وعجبي !!

قرادة بشرية

2012-01-14T21:21:00.001+02:00

تعرف القرادة؟؟ اه
قابلتها؟؟
لا
يبقى معرفتهاش
القرادة هم أمناء الشرطة في بلدنا

أي تشابه بين الحوار التالي وبين الواقع او بين الشخصيات والمواقف وبين الواقع هو تشابه مقصود ومتعمد الغرض منه الحذر والحيطة، وانك لو قابلت حد منهم اديهم بالجذمة على أم رأسهم.

(الحدث وقع في فبراير ٢٠١٠) قبل الثورة بعام تقريبا

الخلاصة.. خرجت من مكان ما على ميدان المساحة في الدقي ببص ع العربية لقيتها متكلبشة، بدور ع الظابط ولا أي حد، منين يا أخوانا من هنا..
دخلت كشك –الدم فاير في نافوخي- "أنا عربيتي متكلبشة"

أمين الشرطة "بإذبهلال رهيب" طيب ماحضرتك راكنه اكيد في حته ممنوع
- ماشي، أنا عايزة اعرف اشمعنى انا الوحيدة اللى عربيتي اتكلبشت، ما انا قدامي عربيتين مش متكلبشين.
- أكيد العربيتين دول هيئة دبلوماسية، وانتي عارفة يعني الدبلوماسيين منقدرش نيجي جمبهم
- ياسلام (اه يا جذمة يابن الجذمة)
- ولله دي البلد يا فندم
- طب انا عايزة امشي دلوقتي، تعالى فكهالي
- نعم؟؟ اتفضلي حضرتك هاتي رخصك وهبعت معاكي عسكري يفكهالك
- (ياتناكة أمك) طب استناني هنا
رحت جبت الرخص وجيت
- ادي الرخص، وبعدين دلوقتي انا اتحركت والكلبش في الكاوتش فالهوا في الكاوتش بتهيألي قل.. ولو الكاوتش لقيته نايم... (عليا النعمة لخرب بيت اللى جابوك)
- مممم طيب يا ستي تعالى يابني (بيقول للعسكري اللي هيفكلي الكاوتش)
(أثناء الطريق من مكتب الكلابشات للعربية)
- هو حضرتك مش من القاهرة ولا ايه؟؟ يعني مانتش عارفة ان المكان ده مفيش ركن فيه
- ياسلام.. يعني لو مركنتش في جراج ابقى اتكلبش براه؟؟ لاتكونوا منصصين مع الجراج
- ههههههه (بسماجة) لا بس يعني المنطقة دي ممنوع
- وريني يافطة الممنوع
- اهي (يافطة مدياني قفاها المفروض اخمن انها ممنوع)
- بذمتك دي يافطة ترضي ربنا؟
- الله.. مش اليافطة انا شفتها؟ يبقى اي حد في الشارع ممكن يشوفها؟
- ياسلام.. بعدين ادي العربية اللى قدامي مش متكلبشة اهي، ومدني مش دبلوماسي
- يعني عايزة ايه؟
- تكلبشوها.. اشمعنى انا
- الله.. عايزاني نكلبشها؟
- آه
- ليه؟
- غاوية أذية، انا واحدة غاوية أذية.. انت مالك؟
- (مزيج من الاذبهلال والابتسام السمج)..
- وبعدين المساواة في الظلم عدل، حطله كلبش
- هو حضرتك مظلومة كدة؟
- اه طبعا.. راكنة في حته مش باين فيها الممنوع وقدامي عربيات مش متكلبشين عشان دبلوماسيين.. ابقى مظلومة ولا مش مظلومة؟؟ تصدق؟؟؟ حسبي الله ونعم الوكيل فيكو
- الله الله انتي هتدعي علينا كمان
- طبعا
- ولله حضرتك دمك شربات
- طب خلصني.. هيحصل ايه دلوقت؟؟
- احنا هنفك الكلابش، وتدفعي 20 جنيه وتاخدي وصل بيهم، ويا اسحب الرخصة يا تدفعي 100 جنيه غير العشرين جنيه وتاخدي وصل بيها وتروحي.
- نعم؟؟ تسحب الرخصة؟؟ ليه ان شاء الله
- مش انتي راكنة في الممنوع؟
- وهو ركن الممنوع سحب رخصة؟؟
- او تدفعي 100 جنيه
- ده من امتى بقى الكلام ده؟
- ده في القانون
- قبل التعديل ولا بعد التعديل؟
- ..... (اذبهلال)
- وهو مين اصلا اللي حط القانون ولا وافق عليه؟
- .....(اذبهلال)
رجعنا ع المكتب تاني عشان يديني الوصل
- ها.. تحبي سيادتك تدفعي 120 جنيه وتاخدي وصل ولا 20 جنيه واسحب الرخصة.
- لا انا مش هدفع غير العشرين جنيه
- (صمت وتفكير)
- طب عشان ابتسامة حضرتك دي بس انا هديكي الوصل بعشرين جنيه وهديكي الرخص بدون سحبها ولا حاجة
- ولله؟
- اه
- طب وعشان خاطر الصحافة؟
- صحافة!!!
- اه صحافة.. هو انا مقولتلكش اني صحفية؟ (مع العلم ان مكتوب في الرخصة بدون عمل.. بس الجهل وحش)
- (للعسكري اللي بره) ياعم دي طلعت صحفية ياعم، عشان خاطر الصحافة (وهو بيمد ايده في جيبه وبيطلع العشرين جنيه) ندي سيادتك الرخص والعشرين جنيه وكأن شيئا لم يكن.
- ولله طب دي حاجة عظيمة اوى
- بس المهم ملاقيش حاجة اتنشرت بكرة؟؟
- مممممم افكر مقدرش اوعدك
- طيب تاخدي عشرين جنيه من جيبي غير اللى معاكي وتوعديني ......
- (بأعلى حس عندي) ... رشششششششششششششششششششششوة، انت بترشيني؟؟؟؟؟؟؟؟ هي الأوضة دي متراقبة ولا اييييييييييييييييييييييييييييييييييييه؟
- لا انا مقصدش يعني، احنا بس مش عايزين نزعلك وبعدين متجيش المنطقة هنا تاني، مش عايزينك تزعلي مننا
- (ابتسامة سمجة مني انا بقى)
- خلاص يا فندم؟؟ اهم حاجة اوعى تنشري بس
- (بمنتهى السماجة) أفكر وابقى اشوف

