السبت، ديسمبر 29، 2007

من 20 سنة


هييييه.. ولله والواحد كبر وبقى يتحسبله حساب.. لاحساب بجد يعني مش مجازا.. حساب جاري وودايع وكلام كبير كدة
في عامي الواحد وعشرين احب افتكر التطور اللي ظهر عليا بما اني بقيت م الراشدين وكدة.. اكيد مش هقعد احسب الغم والهم اللى حسيت بيه على مدار سنة يغور يعني.. خلينا فى الحاجات الحلوة.. الواحد ايه غير ذكريات وشوية حاجات فوق بعض كدة
اسباب كتير تخليني مبسوطة ان كل الحاجات دي حصلت قبل ما اتم الواحد وعشرين وابقى من الراشدين

اتعلمت سواقة وطلعت الرخصة وبقيت بتخانق مع الخلق بالعربية وجربت نفسي في شوية حوادث على قدي
خلصت كلية واتخرجت وطلعت عيني وعين اللى جابوني فى تطليع الشهادة وطلعت الحمد لله
باعتبار ما سيكون هنهي مرحلة شغل سخيفة كانت فى حياتي.. وربنا يسهل واعرف اخلع منها.
حد مهم في حياتي علمني ان مش كل الفرص بتيجي على مقاس الناس وان مهم الواحد يقدر يقول لا في وش الاغراءات ومفيش حاجة اسمها فرصة متتعوضش.. (اشكرك بجد).
عملت شغل في مجلة جود نيوز سينما افتخر بيه مع اني مكملتش فيها اكتر من 6 شهور حتى الان ، والاكثر فشخرة طبعا الملفين اللى عملتهم واحد بصحبة محمد قرنة والتاني اول ملف اعمله لوحدي وربنا يستر.
هو انجاز عبيط اوى يعني بس هتحس بيه كل واحدة بتعشق الكوتشي.. بس بقيت بعرف امشي بكعب .. واقدر دلوقتي اقف بفخر واقول لعيالي انا يا ولاد عشان امشي بكعب قعدت 20 سنة بتعلم D:
من ساعة ما تميت 20 لحد الـ 21 خسرت ناس زي الفل وكسبت ناس زي الفل وسعيدة جدا باللى خسرتهم وسعيدة اكتر باللى كسبتهم وطايرة م السعادة بقى باللى اثبتولي انهم صحابي بجد ولسه انا وهما صحاب .. واهو الكل كسبان :)

مش قادرة افتكر اكتر من كدة .. بس احب اتمنى قبل ما اتم العام الـ 23 تحصلي شوية حاجات حلوة تانية (ايوة يعني في خلال سنتين من دلوقتي) واهو ربنا يسهل:
ابقى ثابتة في شغل انا راضية عنه وعن ناسه
ابقى سافرت ايطاليا وجيت واحكي عن التجربة دي
ابقى مخطوبة او متجوزة او متطلقة D: واحكي برضه عن التجربة دي ههههههههههههههههههههههههههههه
ابقى رايحة جايه بزكزوكة بتاعتي
اكون عملت حجة او عمرة على الاقل ....
يلا مين عارف بقى.. يامين يعيش :)

هناك 7 تعليقات:

Amira Qassim يقول...

كل سنة وانتي أكثر طيابة يا مي
أما موضوع الـ 21 سنة ده وانك بقيتي كاملة الاهلية ...فأنا اتصور -بعيدا عن القانون- انك كاملة الاهلية من زمان اوي
أحب أقولك حاجة كمان ظريفة ومضحكة أوي ..
خدي بالك ان الفترة الي جاية دي هتبقي فترة مضحكة جدا لأننا هنعد تقريبا 3 سنين مش حاسين اننا بنكبر وهنفضل حاسين اننا عندنا 21 سنة بس :S

mohamed يقول...

كل سنة وانيت طيبة يا مي وربنا يزيدك انجازات كمان وكمان ..

وخلي بالك وانتي سايقة :)

Guido يقول...

كل سنة وأنت طيبة

ال21 عمر فاصل ومميز

أتمنى تحققي اللي بتتمنيه قبل ال23

مي كامل يقول...

اميرة.. وانتي طيبة يا بنوتة.. يشرفني انك تكوني اول تعليق يافندم :)
انا وانتي اهلاويين من زمان يعني D:

مش التلات سنين اللى بتقولى عليهم دول عليا انا وانتي؟؟ قشطة خلي عندنا 21 لحد الستين.. الشباب شباب القلب هههههههههه

بنت الدرملي.. تحياتي وقبلاتي وقناديل دموعي D:

مي كامل يقول...

محمد وانت بالف خير وسعادة يارب دايما :) اعتدت وجودك على المدونة.. متغيبش بقى

جيدو.. وانت طيب يا فندم ويارب تتحقق امال شباب مصر كلهم يارب ويوفقهم

أحمد..فيه ما فيه يقول...

تعلمت قيادة السيارات؟
والشجار مع المارة أيضا؟
طوبي لك ياشيخة
طوبي لك

"فسارق الزهر مذموم ومحتقر...وسارق الحقل يدعي السيد الخطر"
جبران خليل جبران

مي كامل يقول...

ههههههههههههههههههه
طوبى!!!
الله يكرمك يا شيخ D:
منورني بشدة يا احمد.. نشكر مرورك العزيز