الأحد، نوفمبر 28، 2010

يوم الباكابورتات المصرية

من المثير للكوميديا والقرف معا لو قلت اني هتكلم عن الانتخابات الجارية النهاردة او بكرة او الاعادة المعهودة الحد الجي
اصلي هقول ايه مختلف عن باقي الناس؟



الكل بيشتم وبيشجب وبيعترض
واللي بيعمل اكتر من كدة بيتضرب، لو رحت تنتخب هتضرب لو فكرت تنتخب على مزاجك
ولو مروحتش تنتخب هينتخبولك بالنيابة عنك.. ناس طيبين قوي يحبوا يريحو المواطن ويظبطوه ويفسحوه
الانتخابات.. مرمطتك اولا

المهم.. سيبنا م القرف ده.. بعيدا عن مين مترشح ومين جاله رشح يكشي كلهم يقعوا في معمل ترشيح، الا ان الانتخابات ليها جوانب مضيئة جدا، ممكن متكونش واخد بالك منها سيدي المواطن.. ولهذا، احب انصحك بارتداء نضاره فوشيا مسخسخ وقلع النضارة السودة الكبة الوحشة، وبص للانتخابات المصرية بنظرة اخرى.

  • بتروح شغلك مشي او بمواصلات او بعربيتك، ايا كانت المواصلة اللي بتستخدمها في الشوارع المصرية، بص بصة تأملية للشوارع وشوف الوشوش اللي حواليك والبوزات اللي المرشحين واخدينها لنفسهم، هتلاقي واحد صوره مالية كوبري مثلا وهو واقف ساند على طرف صورته وفيه نظرة تحدي (ولهذه النظرة مغزى) هتحس مثلا انه بيقولك بعينه اليمين (هتستجري متنتخبش؟) او بحاجبه الشمال اللي مرفوع (انا مش محتاج لصوتك يابن الـ ....... انا كدة كدة هاخدها).. طبعا كلهم هياخدوها باذن الله وبتمناهالهم من قلبي نفر نفر، بس من فضلك ارجع بص تاني ع الصور وفكر الصورة دي خدت وقفة ازاي وبصة ازاي وخلفية ازاي، كل حاجة معمول حسابها ومدروسة.
  • يوم الحد هو اول يوم انتخابات.. بذمتك.. عمرك شفت شوارع مصر فاضية كدة؟ ده هنا يابني، انت في هنا وانت مش حاسس.. اولا اولاد سيادتك اجازة  م المدرسة يعني توفير مصروف، وتوفير وقت للمذاكرة، وكمان مش الحد وبس ده الحد والاتنين والتلات كمان، ويمكن تبقى ابن محظوظة وتكون مدرسة عيالك حصل فيها قتل ودم وياخدولهم باقي الاسبوع اجازة لحد ما يلموا الجثث او يدفنوها.
  • مفيش شحاتين.. بذمتك ملاحظتش ان اليوم ده مفيش شحاتين؟ ركز تاني.. ايوة نفس الاشارة اللي انت بتعدي عليها كل يوم.. تمام.. فين بتاع المناديل؟ فين الست الغلبانة امو عيل؟ فين ابو ايد مقطوعة وابو رجل مسلوخه؟؟ طبعا مش هتلاقيهم.. يعني هما هيسيبوا ٥٠٠ جنيه او ٣ كيلو لحمة بيتوزعوا وهيستنو حسنة سيادتك؟؟ بالعقل يعني، ده يوم في السنة يا مواطن.. اليست الحياة اجمل بدون شحاتة في الاشارات؟
  • ركز تاني في الشوارع.. معلش هو يوم محتاج تركيز حبتين.. فاكر العربية المهببه بتاعة الونش اللي بتيجي تلبس على عربيتك؟ باختصار انت مش هتلاقي عسكري ولا امين شرطة فاضيلك اصلا.. كلهم بيأمنوا الانتخابات الشفافة النزيهه، وعلشان النزاهه والوجاهه فكل الامن بيأمن العملية اليوم ده، تركن بقى صف تاني صف تالت، صف عاشر حتى.. مش انت قضيتهم اليومين دول.. عزيزي المواطن لأول مرة هتركن براحة اهلك بدون كلابش.
  • قالك ايه قالك اه.. هو اليوم كله كدة، قالك فيه اتنين بيشروا دم من اول شبرا لحد التجمع، قالك ان ٣ من الاخوان نزلوا على سبعة من الوفد بالشوم، لا لا لا انت غلطان دول بتوع الغد هما اللي ضربوا الاخوان، وراحوا اتعالجوا في مستشفى كان بناها اول امبارح الحزب الوطني.. خد من ده كتييييييييييييييييير جدا، ويمكن الجديد كل سنة ان الفيديوهات والفيسبوك بقوا اب تو ديت.. يعني الفيلم يحصل، يتنقلك مباشر ع النت.. فيلم حي اكشن على كوميدي على تراجيدي، سمك لبن تمر هندي.. خلطة مصرية متميزة.
لا يسعني في النهاية سوى تذكر مشهد هتاف اصدقاء عادل امام في امير الظلام وهما بيقولو فريق البكابورتات.. باكابورتات.. باكابورتات.. عزيزي المواطن النهاردة يوم الباكابورتات.

