الحياة مستويات وطبقات وحاجات كتير فوق بعض، مستوى مهني او عائلي او في الصحاب او في نفسك او حتى مع ربنا.. كلها مستويات وكل واحد ومستواه يعني
حاجات كتير تفقع وتحرق المرارة، والواحد قرف من كتر الحاجات اللي بتقرف
قرفانه من روحي ومن أغلب الحاجات اللي حواليا، قرفت من اسلوب الشغل بالشكل ده،
كل يوم الاقيني بقول رباعية تخاريفي: حاسب من الاسافين وحاسبلها، حاسب م الاسافين ومن حبلها.. راح تنتهي ولابد راح تنتهي.. مش انتهت اسافين من قبلها؟؟
ولله مش اكيد بقى الموضوع ده، اصل مش كلها بتبقى اسافين فيه مغارز وفيه حفر وفيه نقر، الطريق منيل يعني
قرفت من السيطرة والتحكمات، وحبه فوق وحبه تحت واخص عليك يابتاع الكحك، تقريبا بتاع الكحك كان السبب منه لله..
صحيح انا مبقاليش كتير تحت، يعني كنت فوق قوي من فترة طويلة، بس اديني اتجابت تحت، وعندي الشجاعة الادبية (نفسي اعرف اشمعنى الأدبية بتيجي ورا الشجاعة لزق) بس المهم عندي الشجاعة الأدبية اني اقول اني بقيت تحت
عادي يعني.. كلنا لها.
ولأني بعتقد ان البلوج عبارة عن (مالطة افتراضية، متاخدة من بتنده في مالطة ومحدش سامعك وبتجعر مع روحك) فانا بقى احب اصرخ مع روحي شوية واقول ان ليا شوية طلبات
عايزة يبقالي شوية سيطرة على الوقت، على العصبية، على ردود الأفعال.
انا نفسي اقول للواطيين انتو واطيين في وشهم واهبدهم قلمين وامشي، ساعتها يمكن احس بجد اني عملت لروحي حاجة.
نفسي اعمل لنفسي ريموت كنترول، وقت ما الاقي القناة بدأت تعرض ما لايحمد عقباه اقلب علطول، بسهولة كدة يبقى القلب
نفسي اخلص من حالة اللاسلم واللاحرب دي، ياسلم يا حرب وخلينا نخلص، العين بالعين وخلينا احنا الاتنين عمي
نهايته.. من منبري هذا احب اعلن اني اكتفيت، شكرا.. كفاية كدة
ممكن بقى شوية فوق؟
انا وحشني فوق ده :(((((((((
هناك تعليق واحد:
لا تطاوع ذهنك في الذهاب وراء الخيالات المخيفة والأفكار السيئة .
- لا تغضب ، واصبر واكظم واحلم وسامح ؛ فالعمر قصير .
- لا تتوقع زوال النعم وحلول النقم ، بل على الله توكل .
- أعطِ المشكلة حجمها الطبيعي ولا تضخم الحوادث .
- تخلص من عقدة المؤامرة وانتظار المكاره .
- بسِّط الحياة واهجر الترف ، ففضول العيش شغل ، ورفاهية الجسم عذاب للروح .
- قارن بين النعم التي عندك والمصائب التي حلت بك لتجد الأرباح أعظم من الخسائر .
- الأقوال السيئة التي قيلت فيك لن تضرك ، بل تضر صاحبها فلا تفكر فيها .
- صحح تفكيرك ، ففكر في النعم والنجاح والفضيلة .
- لا تنتظر شكراً من أحد ، فليس لك على أحد حق ، وافعل الإحسان لوجه الله فحسب .
- حدد مشروعاً نافعاً لك ، وفكر فيه وتشاغل به لتنسى همومك .
- احسم عملك في الحال ولا تؤخر عمل اليوم إلى غد .
- تعلم العمل النافع الذي يناسبك ، واعمل العمل المفيد الذي ترتاح إليه .
- فكر في نعم الله عليك ، وتحدث بها واشكر الله عليها .
- اقنع بما آتاك الله من صحة ومال وأهل وعمل .
- تعامل مع القريب والبعيد برؤية المحاسن وغض الطرف عن المعائب .
- تغافل عن الزلات والشائعات وتتبع السقطات وأخبار الناس .
- عليك بالمشي والرياضة والاهتمام بصحتك ؛ فالعقل السليم في الجسم السليم .
- ادع الله دائماً بالعفو والعافية وصالح الحال والسلامة .
من كتاب لا تحزن لعائض القرنى وربنا يسببلك الاسباب يا استاذة مى وتكونى انجح صحفية وزوجة وام فى الدنيا قولى امين
إرسال تعليق