الأربعاء، يوليو 18، 2007

my date with Drew

سنة الانتاج: 2004
تمثيل: درو باريمور وبرايان هيرزلنجر
النوع: فيلم وثائقي
If you don't take risks, you'll have a wasted soul

لو سألت أي شخص في أمريكا إذا ماكان سمع عن فيلم يدعى
My date with Drew
ربما يكون من كوكب آخر فلم يسمع عنه.. أو بينه وبين التليفزيون
عداء شخصي وتار بايت فلم يشاهده وربما يكون احد سكان كوكبنا وشخص طبيعي يؤثر ويتأثر في التليفزيون ويصرخ فيك "طبعا شفته هو ده يتنسي؟"


برايان هيرزلينجر هو مخرج وبطل الفيلم.. شاب عادي جدا شاف درو باريمور الممثلة ذات مرة في فيلم.. واعجب بيها جدا زي ماكل الناس بتحب الممثلين والمشاهير.
اصبح حلمه انه يقابلها او بمعنى ادق يخرج معاها في date او معاد عاطفي.
وهل توقف عند مجرد الحلم؟؟
NEVER
أجر كاميرا فيديو من محل كاميرات لمدة شهر.. وقرر انه خلال الشهر ده لازم يعمل كل ما في وسعه عشان يقابلها.. وعلى مدار الفيلم التسجيلي بتشوف كل حاجة بيعملها
بتشوف انه بيتفق مع واحدة شبه درو باريمور ويخرج معاها بعد ما تعمل تسريحتها وكل حاجة عشان يعمل بروفا للمعاد اللى هيخرج فيه فعليا مع درو باريمور وهل هو قد المعاد ده ولا لأ.
بتشوفه وهو رايح يحلق ويظبط شعره وبشرته ويقابل اللى بتعملها تنضيف للبشرة عشان لما يشوفها يقولها انا رحت لنفس المكان اللي رحتيه.
وبتشوفه وهو بيعمل fake ID او بطاقة دخول مزيفة للعرض الخاص لملائكة تشارلي عشان يقدر يقابلها في العرض ويدعوها للمعاد العاطفي
بعد انتهاء الشهر بيفشل برايان في انه يدعو درو باريمور للمعاد على الرغم من انه شافها وجها لوجه.. الا ان ساعة المقابلة نفسه وروحه وكل حاجة طلعت منه فمقدرش ينطق!
بيرجع الكاميرا الفيديو للمحل.. ويتبقى من الفيلم تلت ساعة 5 دقائق بتبقى عرض لصور متاخدة بكاميرا عادية واللقطات وهو بيرجع الكاميرا وهو قاعد مهموم وحزين.. الخ
اثناء الشهر كان برايان عمل سايت الكتروني قال فيه على مشروعه وحلمه.. وبعد 10 ايام من انتهاء الشهر وتسلمه وظيفة جديدة كمان لقى المكالمات بترجعله.. ولقى اذاعات الراديو عايزة تعمل معاه حوار والفيديو اللى صوره نزله على السايت فالناس بدأت تتداوله.. وهكذا راح برايان يأجر تاني الكاميرا وكمل مشواره لحد ما قابل فعلا درو وبالكاميرا نفسها بتشوف المعاد بينهم وكلامهم وكل حاجة.
الطف حاجة ان درو باريمور جابتله هديه عشان الولد تعب يعني عشان يوصلها هديتها ليه كانت كاميرا فيديو احسن تقنية.. قالتله متبقاش تأجر تاني.

بعيدا عن حلمه كان ازاي.. او مدى هيافة او قوة حلمه بالنسبة لاي مشاهد.. اكتر ما الهم الجمهور وزاد من شعبية برايان حاجة واحدة "المثابرة" محدش يقدر ينكر ان ده حد متخلاش عن حلمه بسهولة.
الفيلم باختصار بيقولك تقدر تعمل اي حاجة انت عايزها.. فقط ابذل جهد.. وعلى الرغم من ان الفيلم وثائقي ويمكن ميجذبش ناس كتير.. بس اضمنلك ان اخر الفيلم لازم هتترسم على وشك ابتسامة ان مكانتش من الاستمتاع بالفيلم فعلى الاقل بالنهاية السعيدة او وصول الشاب لهدفه مهما كان.
حتى الان السايت
mydatewithdrew.com عليه كتير جدا من الزوار بيتواصلوا مع برايان وبيرد عليهم.. وبرايان حاليا ممثل فعليا وبيباشر مشاريعه وباقي اهدافه في انه ينجح في حياته بشكل يرضيه.. واعتقد انه هينجح فعلا.
مي كامل

هناك تعليقان (2):

غير معرف يقول...

لسه شايف الفيلم حالاً، وبدور فى جوجل عنه بعد IMDB لقيت البلوج هنا وكلامك عنه اللى زى اللى فى دماغى بالظبط..

فيه أفلام كده بتدى شحنة معنوية إيجابية .. ده فيلم منهم .. حد بيحلم بحاجة وحاول يعملها ووصلها فى الآخر .. حد بسيط وعادى زى أحد ممكن يكون ماشى جنبك فى الشارع لكن الفرق الوحيد إنه قرر يعمل اللى هو عايزه وناس تانية بتحلم وتتكلم وتقف مكانها.. "اتحرك": ده الفيلم بالنسبة لى..

بغض النظر بقى عن موضوع المواعدة ودرو باريمور-بحبها بالمناسبة لكن مش للدرجة دى طبعًا-لكن خلينا نجرد الموضوع ظاهريا هايفضل إن الواحد ممكن يحقق أقصى أحلامه وهو بس بيتحرك ناحيتها ! لو وصلتلها هاتكون أسعد حد فى العالم ولو ماوصلتلهاش هاتعيش وأنت عارف إنك مش مجرد واحد ساكت مابيعملش حاجة..

بإختصار الفيلم جميل، وكلامك جميل، وأنا بقول كلام ملعبك فى بعضه كده يارب تكونى فهمتى منه حاجة-أول زيارة، لكن مى كامل يبقى "فهمتى" !-وبشكرك فى الآخر لأن من نظرة سريعة على المواضيع فى الـ movies أولاً بطبيعة الحال لقيت اللى عجبنى..

شكرًا تانى لأنك إدتينى مجال أخرف شوية براحتى ، حتى لو أساسًا ماخدتيش بالك بأن فيه حد دخل السينما بعد الفيلم ما خلص !



محمد

Mai Kamel يقول...

D:D:

فهمتك يا محمد
منورني بجد :)