبيراتك بطريقة كلامك كلها داخله دماغى بطريقة فظيعة

بخصوص التاشر..و لإنى لسه فى التاشر
بصراحة أنا مبسوطة بالتاشر ده جدا..بس ما بيعكرش صفوى غير الناس اللى قلتى عليهم...اللى بيعتبروا التاشر دول هما دولة العبط الأزلى

بس بينى و بين نفسى..نفسى أوصل لسن العشرين..لية مش عارفه.؟
يبارك لك فيه يا فندم

مع إنى ماأعرفكيش من فترة كبيرة يا مى..وتقريبا ماأعرفش عنك غير قليل القليل

إلا إنى بقولك..كل سنةو أنتى طيبة ..من قلبى بجد

مها

frozen love يقول...

awlan kl sana wenty tyba..bs a7b a2lk enyk nsety no3 f3lan beynsa...ana a3rf nas wask enhm bey7bony awy..bs 3la tool ms2teen we beynso...bt7sl y3ny..lkn m3aky fe kl ely 2lteh

whyme يقول...

على العموم انا سعيد جداً بيكى و كنت كمان عايز اعرف ايه الكلام البنتوتى الى كنت عايزه تقوليه و هل الكلام البنتوتى يختلف على الكلام الولدودى و حاجه اخيره
ضحكتك طلعت طويله اوى

Lasto-adri *Blue* يقول...

لول

طب انا 21 وعايزة اقول لحد يا امورة ويا حلوة وياشطرة

على اى حال يا مى.. كل سنة وانتى طيبة
افتكر كان عيد ميلادى 19 هو احلى عيد ميلاد مر عليا
بعد كدة بنشيل رقم ونحط رقم... مش حاسة بفرق غير ان لو ان واحد كان بيقول لى يا عروسة وبقى كلهم

ههمممم... مش عارفة

بس برضو انتى من خوة بقى خليكى مبسوطة
وعقبال السنة اللى بتحلمى بيها

Me2 يقول...

إزاي مش تعزميني على عيد ميلادك و أفوت التورته :)
كل سنه و إنتي طيبة يا قمر و كل عيد و عندك خروف بيقول مااااء :)

Human يقول...

كل سنة وانتى طيبة .. مع انى حاسة انها متأخر أوى
عندك حق فى كل كلمة قولتيها ... بس برضه احمدى ربنا لأنى فاكرة انه فى عيد ميلادى العشرين انا اللى بقيت اتصل بصحابى عشان وحشونى
بس ولا يهمك طالما إنتى بتقولى لنفسك كل سنة وانتى طيبة وراضية عن نفسك ومصاحباها ، ده أحسن من 1000 صاحبة ومتعرفيش بجد هى بتحبك ولا بتضيع وقت ... ولا زى حلاتى برسم البسمة على وجوهم

وادى عيد ميلادى ال21 قرب ومن قبل ما يجى مش مشكلة مين يفتكرنى ومين مايفتكرش ... المهم إنهم عدوا على خير وأهم حاجة اكون رضيت ربنا فيهم

سلام عليكم

Nuha Emam يقول...

ياااااااااااااااه ..
قد ايه التدوينة دي قديمة ..
انا ازاي ما قراتهاش قبل كدا ..
جايز كنت اتعلمت منها
انا هتم العشرين كمان 3 شهور ..
و تقريبا كدا كل واحد هيتم العشرين هيدرك الحاجات دي ..
اتمنى تشوفي ردي ..
و تشوفي البلوج بتاعتي اللي كتبت فيها عن العشرين برضه ..
يا رب يعدي الفترة دي على خير ..