السبت، نوفمبر 06، 2010

لو سالتك انت مصري

المصريين أنواع كتير جدا، كل واحد شايف مصر من وجهة نظره وبيتعامل معاها من خلال افكاره هو، وهي كمان بتتعامل معاه من خلال منظوره ده تمام.
اجب عن السؤال التالي ولو حتى بينك وبين نفسك، مش لازم ترد عليه في تعليق، واعرف انت انهي نوع من المصريين، عشان المرة الجاية لما الست نانسي تسالك لو سالتك انت مصري تقولي ايه، تعرف تجاوب بقلب.

السؤال: (وتذكر.. انت في القلب.. تكلم .. بلا خوف)


علشان تمشي أمورك في مصر، في مختلف الاماكن او المصالح.. بتعمل ايه من الامور التالية؟

١- بتمشي ومعاك كارنيه حزب وطني، او بتقول انك من الحزب الوطني
٢- بتمشي وف جيبك شريط فياجرا واللي بيعصلج بتغمزه بقرص
٣- بتمشي وف جيبك عشرات جديدة في باكو نضيف وبتوزع شاي الناس
٤- بتستعمل كارنيه شفهي تحت عنوان (انت مش عارف انت بتكلم مين) مع الاخذ في الاعتبار استعمال كل معارفك اصحاب المناصب

---------------------------------------------

اذا كانت اجابتك رقم ١
انت مصري ابن مصري وحقيقي انت في القلب، فدرايتك بابسط حقوقك المصرية للمواطنة في انك تبقى تابع للحزب الوطني نابع اكيد من ايمانك الشديد بأحقية المصريين في العدالة الاجتماعية واكل الملوخية بالتقلية..... الخ
م الاخر، انت عرفت من اين تؤكل الكتف، وخدت الحكاية من قصيرها وببساطة. بمعنى ادق.. على راي تامر حسني اخترت صح.

اذا كانت اجابتك رقم ٢
انت خبير في الشخصية المصرية الصميمة، وخاصة الشخصية المصرية الحالية اللي بقت تعبانة وشرقانه وحالتها عدم، وواضح انك بتروح مصالح حكومية كتير حيث الغالبية بقوا Expired واي حاجة زرقا بقت بتجذبهم تمام زي الفراش تجاه النور.. وانت عارف بقى اخرة الفراشة على النور ايه.. عموما الدنيا فانية والبقاء لله.. 
يرجى العلم بان من النادر تلاقي فتاة او سيدة بتستخدم الاختيار الثاني، فالغالبية هتكون من راجل لراجل زيه، من مواطن لمواطن اخوه.

اذا كانت اجابتك رقم ٣
انت مصري تقليدي بشع، لازلت تتعامل بالاساليب التقليدية العتيقة. نصيحتي لك عليك ابتكار وسائل متجددة ومبتكرة، ياعم شكّل وانت رايح، مرة كيلو رز، مرة كيلو لحمة، ولا مانع من كيلو طماطم مؤخرا فاسعارها جعلتها ملكة الخضروات مؤخرا.. عليك بمراجعة نفسك وحساباتك مرة أخرى بالتأكيد.

اذا كانت اجابتك رقم ٤
عليك دوما التأكد من استمرار علاقاتك مع هؤلاء الرتب، ولا داعي للاتصال بهم فقط وقت الزنقة، فعليك بتعزيز اواصل العلاقات الدبلوماسية بينك وبينهم، وعليك حساب المدة الزمنية لكل منهم بشكل دوري قبل الطلوع على المعاش فقط عشان تبقى في الـ Safe Side.


مسابقة الجمهور..
اذا كانت لديك وسائل اخرى مبتكرة لم نسمع عنها من قبل، برجاء اعلامنا بها فقط لنتبادل الثقافة المصرية المختلفة..

شكرا.. اخي المواطن.

