الأربعاء، أبريل 16، 2008

هذي

لعلك لن تفهم شيئا.. وانا كمان
واحد حياته المهنيه كويسة.. الشغل تمام وحياته العملية تمام بس مش راضي
تعبان.. ناقصه الحبيبة.. وييجي يشتكي غياب الحبيبة
وواحد بيحب.. بيموت حبا.. بيتنفس عشق.. ومع ذلك بيشتكي
تعبان.. ناقصة الشغل.. مخنوق م الشغل ومش راضي ع الشغل
كل واحد فيهم مستني الحاجة اللى ناقصاه ومتصور انه لما هيكمل اخر قطعة في بازل حياته هيعيش الحياة الكاملة
هيعيش حياة سنووايت والامير بعد ما تغلبوا على الساحرة الشريرة

امتى هنعيش مرتاحين؟؟ امتى هما هيعيشوا مرتاحين؟؟
مين قالك ان بعد ما الاميرة والامير اتجوزوا محصلش عندهم مشاكل؟؟
مين قال ان اخر قطعة فى البازل هتكمل حياتك؟؟
مين قالك اصلا انها اخر قطعة فى البازل؟؟

عايز رأيي؟؟ فكك م البازل.. واستمتع بيها حتى وهي ناقصة.. خاف اوى وحرص اوى واحتضن اوى كل القطع اللى عندك عشان متفقدهاش وانت بتركب القطعة الاخيرة
حياتك ناقصة اه.. تعبان وجزء ناقص اه.. بس حاسب لكله يروح

الغريب بقى ان الشريحة التالتة لا عندها الحبيبة ولا الشغل وبيقولو اهو.. بكرة البازل تكمل.. مع ان معندهمش حاجة يخافوا عليها
اما الشريحة الرابعة واللى دايما بتبقى محسودة عندها الحبيبة والشغل.. والأمرّ انه مخنوق من كتر الشغل اللى بيشتغله عشان يكفي الست، ومخنوق من كتر الحب اللى بيديه عشان ميحسسهاش بالنقص، وفى الاخر برضه مخنوق وتعبان وبيشتكي
محدش عاجبه حاله

ايه بقى لازمة كل الكلام اللى انا قلته ده
ولا حاجة.. فكك من المدونة دي كلها على بعض هي كمان

هناك 10 تعليقات:

raspoutine يقول...

ايه التوهة دى ؟

وليه ؟

mohamed يقول...

في ناس مهما حققوا في حياتهم بيحسوا أنهم لسه معملوش حاجة وموصلوش للي عايزنة ..

يمكن لانهم مش بيقدروا يحسوا باللي في اديهم .. أو أنهم بيطمحوا في شئ أكبر ..
ويمكن تكون دي طبيعة النفس البشرية ..

يعني المهم انا اللي عندي هحس بيه ازاي لاني لو محستش بيه يبقى أكنه مش مجود ..

أقولك فكك من تعليقي دا ..

Mai Kamel يقول...

راسبوتين..
انا عارفة ياخويا!!!

محمد:
بالعكس
ردك قال اللى كنت عايزة اقوله اسلا او افهمه بالاساس
منورني يافندم :)

غير معرف يقول...

إزيك يا مي
سلفادور دالي كان بيقول، لا تخشى الكمال، فلن تدركه
يمكن يكون قصده على الفن، بس الجملة بتتكلم فعلاً عن كل شيء في الحياة، المشكلة بس أن الإنسان يوازن بين أنه يسعى للكمال قدر المستطاع، وبين أنه يفضل حاطط في باله أنه مش هيقدر يوصله، معادلة صعبة، بس على الأقل لما الواحد يبص وراه، يحس أنه عمل اللي عليه ومش ندمان على حاجة
صباح الفل

Mai Kamel يقول...

ًباح الورد يا جيدو :))
متوقعتش خالص ان لحظة هذيان ممكن تخليني اسمع الكلام ده
بجد منورني :)

سبهللة يقول...

تحياتى وبالتوفيق ان شاء الله

محمد سيد حسن يقول...

الله

طب مانتي كمان رمادي أهو

إشمعنى يعني

لغيت الاتفاق مفيش تكنيكلر

Unknown يقول...

اناالمدونة جميلة جدا دى اول مرة اخش عليها انا عرفتها (بصى الخبر الجامد ده)من على التلفزيون..اه والله ..كان فى النهارده برنامج على القناه التالته الارضيه وكان بيتكلموا عن عيد تحرير سيناءوبعدين بيستعرضوا صور على المواقع لسيناء وجابوا مدونتك والله والصور اللى فيها عن سينا وقال العنوان للعاوز يخش يشوف الصور ..ايه رأيك فى الخبر وانا ما بهزرش وعاوز الحلاوة

إبـراهيم ... يقول...

على فكـرة عاجبني قوي طريقة الكتابة دي ، بحسها تلقائية أكثر :)
**************
إزيـــك يا مي ، بقالي كثيير ماعديتش هنا، وإنتي بقالك كثير من كتبتيش جديد ، عمومًا شايفة التدوين إزاي ؟؟؟
هتلاقي ده عندي :)


تحياااااتي

قلم جاف يقول...

المشكلة إنه دايماً حتفضل حتة ناقصة في البازل..

مهما اكتمل..