الخميس، أغسطس 28، 2008

اغمى عليك قبل كدة؟

وقفت في الطابور الممتد والذي لم تتمكن من رؤية نهايته نظرا لقصرها.. وكلما زاد الطابور طولا كانت الشمس تزداد سخونة، بمرور الوقت لاح لها الموظف الذي ستقدم له طلبها من بعيد، وقبل أن تتمكن منه تمكنت الشمس منها لتصيبها بضربة من العيار الثقيل افقدتها توازنها ليغمى عليها بشكل كلاسيكي لتقع بين أيدي الشاب ضخم الجثة الذي أوقفه القدر خلفها.
المفروض ان الشاب ده يحبها بعد كدة وتتكمل احداث الحدوتة الرومانسية، بس الواقع ان مفيش اي احداث رومانسية حصلت هو لحقها وقومها وخلصت المدرسة وخلصت الكلية وكبرت ولا شافت خلقت اللي جابوه مرة تانية D: عفوا .. هكذا الواقع.
أما الأوقع، فان كل الحاجات دي اصلا متحصلكش D:D:D:D:D:

في الأوقع.. انا عمري ما اغمى عليا حتى، ولو اني دايما متخيلة ان حالات الاغماء دي هتبقى حاجة رائعة جدا.. مش لاني هقابل Prince Charming مثلا.. اطلاقا بس الفكرة كلها ان فيه مليون موقف لو كنت اغمى عليا ساعتها كانت الحياة هتبقى الطف كتير كتير كتير.

المرة الوحيدة اللى الناس اتفقت انها تعمل الشكل اللي في الصورة ده قدامي، كان يوم ما قررت اعمل نطة حمام السباحة من على سلم الكلية ونزلت زارعة بصل بس مش في بسين بقى، في ارض الكلية S:
للامانة مش هقول اني اتألمت وبتاع، لاني اكتشفت من الوقعة دي ان اللي بيقع لمدة 15 ثانية تقريبا ولا بتحس باي حاجة، انت بتحاول بس تدرك ايه اللي حصلك.. بعد فترة بقى بتحس بكل اللى محستش بيه، وهتحس احساس بقى على ابوه يعني D:
المهم.. هتمر الايام وهفضل معتقده ان حالات الاغماء من اروع مايمكن ان يحدث للناس.. يعني في اشد المواقف حرجا لو اغمى عليك هتبقى حاجة جميلة جدا.
ولو في وسط خناقة بين اتنين بيهموك والشباشب والشواكيش حاسس انها هتطلع، لو اغمى عليك ساعتها هتبقى احلى حاجة حصلت لعلاقتهم.
ساعات في البيت كمان بتتمنى انه يغمى عليك، لما صوت الوالد والوالدة يعلى اوى وتبقى تعبت من الخناق والصداع بتتمنى يغمى عليك وتصحى لما يخلصوا عشان تصحى في الهدوء كدة.
لما الدنيا بتقفل اوى فى وشك وكله بيبقى سواد في سواد الاغماء بيبقى ضي الامل الوحيد D:
مواقف كتير متخيلة فيها ان حالات الاغماء هتبقى هايلة جدا فيها.. ياسلام لو كان الاغماء ده بـ "زرار"، كانت الحياة بقت حاجة تانية خالص.. موقف معجبنيش دوس ع الزر، اتخنقت جدا من الحياة دوس ع الزر، عايز تروح م الشغل ومش عارف دوس ع الزر برضه.. يعني هما هيشغلوك وانت مغمى عليك؟!!
بستغرب على الناس اللي بيغمى عليهم من اقل حاجة.. نفسي اعرف اعراض الاغماء والفوقان برضه، طيب اللي بيغمى عليه ده بيحلم بحاجة وهو نايم كدة؟؟ ولا بيبقى حاسس باللي حواليه ولا ايه الموقف يعني؟؟
ياخوانا اللي اغمى عليه يبقى يقول للي لسه مأغماش، واهو هيبقى يشيله لما يغمى عليه، هنردهاله يعني :)

هناك 9 تعليقات:

Amr Fahmy يقول...

والله يا مي يا بنتي أنا فيه مرة مش عارف كانت إغماءة ولا لا لأني مش فاكر... أنا فاكر اني اترميت ع السرير عشان ارتاح من المصيبة اللي كنت فيها ومعرفش هل حصل لي نوم سريع جداً ولا إغماء... ومش عايز أعرف!

بكرة يغمى عليكي وتبقي زي الفل، أهم حاجة بس تحاولي

مي كامل يقول...

D:
اللي هو هنول شرف المحاولة مثلا
هههههههههههههههههه

mohamed يقول...

في واحدة صاحبتك اوي كان أول معرفتي بيها وهي مددة على الأرض أدام الكلية بتاعتكم ممكن تنقلك خبرتها

أما الأغماء الأغماء اللي هو طبيعي دا 100% من غير مواد صناعية ولا مكسبات طعم مجربتوش قبل كدا .. إنما جربت البنج بتقومي اكنك كنتي عاملة دماااااغ

ربنا ينولك اللي في بالك يا مي

بس ميكنش على سبيل الهروب من الموقف

مي كامل يقول...

D:D:D:D:
مين صاحبتي اوي دي يا محمد؟؟ تكونشي بنت الدرملي؟؟ بس على مدار معرفتي بيها للاربع سنين مشوفتهاش ممددة ع الارض ولا حاجة
ممممممم
بس حلوة فكرة البنج دي
عجبتني اوي D:

Ayman Elsherbiny يقول...

قبل كدة كنت عامل عملية جراحية ولسة قايم من بنج كلي، بعد ما فقت بحوالي ساعتين، حاولت أقوم من على السرير، وقفت وبعدين فجأة لقيت المنظر اللي بتشوفه عيناي عبارة عن فجوة سوداء بتضيق بسرعة ولساني تقل، وساعتها أخويا كان قدامي قالي وشك كان لمونة، المهم اترميت على السرير تاني قبل ما أدخل في الإغماء فعلا، والحمد لله عدت على خير. لكن من خلال نصف تجربتي دي، أقدر أقولك إن الإماء مش حاجة جميلة خالص :)

مي كامل يقول...

D:
ايمن.. الف سلامة يابني :)
قولي انت مختفي فين اصلا ازيك؟؟ واخبارك؟؟ وكل سنة وانت طيب كمان

مـهـنـد يقول...

تدوينة غريبة جدًا.. عاوزة حد أغمى عليه يقول هو أغمى عليه ازاى؟؟ طب ازاى؟؟ عمومًا يا مى الإغماء بعيد عن السامعين مختلف عن النوم.. الإغماء فقدان للوعى والإدراك، وبيحتاج منبه قوى جدًا للإفاقة، وإذا كان الموضوع أكبر من كده لا قدّر الله لازم يكون فيه تدخل طبى بأجهزة زى التنفس الصناعى.. لكن النوم حالة استرخاء لأجهزة الجسم وبتنتهى بوجود أى منبه.. عمومًا يا مى أتمنى إنك ماتشغليش نفسك بالموضوع ده، لأن اللى بيخاف من العفريت بيطلع له

mohamed يقول...

هي بنضرتها :D

اربع سنين ومشفتيش المشهد دا .. حقيقي أنتي فاتك كتير :)

دكتور/ ايمن القناوى يقول...

موضوع غريب وجميل .. وشكلك فعلا بتكتبيه باحساس اكيد انت فى مشكله هى اللى خلتك تكتبى البوست الجميل ده
بس الهروب من المشاكل لا يحلها
تقبلى خالص تحياتى واعجابى باسلوبك