الخميس، مايو 24، 2007

خريج كلية؟ يافرحة أهلك بيك


"إن الحكومة المصرية غير مسئولة عن تعيين الخريجين"


تم نشر هذا الخبر في أكثر من موقع إلكتروني وأكثر من جريدة حيث أنه تصريح بالطبع لا يستهان به.. فإذا كنت خريج أو على مشارف أن تكون فببساطة حاول تجنب تلك المرحلة أسهل لك!

العمل في مصر ينقسم لقطاع خاص وقطاع عام.. والقطاع العام من المفترض أن يستوعب أعدادا أعلى من القطاع الخاص.. وها هو قد انسحب من ساحة العمل وتركك إلى الغول الكبير الاقتصادي المتخصخص.. ماذا ستفعل؟

هتفكر في الهجرة؟ قالولك إن الهجرة بلاش "كخه ومتعملش كدة تاني يا بابا" لإن مصر أولى بأبنائها وياريت تنسى بقى اللبانة اللي قعدنا نقولها بأن المصري يثبت نفسه تحت أي ظروف والكلام ده.. اذا تحصلت على تأشيرة للخروج أصلا يبقى كويس.
هتفكر تعمل مشروع تجاري؟ ده بفرض إن معاك رأس مال تعمل مشروع تجاري.. ماشي.. إبقى قابلني بقى في المصالح واللف على التراخيص وبعدها ربنا يعينك في السوق المصري والمستهلك ذو الدخل المادي الوفير!
هتفكر إنك تتوكل على الله وتشوف رزقك هنا في مصر وخلاص؟ يكفي إن أحد كبار المسئولين عبّر عن مدى تقدم مصر بإن أخيرا تقدم لمهنة جامعي القمامة خريجين كليات.. ومش أي كليات.. وطبعا البيه مفهمش إن ده قمة التأخر حيث إن مفيش شغل للدرجة اللى توصل بخريج كلية، أهله صرفوا عليه دم قلبهم إنه يشتغل في جمع الزبالة عشان ياخد200 جنيه بالكتير آخر الشهر.. محصلش مصروفه أيام الكلية.

ومع ذلك فالحياة مش سودة قوي كدة.. أوعى تكون إكتأبت من كلامي.. ده الحياة كما قالت المرحومة سعاد حسني –اللي قالو إنها انتحرت أو ماتت مقتولة يعني المهم إنها نهاية مأساوية- بس برضه قالت إن الدنيا بمبي بمبي!

تعالى أقولك شوية بمبي يا راجل.. عليك بقى وعلى القطاع الخاص.. مهو اللي فاضلنا.. وده متعة في حد ذاتها.. بيعتمد مبدأ "مص الدم" في التوظيف والعمل.. تجيبلي فلوس تاخد نصها.. ولو كانت الفلوس كتير اللى هتعود عليا منك هديك ربعها أو اللي أسكتك بيه م الآخر.. الفكرة ببساطة إن كل القطاع الخاص الحالي مش هيقتنع بيك ولا حتى يثبتك في شغل لحد ما يشوف حاجة تثبتله إنك هتحقق مكسب مادي للمشروع الخاص بتاعه مش تكتفي بمنع الخسائر عنه فقط، ولذلك حط في حسابك إنك ممكن تشتغل 7 أو 8 سنين بدون تثبيت في أي مكان.

لو الحكومة المصرية غير مسئولة عن تعيين خريجي الكليات أمال هي مسئولة عن إيه بالظبط بالنسبة للشباب؟؟ التعليم؟؟ ولله مش كل الناس بتهتم بالتعليم بس كل الناس بتهتم بالشغل.. الجاهل والأمي –غير المتعلم- بيدور على شغل والمتعلم بيدور على شغل.. ملهاش لازمة الجامعات اللي بتتفتح والمدارس لو مفيش فرص عمل تبلع الخريجين دول.

لو الحكومة المصرية غير مسئولة عن تعيين خريجي الكليات.. إذا يعلن الشباب عن عدم مسئوليتهم بتاتا وبالمرة عن أي عمليات إرهابية أو سطو أو سرقة أو قتل أو إنحراف أو إجرام أو تدهور أو إنحلال مجتمعي أو ....إلخ
مي كامل