سنووايت.. جو تو هيل


في ١٩٣٧ ظهر فيلم من شركة والت ديزني كان ظاهرة في وقتها، وأسطورة وحدوتة ما قبل النوم.. كل حاجة ممكن تنطبق على الفيلم ده.. الرومانسية، الطفولة، البراءة، السلام العالمي.. قول مصطلحات من تلك النوعية زي ماتحب
فيلم سنووايت والسبع أقزام أو بياض الثلج والأقزام السبعة زي ما تمت ترجمتها حرفيا واتنشرت في المكتبة الخضراء* بيحكي قصة في منتهى البساطة؛ اميرة والدها مات ومن وهي طفلة متسستمه على انها في انتظار الامير اللي هياخدها على الحصان الابيض
ولان الحياة مش دايما بمبى، فكل معاناة الاميرة دي ان زوجة ابوها اللي مات، مشغلاها عندها ومطلعة عينها، وكل يوم تصحى زوجة الاب وتسال المراية مين احلى مني يا مرايتي لحد ما تقولها المراية ان سنووايت هي احلى منك فتقرر انها تخلص منها.
الموضوع لا يتوقف عند هذا الحد، بالفعل تروح الاميرة مع صياد بايعاز من زوجة الاب ويحاول قتلها بس ضميره يصحى فيسيبها في الغابة وتقابل الاقزام السبعة وتحاول الملكة زوجة الاب قتل سنووايت بس تفشل وتموت في عاصفة قوية وسنووايت تنام سنين لحد ما الامير يصحيها وتوته توته خلصت الحدوتة

كل ده مش مهم اصلا.. اولا لان كلنا شفنا الفيلم او قرينا القصة او اتحكتلنا واحنا اطفال. المهم انك لو جيت تتفرج ع الفيلم وانت كبير هتلاقي كوارث.

  1. المباشرة الفظيعة في النصايح المريعة اللي تلاقيها طول احداث الفيلم، ان سنووايت بتعلم الاقزام السبعة ان مينفعش ناكل بدون ما نغسل ايدنا، ولازم نستحمى يا اطفال، ولازم نبقى طيبين ونضاف... الخ، ممكن تكون الاساليب دي كانت شغاله مع اطفال زمان، بس الاطفال بتوع دلوقتي اللي بيتفرجو على ماتريكس وعارفين توايلايت ومصاصي الدماء المحبوبين، مبقاش ياكل عقلهم الجو ده خالص.
  2. الانسة سنووايت كل هدفها في الحياة هو انتظار الامير ابو حصان؟؟؟ ياسلام ع الهدف والمصير، ويافرحتي ان النهاية قفلت عند انها اتباست ومشيت معاه، ايوة وبعدين؟؟ هل الامير طلع ابن ناس ولا ابن جذمه؟؟ طلع عينها ولا كان كويس؟؟ ولا حد يعرف، هي النهاية انها اتجوزت ولبست فيه، وقالك انهم عاشوا في (سعادة للابد).
  3. انا مشوفتش ان سنووايت طيبة ولا حنينه ولا كويسة، هي مكانتش اكتر من هبلة وساذجة سذاجة السنين، مفيهاش ادنى ذكاء ولا تمييز، يمكن عشان مخرجتكش من بيت ابوها وكانت متقوقعة؟؟ جايز.. يمكن كمان عشان كل تعاملاتها كانت مع الحصنة والحمام والعصافير فوجود البني ادمين كانت مش واخدة عليه!
اعتقد ان فيلم سنووايت لا يصلح لان تعاد مشاهدته بعد ١٩٥٠.. ده اخر صلاحيته، بعد كدة هتفقد احساسك بانه كارتون وهيجيلك ضغط عصبي من فكرة الاستكانة الشديدة اللي يمكن توصلك من الفيلم زي ما وصلتلي بالظبط، فكرة انك بترسخ في دمغة البنات تحديدا ان انتي واحدة هبلة في انتظار اللي ياخدك من حياتك او ياخدلك بحقك او يغير ظروفك.. وده عمره ما هيحصل.. انتي كدة في انتظار جودو يا امي.

انا من منبري هذا بقولك يا ست سنو.. انا مبقتش بحبك خالص ومش راضية عنك ولا عن موقفك صراحة.. ومش ناوية افرج عيالي على الفيلم ده واخرتك هتبقى قصة هحكيها بطريقتي انا ليهم.

-----------------------------------------------------------------
*مش عارفة لو حد كان بيقراها ولا لأ زمان بس هي كانت جنة ديزني العربية في أوائل التسعينات :) من عهدي يعني