الجمعة، فبراير 02، 2007

قناة فضائية؟ يابلاش!

دخلنا عصر التكنولوجيا والاتصالات.. ولا تحسب عزيزي القاريء أن ذلك مجرد اسم للعصر الحالي.. فهو بحق سم على مسمى واللي قال الاسم ده كان قاصده ونيته نية مبيته.. كل ما يحدث حولك من السهل عمله وتكراره.. موبايل أو تليفون لاسلكي أو تليفزيون في السيارة أو قنوات متعددة وكثيرة.. الحياة بقت أسهل!

انت مثلا.. أول ما جبت الدش طبعا جبت الراجل اللي ركبه وظبّط السوفت وير بتاعته ولقيت بتاع 150 قناة مثلا على النايل سات.. بعدها بأسبوع كلمك صاحبك وقالك على تلات قنوات جديدة ظهروا.. ولمواكبة العصر التكنولوجي إتصلت بالراجل اللى كان ركب الدش وجالك وجابلك التلات قنوات الجديدة وخد خمسين جنيه وهو نازل حق التعب والمواصلات.. بعدها بشهر كلمك واحد صاحبك تاني قالك على أربع قنوات جديدة ظهرت.. ولمواكبة الحياة والعصر إتصلت تاني وخمسين جنيه تانية لمركباتي الدش.. وبعدها بشهرين... الخ

هي دائرة مفرغة تنتهي حين تتعلم أنت البحث عن القنوات لترتاح وتريح مركباتي الدش وصحابك كلهم سوا.

ونظرا لتعدد القنوات وزيادتها يوميا وأقصد بالقناة الجديدة أو القنوات التي تطلع يوميا هي تلك القنوات مفرغة المضمون.. هي شكل فقط لقناة وأرباح لجيب صاحب القناة.. أما المشاهد فهو المظلوم الوحيد في هذه اللعبة!

فكان السؤال الذي يطرح نفسه "هو عمل القناة سهل قوي كدة ورخيص قوي كدة عشان كل يوم نلاقي قناة جديدة؟"

لك أن تعلم أن بنصف مليون جنيه يمكنك عمل قناة.. وشوف إنت بقى كام واحد في الدول العربية "على أساس قنوات النايل سات بس" معاه كام نص مليون!

الفكرة ببساطة صاحب المحطة أو القناة بيحجز تردد من النايل سات لو كان هيبث على النايل سات أو العرب سات على حسب القمر المستخدم.. ثم يحجز الوقت بعد أن حجز التردد بالساعة "ولله يا جماعة أنا ناوي أبث 6 ساعات في اليوم، طيب ادفع 1200 دولار" نظرا لإن الساعة بـ 200 دولار.

ثم يشتري أجهزة الديكو وهي أجهزة البث وتعمل على توصيل الصورة والصوت إلى شاشتك.. كدة عمليا القناة خلصت.. ثم على حسب الشكل اللي هتطلع بيه:

إذا كانت القناة دينية: "هات يابني كام شيخ من المشهورين.. وهاتلي مذيعتين تلاتة حلوين كدة.. أجرلي مخرج بالقطعة ومصور معاه بالمرة وع الشقة بقى"

ويأجر شقة محندقه كدة ويقعدهم وبالكروما أو بالكمبيوتر يعمل الخلفية من وراهم زي مايحب!

إذا كانت القناة إغاني ومذيعة بتتقصع ومسابقات: مش لازم شقة أصلا.. هات جهاز استقبال SMS ويتفق مع شركات الاتصالات اللي هتديله نسبة من أرباحها وشركات الموبايلات اللي هتكسب من المسدجات.. ويحط الكروما –الخلفية- وتقف المذيعة تتقصع براحتها والفلوس تنهال على صاحب المحطة سواء بمسدجات أو مكالمات أو لو لعبت معاه البلية قوي وجاتله إعلانات.. ولو إن أرباح المحطات اللي من النوع ده "مسدجات ومكالمات فقط" يفوق 300 ألف شهريا.

إذا كانت قناة أغاني فقط ورا بعض: هات كمبيوتر ومن شقته وصله بجهاز الديكو وحط كل الفيديو كليبات اللي هتتذاع ليتم إذاعتها ورا بعض بالترتيب.. خلصت القناة.

مش قلتلك الحياة بقت أسهل!.. وأهيف!

مي كامل

هناك 8 تعليقات:

Amr Fahmy يقول...

ههههههههههههه الموضوع مسلي وفيه معلومة فعلا يا مي
عجبني يا بنت

إبـراهيم ... معـايــا يقول...

قريته ف الحلوة كماااان يا مي


مبرووووك ... مواضيـعـك حلوة فعلاً ....





إلى الأمااااااااام :)

walaaz يقول...

سهل فعلا

حاجات براقة كتير بتكون أسهل من طرقعة الصوابع

بس مصدر معلوماتك بالارقام كدا منين يا مى؟

كلمه يقول...

da wlahy mafeesh 2ashal men keda
fekra gamda 2a5er 7aga ... w maksabha madmoon 3la maya beda :)))

loooool...bs shar elbaly ma yod7ek

ياسمين حميد يقول...

ما دام الأمر اصبح بهذه السهولة، لماذا لا يحاول أحد من يمتلكون فكرة جيدة عمل قناة؟
لا أعتقد أن كل من يمتلكون نصف مليون هايفين وعقولهم فارغة ويريدون الربح فقط؟
ربما يفكرون أن قناة جادة لن تأتي بأي ربح، أو على الأقل لن تأتي بربح سريع؟
حسناً، في هذه الحالة يمكن لأحدهم مثلا أن يقوم بعمل قناة ثقافية أو ما شابه ثم يعمل قناة من قنوات الكليبات أو ال
sms
ليغطي بها تكاليف القناة الحقيقية
;-)

(مصطفى العقاد كان ينتج أفلام رعب
ناجحة جداً (وهايفة جداً) غطى بها تكاليف الفيلمين الرائعين الذي اشتهر بهما)
!

قلم جاف يقول...

يا ميلودي يا الناس يا روطينا سيمة يا سترايك..

ما أظنش فيه اختيارات تانية ..

أربع قوالب جاهزة للقنوات الفضائية اليومين دول .. علشان السبوبة وتغطية التكاليف "العريانة" ، وصاحبها يقعد رجل على رجل وهو يصبر الاستاف اللي شغال معاه وطالعة عينه ع المرتبات لحد ما القناة تلاقي ناس هابلة تبعت اس ام اس تغطي تكاليفها..أصل البيه صاحب القناة لو ما لقاش زكيبة فلوس مطسوس في نظره يمول القناة حيدور على الإقفال والكوالين (=اللي هم احنا) نموله بالاس ام اس .. بنشتكي من القنوات دي واحنا اللي بنمولها.. شفتيش مسخرة أكتر من كدة؟

سلامات يا نايل سات، وآلووووو يا أمم!

sunhouseco يقول...

ماشاء الله عليك والله ...منيين بتجيبي هالاسعار والارقام ...خبرة واحنا مش عارفين ...انتي المفروض تطلقي قمر صناعي خاص بيك منشان الاسعار الخاصة اللي عندك .

مي كامل يقول...

الارقام دي من مصدر شغال جوا قنوات فضائية
وطبعا دي قنوات بدون برامج او مضامين خبرية لان اي مادة من المواد دي هتتكلف لوحدها نص مليون.
انا بتكلم على قناة زي قناة strike مثلا
قنوات بتحمل شعار الـ Low Budget