السبت، فبراير 02، 2013

صباح جديد



صباح الخير

صباح الخير على هيبة الدولة اللي سقطت لما الإنسان مبقاش إنسان فيها
صباح الخير على كلاب مسعورة في الداخلية فقدوا إنسانيتهم من أول يوم عمل فيها

صباح الخير على مصري قرفان بقى قرفان بس لكونه مصري
صباح الخير علي أشكال مبتكرة من الإهانة وفقدان الكرامة

صباح محمل بالعار والخزي والغثيان
صباح جديد ليوم بائس اتعرت فيه دولة مبقالهاش قيمة

فصل جديد لدود معفن بيحاول يلاقي مكان جديد متقيح في جثة عشان يعيش عليه ويتغذى
عايز يكبر ويعلى.. لكنه مهما كبر وعلي هيفضل دود معفن.. هيفضل مكانه العيش في الجثث والأموات، هيفضل كائن متدني في السلسلة الغذائية لا يحترمه أحد ولا ينظر إليه أحد.. هيفضل مهمش وهيفضل ضعيف، ومهما كتر مش هيقدر يغير من تكوينه الدنيء

صفحة جديدة من إهانة وتعذيب ودم وسحل واغتصاب لكرامة إنسان كان نفسه يقول رأيه بس! كان نفسه حد يسمعه بس!
سطر جديد في صحيفة قهر وظلم هيسجلها ملك الشمال، وهيقراها يوم الحساب، وهيتمنى صاحبها وقتها لو كان تراب


نقطة ومن أول السطر

سطر جديد في صفحة جديد في فصل جديد في صباح جديد الأمل فيه بقى ليه علاقة طردية بمدى قدرتك كإنسان أن تتخلى عن إنسانيتك ومدى تحملك للإهانة والتعذيب.

تسقط دولة الظلم