السبت، مايو 16، 2009

الله.. الوطن.. الفلوس

منذ التتر وانت تقابل مقولات شهيرة مثل
It's not a personal issue, it's Just business
على خلفية موسيقى فريق The o'jays
Money.. Money..Money.. money من اغنية For the love of Money
لتتهيأ تماما لما سوف تقابله على مدار ساعة من ضغط وتوتر، وبعد 15 حلقة ستعرف من Fired ومن Hired :)
أشعر أنه لو كان هناك شعارا للبرنامج كان هيبقى "الله.. الوطن.. الفلوس"


The Apprentice أو "المتدرب بترجمته الحرفية" هو واحد من افضل البرامج على الاطلاق، تعتمد على اهم عنصر يبحث عنه اغلب الناس وهو العمل
ومع الازمة الاقتصادية والغلاء وكل الكلام ده يصبح العمل عامل جذب، الاجمد ان العمل واللي معتمد عليه البرنامج بيلعب على فئات مختلفة من الجماهير فلو كنت صاحب عمل او بتشتغل فعلا فانت اكيد هتبقى مخنوق وطقهان وهتحس بشعور الناس اللى بتتسابق في البرنامج
ولو كنت بتبحث عن عمل فجالك برنامج بيديلك احساس كانك بتشتغل بالظبط، فسواء كنت عامل او عاطل البرنامج ده لسيادتك.

البرنامج معتمد على مهمات يتم توزيعها على فريقين مكونين من مجموعة كبيرة من الافراد كل واحد فيهم كان مدير في شركة او صاحب عمل او مساعد مدير سلسلة فنادق او مطاعم ... الخ، وبيبدأ الفريقين يتنافسوا عشان يعملوا المهمة بافضل شكل ممكن
اللى بيفوز بيكسب جايزة مختلفة كل مرة، وكل مرة هتتعقد هتتعقد ملكش سبيل تاني
واللى بيخسر بيتطرد منه شخص ما.. في اوضة الاجتماعات اثناء طرد الشخص المغضوب عليه ستجد فرصة لسماع واحد من اجمل حوارات العمل الجادة والناشفة جدا.. هتعرف امتى تقفل عللي قدامك مناقشتة، وامتى تماطل، وامتى تجيب م الاخر
وامتى كمان لما تتطرد تتطرد بكرامتك بدل ما تخرج بمنظر زبالة.



يبقى ان البرنامج اغلب مهماته معتمدة على التسويق والاعلام، ربما لهذا الحد انا متورطة مع كل تفاصيله من التتر لحد النهاية.. ساعات بحس ان البرنامج عبارة عن دورة تدريبية مجانية فعلا..
عن جد البرنامج ده يستحق انك تشوفه ولو حلقة واحدة بس، ولو معجبكش ومتورطتش فيه وطلبت انك تشتغل مع ترامب كمان ابقى اقلب القناة يا سيدي.. ومش بعيد كمان في وسط البرنامج تكتشف انك كدة عمرك ما اشتغلت بجد، وانك عمرك ما قابلت مدير فاهم كمان.. بس الموضوع يستحق المحاولة.
البرنامج بيتذاع يوميا من الحد للخميس على دبي وان الساعة 5 ونص، وبيتعاد الساعة 1 تاني يوم

هناك 5 تعليقات:

Hassan يقول...

هو برنامج فكرته مختلفة وبيخلينا نشوف الفرق بين طريقة إدارة الأعمال عندهم وطريقة إدارة البظرميط عندنا !!!! عموما أنا شايف ان الفكرة أصبحت حمقاء وأنا عدو قديم لكامل برامج تلفزيون الوقع لكن طريقة عمل البرنامج دي فعلا تستحق المشاهدة ولو مرة واحدة

مي كامل يقول...

اولا عودا احمد يا حسن
:)))))
فعلا ليك وحشة فظيعة فظيعة فظيعة ع البلوج
D:
لو كنت اعرف ان موضوع الفلوس هيجيبك كنت وزعت جنيهات ع المدونة
D:
بجد لو اتفرجت مرة واحدة ع البرنامج ده هتتشدله جدا

hamada يقول...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
شروط المسابقة
1/ ..............................
2/ .............................
3/ ..............................
لا يوجد شروط الشرط الوحيد هو العمل الجيد , والعمل المحترم البعيد عن الإسفاف
المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
أرجوا التفاعل معنا في الجروب على العنوان التالي
http://www.facebook.com/group.php?gid=45202724108#/group.php?gid=78080770039

Tadwina يقول...

مرحباً
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/123

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع.

و لكم جزيل الشكر،
فريق عمل تدوينة دوت كوم.
http://www.tadwina.com

Hassan يقول...

أنا تابعت شبه موسم كامل منه مي ... الفكرة إني بحس في برامج تلفزيون الواقع دي إن فيها تخمة من الاصطناع والابتذال الغير طبيعي اللي إحنا مش ناقصينه .. ولما يتم إغرائي بأني حاشاهد حاجة من الواقع وأواجه تمثيل عبيط ل"واقع" بحس إن إضحك عليا !!!
عموماً تدوينتك سبب كافي لإعادة مشاهدة البرنامج