حنين إلى...

2011-12-31T18:03:00.000+02:00

البعض أنعم الله عليه بنعمة النسيان، والبعض الآخر يتجرع ذاكرته بحنين مفرط لما كان عليه، وبين تلك الفئة والأخرى من يسارعون في الوثب بين صفحات الماضي والحاضر على حذر، بينما هناك الفئة المتأقلمة على كل وأي شيء ولهؤلاء كل التقدير والاحترام، لست أدري كيف تفعلون ذلك حقا!!

ليس الحنين شرطا لإعلان نقمتك على واقعك الحالي، فصدق أو لا تصدق قد تحن لوضع أسوأ مما أنت عليه حاليا، فقط لأن في هذا الوضع ما يشتاق إليه حالك، هل تحن لذكرى الحب الأول؟ رغم معاناتك فيه ومعرفتك بنهايته المأساوية؟

٢٠١١ كان عاما فاصلا على كافة المستويات.. لا أحن لما قبله قدر حنيني لتلك الطفلة التي كنت عليها، وأحن لعامين مضوا كنت فيهما لا أعبأ بالحياة على الإطلاق، كنت أنعم باتخاذ قرارات غير مدروسة لا يترتب عليها أي نتائج سلبية، حرية الانطلاق في حياة عبثية قد تفضي بك إلى أي طريق وارد وممكن.. واحتمالات لا نهائية في كافة القرارات. رفاهية التغيير وقتما تشاء أينما تشاء، رفاهية الاختفاء وقت ما تريد، متعة الهروب من البشر والأماكن حينما تضيق بك المرحلة، فتتنقل بين تلك المرحلة وآخرى في سلاسة تامة تشعر فيها بمدى خفة الحياة

