الأربعاء، أبريل 18، 2007

You've got mail.. little details


فيلم قديم قوي.. قوي قوي قوي.. بس قوي جدا جدا جدا
كل ما يتعرض لازم اتفرج عليه.. مع اني حافظه ايماءتهم وحركاتهم وتمثيلهم واصواتهم فى كل كلمة بيقولوها واللى اكيد حافظة حواره بالاساس.. ومع ذلك لازم اقعد اتفرج عليه لاخره
وانفعل معاهم واكتأب معاها واحبها معاه
هما الاتنين في الفيلم مجرد اتنين تحس انهم اتخلقو لبعض
فيلم وهمي بكل المقاييس
..
YOU'VE GOT MAIL

كاثلين وجو اللى هما بالاساس ميج ريان ذات الوجة الطفولي وتوم هانكس الممثل الخارق "خارق لانه خارق للقلب" الاتنين في نظري افضل من يمكنهم اداء مثل هذا الدور

غير فكرة ان توم هانكس هو المتحكم في احداث الفيلم.. فكرة انها متعرفش اي حاجة بتدور من حواليها وانه لم كل الخيوط في ايده وبيعملها مسرح عرايس في حياتها
شعور فظيع انك تلاقي حد بيلم كل المعطيات المتاحة في حياتك عشان يثبتلك انه ببساطة بيحبك
وهو المطلوب اثباته!!

اكتر ما يشدك في الفيلم مهما اتفرجت عليه ان تعبيرات وشهم حيه قوي.. بتيهالى ناس كتير اصلا بيفتقدو تعبيرات الوش دي.. معرفش ليه الجمود بقى الغالب على وشوشنا خايفين الناس تعرف احنا حاسين بايه ولا ايه
الله اعلم
عامة احمد ربنا اني مبعرفش اغير تعبيرات وشي

بعيدا عن الفيلم والقصة والتمثيل.. شركة وارنر بروس المنتجة للفيلم احيت الفيلم بتفاعل مع الجمهور بشكل زكي جدا..
على سايت الفيلم اللى انتج عام 98 هتلاقي الانترو بتاعته بالاساس من الفيلم.. مع اتاحة قراءة الميلات اللى كانت اساس الحوار في الفيلم.. ببساطة انت بتتشال من على كرسيك وبتسافر لجوا عالم الفيلم بكل من فيه.

رحلة او متعة او سعادة.. هي شوية حالات كتير بتزورني م الفيلم ده بتثبتلي ان الموضوع كله حوالين التفاصيل الصغيرة في حياتنا.. يارب يكون حد فهم حاجة.
جديا انصح كل اللى مشافوش الفيلم انهم يشوفوه

Quotes from the movie:
"Sometimes I wonder about my life. I lead a small life. Well, valuable, but small. And sometimes I wonder, do I do it because I like it, or because I haven't been brave? "

"How brave you are! You go to nowhere armed with .. NOTHING"

"Do you ever feel you become the worst version of yourself? "

"What happens to me when I'm provoked is that I get tongue-tied. My mind goes blank. Then... then I spend all night tossing and turning trying to figure out what I should have said."

"People are always telling me that change is a good thing. But all they're really saying is that something you didn't want to happen at all has happened"

"Let me just say, there was a man sitting in the elevator with me who knew exactly what he wanted and I found myself wishing I were as lucky as he."
"The odd thing about this form of communication is that you're more likely to talk about nothing than something. But I just want to say, that all this nothing has meant more to me than so many somethings. So, thanks"

هناك 5 تعليقات:

Dina Samaha يقول...

احييكى على اختيار الفيلم يا مى
انا بعشق الفيلم ده..ومينفعش يجى ومتفرجش عليه..

ده غير ان ميج ريان وتوم هانكس لوحدهم حكاية..

اكتر مشهد عجبنى مشهد المطعم لما كانت المفروض قاعده مستيناه وهى متعرفهوش وجيه شافها, عملت حركات كده غريبه انها مش واخده بالها منه وكملت قرايه فى كتباهاوهو قعد يكلمها ومتعرفش انه هو اللى هى مستنياه
وفى نهايه المشهد قالتله

you are nothing but a suit

اتفرجى بقى التعبيرات.. !!!!

فيلم عبقرى من الاخر

freedom يقول...

كم أعشق هذا الشريط السينمائي

JuSt_hUmAn يقول...

الأول شكراً جداً على كتابتك عن الفيلم لأني ما كنتش أعرفه و لما لقيتك كاتبة عنه و لقيت الفيلم بتاع تون هانكس ما كملتش التدوينة و نزلت الفيلم و شفته بعدين رجعت قريتها..فشكراً على تعريفي بالفيلم.
..
الفيلم تحفة فعلاً..من الأفلام العاطفية القليّلة اللّي بحبها..بعيداً عن تخريف الأفلام اللّي من عيّنة A Walk To Remember و Sweet November اللّي بتحشر الرومانسية في الموت فقط!
..
غير أداء توم هانكس و ميج ريان العبقري و تعبيرات وشهم اللّي اتكلمتي عليها..فالواحد ما بيبذلش أي جهد عشان يحبّهم!
و دي من أهم الحاجات بالنسبالي في أي فيلم عاطفي.
..
عجبتني كمان فكرة إن مش شرط الوش اللّي أنت بتشوفه من الشخص يكون الوش الوحيد..و إن بقليل من التجرّد ممكن تحب (بعض)أعداءك!
..
Do you ever feel you become the worst version of yourself?
بجد الجملة دي عبقرية جداً جداً جداً
..
شكراً مرة تانية على تعريفي بالفيلم و أنصحك تشوفي فيلم 50 First Dates
لو ما كنتيش شفتيه..أعتقد هيعجبك.
http://www.imdb.com/title/tt0343660

Mai Kamel يقول...

اولا شكرا على انك حسستني ان ليا تأثير
:)
ياترى كم كلمة ممكن الواحد يكتبها او يقولها ناس تعملها؟؟

بعيدا عن افكاري الفلسفية فشكرا اولا لردك وحضورك.. انا فعلا شفت
50 first date
عجبني بس مش قوي لسبب صغير ان النهاية كانت غير واقعية.. يعني مستحيل حد هيستحمل يعيش مع حد يصحى كل يوم يتفرج على شريط فيديو يعرف اخره وصل لحد فين.. ده باقي اليوم لوحده هيبقى رد فعل على الصدمة دي.. بس هو الفيلم بيلعب في تيمة الحب اللى بلا مقابل

الفيلم لطيف وكوميدي ورمانسي بس مش واقعي في وجهة نظري.. شكرا مرة تانية ليك

مَلَكة يقول...

ياه يامي
لو تعرفي أنا بعشق الفيلم ده أد إيه؟
ودايما لما بكون عايزة أعيش حالة لازم أشوفه
عايزة أقولك إن توم هانكس في حد ذاته أسطورة عبقرية خالصة
مع سكريبت بسيط ورومانسي ومؤثر
لازم يبقى فيلم كله عبقري
تحياتي يا مي وميرسي ليكي علشان كتبتي عن الفيلم ده