الجمعة، يوليو 27، 2007

جتكو القرف



ظاهرة هباب وحلت علينا.. أو بالأجدى موضة منيلة واتعودنا عليها مؤخرا

كل واحد عايز يعمل فيلم في الموسم الصيفي العظيم لازم يحدفنا باغنية.. مطرب مشهور ويغنيله اغنيه ونعمل كليب من الفيلم ونبيع ونعمل دعاية لينا وللمطرب وللاغنية وللفيلم ولكل حاجة.

والاغنية هتكلفنا ايه؟؟ ده هي مشاهد م الفيلم وقص والزق.. سهله يعني


جديرا بالملاحظة ان الفيلم اللى ملوش مطرب مشهور هيغنيله او بمعنى ادق مينفعش لاحداثه الهبلة دي اننا نعمله اغنية مأساويه.. فاحنا مضطرين اسفين ان الممثل البطل ينعرلنا بصوته شوية.. خد عندك محمد هنيدي وأحمد آدم ومحمد سعد طبعا واخد الجمهور مقاولة كل سنة باغنية وفيلم لوكشة واحدة


اللطيف ان الظاهر مؤخرا بعد ما المطرب المشهور نفد م السوق.. وتلاه الكلمات الخربانة اللى بتتقال.. وجدنا ان اللحن كمان الظاهر نفد م الاسواق واضطر صانعو الاغنية اللى في الفيلم انهم ياخدوا اللحن من اغنية فيلم اخر.. يعملوا ايه بس مفيش وقت والصيف جه والفيلم نزل.. ميبيعوش مثلا؟؟ يخسروا عشان خاطر ودان الجمهور؟؟ يلعن ابو الجمهور


فيلم "احلام الفتى الطائش" الاغنية العريقة بتاعته واللى اول ما بتسمعها بتفتكر علطول وقفة روميو تحت شباك جوليت وهو بيغنيلها ولا بيعزفلها اي حاجة واليك بعضا من المقاطع المؤثرة من الاغنية

عايزاني اخس اخس

عايزاني اتخن موافق

اطول شعري اقص

من غير يمين موافق


وبعدين التتر يسرع قوي.. ويستكمل



اللطيف انه نفس اللحن بتاع الاغنية العبقرية برضه بتاعة محمد هنيدي في فيلم وش إجرام واللي بيهبدنا فيها برضه كلمات من القلب كدة

دبدوب وجبنا

سندوتشات وجبنة/جبنا.. شوف الجناس ياراجل

وعملت بورم

وفي الترام حاسبنا


الملاحظة دي مطلعتش مني عشان بس نوثق اللقطة.. بنت قريبتي هي اللي خدت بالها وقالتلي ولما جيت وزنتها كدة لقيت فعلا اللحنين شبه بعض.. مع انعدام المعاني زي بعض.. مع الممثلين اللى مش مطربين بالاساس زي بعض.. مع الكوميديا ذات ملامح الاستخفاف زي بعض.. مع الافيش المحتوي تركيز على وجه البطل بشكل المفترض انه كوميدي(راجع افيش وش اجرام).. ولايملك الجمهور سوى ان يدعي ربنا على مصدّري الاسفاف كلهم مع بعض.. لنهبدهم هم الآخرين بما اشتهر به محمد هنيدي في فيلم جاءنا البيان التالي "آخر افلامه الحلوة" جتكو القرف مليتو البلد.. بجد

هناك 4 تعليقات:

إبـراهيم ... معـايــا يقول...

عشان نبقى (حقانيين) بس يا مي، ليست المشكلة ف أغنية الفيلم، بل بلعكـس، أوقات بتكون الفكـرة بتاعة الأغنية، و إنه يكون فيه فيلم في الأغنية فكرة ناجحة جدًا، على سبيل المثال أغنية فيلم واحد من الناس، و عن العشق والهوى،،، والأخيرة غلمت مع الناس أكثر من الفيلم نفسـه ............
***********
وبالرجوع إلى ما كتبتيه عن(وش إجرام) مثلاً ، نجد المشكلة ف اللأفلام نفسها، يعني الفيلم التافهة لا يُتوقع أن يكون له أغنية ذات قيمة : قوم بالليل لأ ، قوم بالصبح ، مثلاً ، مكتوب إن ليها " مؤلف" كتب " كلمات !!!!
***********
ولغاية دلوقتي الواحد مش فاهم المشكلة فين بالضبط ، إمبارح أحمد بهجت ( الشاعر) كان بيقول إنه بيشوف الأفلام كلها، عشان يفهم الناس اللي بتهيف دي بتهيف إزاي ؟!!! ، وأنا أعتقد إنها مافيهاش أي إزاي، ،،،،
.............
طولت أنا
غمومًا تحياتي
.
.
و ســـلااام
(( في انتظـار الجيل الجديد من المخرجين و الإعلاميين ، ولا إيه ))

مي كامل يقول...

:)
ابراهيم.. مرورك اسعدني
معاك ان المشكلة في الافلام نفسها طبعا.. بس اللي يزيد عن حده ينقلب ضده.. انت ذكرت اغنيتين لفيلمين وعلقت مع الناس
شوف نسبة الاغنيتين لكم الاغاني اللى طالعة.. حرام يعني
بعدين هو احنا لسه شفنا حاجة؟؟ ده ابن شعبان عبد الرحيم هينزل اغنية فسخاني وبحب الرنجة على وزن فكهاني وبحب الفاكهة واغنية الخضار.. ده بقى كتير على اعصاب الواحد

غير معرف يقول...

كنت بقرا الموضوع وخطر لى خاطر غريب .. إن الفرق بين اللى بيحصل هنا واللى بيحصل برا هو نفس الفرق بين فيلم My Date With Drew و فيلم أحلام الفتى الطايش !



محمد

مي كامل يقول...

صح يا محمد
هما نفس التيمة تقريبا على فكرة