السبت، مارس 27، 2010

أنا أحب = أنا أعاني


ليه قصص الحب العظيمة بتتقاس بمدى المعاناة والأسى؟ ليه فيلم زي Love story من عمالقة الافلام الرومانسية، عبارة عن واحدة بتموت بالسرطان؟

ليه فيلم The Notebook الحبيبين بعد ما كملوا حياتهم مع بعض وخلاص كان ممكن ننتهي عند النهاية العادية عاشوا سوا وخلصنا، وضمنيا كلنا عارفين ان كل الناس هتموت يعني، بس لأ.. إزاي؟؟ ودي تيجي؟؟ لازم يموتوا في الاخر برضه، وحط شوية كآبة ياعم على الاحداث.

حتى الفيلم اللى تلات اربع البنات اللى اعرفهم بيموتوا فيه A walk to remember وتقريبا بيحبوه عشان البطلة قالتله مش هتيجي جمبي غير لما تتجوزني عشان باباها كان قسيس، بس المهم، برضه ماتت بسرطان وجوزها اتفحت عشانها.. وتقدر تلاحظ ان قصته لا تختلف كثيرا عن Love Story أو حتى فيلم Sweet November.

حاجة م الاتنين.. يا السرطان ما بيحلاش غير للحبّيبه، يا الحب مبيحلاش غير مع الكآبة والمعاناة والأسى، انما اتنين حبوا بعض واتجوزوا والحياة حلوة دي يبقى عليك وعلى ديزني ومشتقاتها، أو كدة هيبقى فيلم مقاولات بقى!!!!

انا فعلا مش فاهمة ليه الغم؟؟ لو عايزين يحطوا لمحات من الحياة الواقعية يا عم ماحنا غرقانين في الواقع، ارحمونا شوية من النكد.

هناك 10 تعليقات:

Mona يقول...

على رايك طرزان اتجوز جين وعادى
بس على فكره من قديم الازل وحكايات الحب متعلقه بالاسى والجرح
اغنيه سعاد حسنى الله يرحمها (صغيره على الحب(
عامله شرح وافى وكأنهم القدوه مثلا
بس تقريبا الفيلم اللى بيتنتهى بنهايه واقعيه بيبقى بعيد عن فكره المقاولات دى
علشان اصلا القصص اللى بتعمل(شغل) مع الجمهور هى اللى تبقى مأساويه كدا
انا عن نفسى بقيت مقضيها افلام رومانسيه فى قالب كوميدى عشان ضغطى ميعلاش وعلى رايك الواحد مش ناقص

mohamed يقول...

معاكي حق يا مي
مش ناقصاهم
طيب لما كان الواحد بيقرا شعر ويلاقيه كئيب نقول معلش دي تجربة الشاعر

أنما دول بيعملوا فينا كدا ليه
هو أحنا ناقصنهم

مي كامل يقول...

ايوة يا منى بالظبط انا كمان بقيت مقضياها كوميدي رومانسي D: لتجنب النكد والحاجات اليع دي
D:
ادخلي The Bounty hunter هيعجبك اوى

محمد.. على رأيك

عرفة فاروق عبد الله يقول...

مى

إن أنبغ ما فى الحياة الألم

قال احمد شوقى فى مجنون ليلى على لسان الأموى شيطان قيس فى مشهد النهاية

تفردت بالألم العبقرى وأنبغ ما فى الحياة الألم
ذلك ما يضفى على القصة متعة اذ أن ذلك يحزننا ويجعلنا نريد تغير النهاية
وذلك بالضبط مايريده الكاتب والمخرج أن يكون المتلقى فاعلا

كل الود

مي كامل يقول...

ولله وجهة نظر يا عرفة

ممكن بيخلينا لا اراديا نغير النهاية فعلا زي ما بتقول

جايز

مش بمزاجى يقول...

يقا انا كنت لسه بكلم حبيبى من شوية
اجى هنا بالصدفة
الاقى النهايات الماسوية دى
يرضى مين ده؟؟؟؟؟؟


ملحوظة

كلمة التاكيد
ياريت تتشال لانها بتدايق فعلا

Hany يقول...

hi Mai,
It's my first time to comment on some1's blog, but i guess this is bcoz the topic really attracted me.
I totally agree with ur notice that most romantic movies have a very sad ending. however, i think this makes them more and more effecting. As u know, they always say that love is not to love wat's good in a person, however it's to love wat's not good.Because every1 will love wat's good in a person, but who he loves the bad things as well is the real lover.It's the same in movies.u have just mentioned many great movies tht ended in a very dramatic ends, but can u mention how many movies have u watched tht ended in a happily ever ending and u still remember them?
i guess there is no comparison between the 2 endings.I guess film-makers r very aware of this.moreover it's been a very common thing since dawn of history.all the love stories that lived through time have sad endings.i even can't remember 2 lovers with a happy ending.It's like u can feel and u can see the real love by being hurt.and it's only this hurt that made u realize the real emotions inside u.u can say it's the same when some1 discovers how much he loves a gurl after he's away from her, after he can't reach her anymore, he can't get her.
Writers make u experience the good moments, so that u can remember them and cry for these sweet moments when u loose them.
I guess tht's all
good luck

طالبة مقهورة ..درجة أولى يقول...

مممممممممم
وكمان قصص الحب اللي اتخلدت كلها كانت النهاية الموت..زي روميو وجولييت

عمري ما فكرت من وجهة النظر ديه

بس يمكن لأن الحب اللي بيخلد هوا اللي بيكون فيه معاناة..او اللي بيأثر ف الناس اوي الحجات التراجيدية ديه

يمكن!!!!

Ahmed Elkas يقول...

خلينا نقول ان مش كل قصص الحب المشهورة سواء فى الافلام او فى القصص انتهت نهاية مأساوية لكن اللى انتهت بهذه النهاية هى الاسرع استحضارا للعقل لانها غير مألوفة زى ما اتربينا على "وعاشوا فى تبات ونبات وخلفوا صبيان وبنات "

مي كامل يقول...

اتفق معاك يا احمد تماما
تحياتي