الاثنين، يوليو 30، 2007

تهييس على هامش الصحافة

شوف حابب تقسم حياتك لاي مدة زمنية واختار تشتغل في جريدة اسبوعية او مجلة شهرية او نصف شهرية.. حياتك هتتقسم حسب دورية الصدور

متحاولش تفكر كتير الناس بتبصلك ازاي لان بصفة عامة الناس دايما بتبص للصحفي على انه "التلم" الوحيد على الكرة الأرضية


افكارك راس مالك.. اقفل عليها في دماغها ومتراجعهاش حتى بينك وبين نفسك بالذات لو كنت شغال في جرنال


اعمل حسابك انك كل يوم على الاقل هتجيلك ساعة في اليوم هتقول لنفسك مفيش اي فايدة م اللي بعمله او بقوله.. يعني هو كلامي اللي هيغير الكون؟؟ هو فيه ناس بتقرا أصلا؟؟!


لو كنت صحفي في مصر بقى.. اعمل حسابك على مرمطة وتنطيط بتاع 10 سنين قبل ما تقول "أخيرا ارتحت".. ده اذا مرتحتش راحة ابدية عند ربنا فوق قبل الراحة دي


لو كنت محرر اوعى تفكر تقترح على مخرج صحفي فكرة ولا اقتراح ولا تعديل.. حتى لو كنت بتفهم اخراج يا سيدي.. والا هتسمح وصلة ردح م اللي قلبك يحبها "لو كانت المخرجة بنت" ولو كان راجل هيفضل فاكرهالك طول عمرك ومش هينسالك الوقفة دي أبدا مدى الحياة.. خليك في شغلك واعمل نفسك اعمى لو كان المخرج مبيفهمش


بلاش تفكر انك ممكن تخطب ولا تتجوز صحفي/صحفية زيك.. والا تحمل عواقب افعالك


الصحفي بيحضر الطبخة بتاعة الصحافة.. بيحضر ويشوف كل حاجة في الجرنال من أول الفكرة لحد التنفيذ والطباعة والتوزيع.. وبالتالي عايز تموت صحفي م الفرسة؟ قوله اقرا الجرنال اللى انت شغال فيه!

الصحفي سواء ع الورق أو في المقابلات الشخصية اولا واخيرا كاريزما.. والقبول من عند ربنا


أخيرا الصحفي لما يزهق يكتب الكلام الفقيع اللى انا كتبته فوق ده :)

هناك 10 تعليقات:

citizenragab يقول...

شكلك مخنوقة جدا


ده كله عشان اتهزاتي من البنت بتاعة الاخراج



في مؤسسات تانيه التهزيء فيها ممكن يبقي من موظف الامن علي البوابه


والادهي والانكي

لما يجيبوا موظف -حد من بتوع البطيخة تحت دراعهم اخر الليل - ويعملوه رئيس قسم والانكي لما يبقي قسمك انتي


ربنا يتوب علينا

Cheb Amadou يقول...

مش فاكر انا امتى وفين قلت الجملة دى، لكن عموما الجملة دى انا مازلت اصر عليها "العمل الصحفى اقذر عمل موجود على الأرض"

"افكارك راس مالك.. اقفل عليها في دماغها ومتراجعهاش حتى بينك وبين نفسك بالذات لو كنت شغال في جرنال"

الجملة دى انا لسه ملسوع بحاجة منها النهاردة بس الأهبل اللى سرق سارق حاجة هايفة، لدرجة (وعلى غير المعتاد لما حد بيسرق فكرة منى) قعدت اضحك على هبله.

abderrahman يقول...

كان الله في العون
بس على فكرة سرقة الأفكار دي.. احنا بنتكلم في ترف السرقة
فيه أنيل من كده، إنه موضوع إنتي كاتباه تلاقيه كاملا في حتة تانية
**
أتفق مع من قال ان الصحافة هي أقذر مهنة.. أو كما قال

Mai Kamel يقول...

:D
مكنتش اعرف ان الموضوع ده هيجمع الصحفيين
ولله عمار يا مصر
جملتك يا امادو فعلا موضوعي ناقصها
ههههههههههههههههههههههههههههه
منورني يا جماعة

MHMD KORNA يقول...

موضوع جميل يا مى وبيشد

وأسلوبك فيه ممتع ، خصوصا مع واحد حضر أغلب المواقف اللي بتتكلمي عنها

بس برغم كل دا

وبرغم اتفاقي مع الجميع أن العمل الصحفي بلا فخر من أقذر الأعمال على هذا الكوكب

بس أفتكر جملة لمهند اللي كان بيصيف من يومين وأنا مش بأنق عليه ولا حاجه ، لما كان بيقول إن مهنة الصحافة في مصر من أسهل الشغلانات المطلوبة .. ببساطة لأن مصر ولله الحمد مليانة بلاوي في كل شبر منها


ممكن الموضوع دا يتحول لمظاهرة صحفية

بس مش حأشيلك ساعتها :)


سلام

Mai Kamel يقول...

هههههههههههههههههههههههههههههههههههههههههه
لا واضح فعلا انك مش بتنق خالص على مهند :)
ولله لو مظاهرة فى الحر ده انا شخصيا مش هنزلها.. ممكن نبقى نحجز قاعة في نايل سيتي مكيفه ونتظاهر هناك براحتنا :D
حتى عشان منقفلش الشوارع.. هي مش ناقصة يعني

freedom يقول...

جميلة تعبيراتك
رائعة تلقائيتك
متمردة أفكارك
.............
شكرا على هذا البوست يا زميلتى العزيزة فى
.......
اقري المجلة اللى بتكتبي فيها وانت تعرفي
:)
www.zmshe.com

Mai Kamel يقول...

ايوة عرفت يا محسن
مبروك اطلاق زمش :)
ربنا يوفقك
شكرا ليك

تائهة فى أرض الأحلام يقول...

طيب احمدى ربنا ان ده بس اللى حصلك

أنا فى مرة بتكلم مع ست عجوزة فقلت لها انى صحفية
قالت لى ياعينى ياربى ايه اللى عمل فيكى كدة ده الصحفيين دولا عاملين زى الشحاتين طول النهار بيلفوا فى الشوارع

أختك فى الصحافة ..مى برده

Mai Kamel يقول...

هههههههههههههههههههههههههه
لا كدة الست دي هي اللى عندها صورة ذهنية غلط
كدة المشكلة فيها
ههههههههههههههههههه
منوراني يا مي