الأربعاء، يوليو 16، 2008

:)






الضحك قال ياسم ع التكشير

أمشير وطوبة وأنا ربيعي بشير

مطرح ما بأظهر بانتصر ع العدم

انشالله أكون رسمايه بالطباشير

وعجبي


محستش في مرة اني عايزة اقول حاجة وخذلني جاهين

دايما كنت بلاقي رباعية تقولي المضمون في الصميم كدة

اكنها اكلاشيهات بتيجي على بالي وقت العوزة

بس من فترة بدأت اسمع بعضا من الراي من الشاب أمادو

بدأ يوردلي شوية بضاعة كدة بالتدريج بكميات قليلة عشان المباحث بس متاخدش بالها، وشوية بشوية بدأ يشرحلي الكلمات اللى كانت هيروغليفي بالنسبالي

وبسببه تعرفت على رائعة خالد "انسى الهم ينساك"

الاغنية قد تكون كلماتها بديهية للناس، أو ان فيه الف اغنية تانية قالتلك انك لو ابتسمت الحياة هتبقى بمبى مسخسخ ، بس انا اول مرة اعمل ده بجد

اول مرة بجد اقرر وسط العتمة والغم والمصايب والكوارث اني هنفض للنكد واني مش قادرة اتنكد اكتر من كدة واني هبتسم واضحك غصب عن عين المشاكل اللى بتحصل

الظريف .. ان تقريبا الهم نسيني فعلا، الظاهر حد راح قاله اني نسيته ولا حاجة

فجأة برحمة من ربنا الحياة هديت، والبساطة رجعت ترفرف من حواليا تاني، والمشاكل خمدت ولله الحمد.



دي تاني مرة أوصل لمرحلة طويلة من الخنقة تخليني مش قادرة اعيش في نكد اكتر من كدة، أول مرة كانت في اولى كلية لما مدخلتش صحافة وكنت فى الويتينج ليستD:

وادي المرة التانية.. بس المرادي معرفش ليه ليها طعم مختلف

يمكن عشان المشاكل كانت هتدمر أهم مجالات حياتي.. ولله اعلم



ماعلينا.. تحياتي للشاب أمادو، والشاب خالد، وجاهين رحمة الله عليه:)

------------------------------

ع الهامش: اللى مسمعش اغنية انسى الهم لخالد، يجرب يسمعها كفاية كمية البهجة غير الطبيعية اللى موجودة في الموسيقى بتاعتها :)

هناك 3 تعليقات:

مــهــا يقول...

طب ما ترفعيهالنا يا بنتى الله يكرمك
:)
الواحد نفسه فى حبة بهجة يمكن يقدر يعمل بيهم حاجة كده ولا كده ..

على فكرة مها = ربناد
لا تقلقى
;)

ahmedmisry يقول...

ربنا يقرج همك إن شاء الله
الحقيقة كان مرورى بالصدفة من خلال البحث عن موضوع معين فقادنى البحث لمدونتك وها أنا أطالعها لألحظ خمولك على الرغم من ثراء مدونتك

مي كامل يقول...

مها منوراني يا جميلة.. هبعتلك الاغنية اول ما اشوفك اونلاين :)))

أحمد مصري
يسعدني زيارتك الاولي ومش الاخيرة ان شاء الله