السبت، أغسطس 11، 2007

تاج من أمادو



التاج كان صعب اوى يا امادو..

اصل خمس حاجات الناس متعرفهاش عني دي صعبة اوى لان فيه ناس قريبة اوى عارفة كل فتفوتة

هحاول اقول حاجات حصرية ولو اني كدة هقع في مأزق بين اني اقول حاجات شخصية اوى مش عايزة كل الناس تعرفها وبين اني اقول حاجات معادة القريبين هيكونوا عارفينها

ماعلينا من كل الوش ده هقول اللى ينفع يتقال

خمس حاجات محدش يعرفهم عني (أو يعرفهم اقرب الناس ليا)

بعشق التلج.. وبعشق التزحلق ع التلج وبعشق الفرجة على اي عروض في التلج.. يكفي أن صور التلج فقط بتريح أعصابي.

ممكن حد يضايقني او يأسفني مرة ويعتذر فاسامح ومرة كمان واسامح لكن باجي عند نقطة تحمل معينة مبحتملش بهب في الشخص ده واقول كل اللى فى نفسي مرة واحدة وساعتها يسقط من نظري ولا احنلوش تاني ابدا.. بيبقى سحب كل رصيده معايا وعليه ديون وابيعه كمان بخسارة.

اغلب صحابي اول ما اتعرفوا عليا كانوا بيقولو عليا هبلة وهايفة عشان بهرج كتير بس بعد ما عرفوني على حق قالولي انتي طلعتي عاقلة اوى بس مجنونة احيانا !!!!

عصبية اوى.. ولاني مش في كل الاوقات بقدر اعبر عن عصبيتي دي وبكتمها كتير "شكل الضغط هيجيلي قريب".. فالحل الوحيد بيبقى العياط.. وبالتالي بعيط كتير اوى بس مش قدام حد "قدر المستطاع"


ممكن احس بالذنب م الهوا.. واتنكد بسبب ده.

أمرر التاج ده لبنت الدرملي اللى بقالها كتير محدثتش بلوجها.. ولمحمد حسن.. ولقاضي ومهند ابن الشناوي.. وانا وانت ومية مسا ع الناس الكويسة.

هناك 4 تعليقات:

Amr Fahmy يقول...

التلج ضريبته صعبة اوي في فاميلي لاند مثلا :D

مي كامل يقول...

لا وياريت التلج فى الفاميلي حلو يا عمرو
الا عن تجربة الارض مش مصقولة خالص وتقريبا بيمروا عليها كل سنة مرة
بتبقى خشنة والبوت بيغرز تقولش ماشي في رملة مش في تلج

مبيبقاش تزحلق بيبقى وثب عالي
هههههههههههههههههههههههه

عمرو الهوارى يقول...

تلج ..؟ !!

sasatifa يقول...

انا كمان جالى تاج من دول
هو انتى مشوفتيش تعليقى على موضوعك حوالين الحرب العالميه التانيه ؟يا ريت تشفيه ضرورى