تتمتع ببساطة العيش دون أية تعقيدات.. باسترخاء عقلك وإيقاف تلك الأفكار المسترسلة إليه، تتمتع بفكرة مجنونة تهبط على رأسك فجأة فتقوم بها فجأة

نعم.. أحن إلى هذا الشعور بالخفة.. أحن رغم نضوجي وشعوري بالتغير القوي منذ فترة خاصة مع الفطام الذي وقع لنا جميعا في ٢٠١١، ورغم حنيني هذا، فأنا ممتنة كثيرا لعام ٢٠١١ بشدة.

فقط لو أن ٢٠١٢ تحتوي على جرعات جنون مكثفة من حين لآخر تكسر هذا النضوج القاتل.. فأنا لم أعتد على هذا الإحساس الرصين ولا أود الاعتياد عليه.

عنوانا في التحرير

2011-11-23T10:19:00.000+02:00

صباحنا نادى

و صباح الندل مش باين

يا ابو كاب و دبوره بقى دمى عليك هاين

ده يمكن نكون اصحاب .. اخوات .. او يمكن متعرفنيش

بس انا عارف لو تعرفنى بسلاحك متضربنيش

سلاحك ده ليا امان مش ضرب و اهانه

يا مصر احنا ولادك ولا انتى بيعانا

فجاه بقينا ابطال الناس تحيينا

مظاهره و التانيه الناس تنادينا

و فجاه قلبوا علينا و لعنوا اسامينا

و منهم اللى حاول بالجزمه يدينا

بتقولو ضحكوا علينا ؟

انتم بقى فاهمين

ما كنتم لسه معانا و جنبنا نايمين

و ايد فى ايد شابكين مسلم و مسيحيين

طلعنا خونا و عملاء و اخوان و ايرانيين

و اجنده حمرا و خضرا و كتاب و كراستين

ما تنزل تشوف بالعين

اسالهم انتم مين

و ليه كده قاعدين

جعانين و مش خايفين

و على البرد ليه صابرين

و فى وشهم واقفين

اسالهم انتم مين

هتلاقى رد جماعى يا عم مصريين

والله مصريين

خايفين على بلادنا

على الظلم مش راضيين

لدم كل شهيد فاكرين و مش ناسيين

رجاله ستات اعمارنا مختلفين

فينا تلاقى شباب و فينا مسنين

تجمعنا كلمه مصر

و عنوانا فى التحرير

* انا مش عارفة القصيدة لمين.. ياريت اللي يعرف يقولي

أبو النكروفيليا

2011-11-18T14:04:00.004+02:00

هل فكرت في مشاهدة فيلم الإرهاب والكباب بعد ثورة يناير 2011 ؟ (مع التحفظ على إن بطل الفيلم عادل إمام معادي العدل والحرية ونصير السلطة والكرسي والظلم) لو مفكرتش.. فكر بجد وجرب تشوفه وتسمع الحوار اللي فيه من تاني.

محمد المخزنجي في مقال عبقري كتبه أمس في جريدة الشروق (اقرأ المقال هنا) كتب عن النكروفيليا في مصر.. كتب فيه إن اريك فروم اللي عرف النكروفيليا بأنها "انجذاب عاطفي تجاه كل ماهو ميت ومتفسخ وسقيم فهي الشغف بتحويل ماهو حي إلى غير حي وبالتدمير من أجل التدمير"

هي وسعت شوية من المخزنجي لما عكس المفهوم ده على الهتافات اللي بتقول نموت نموت وتحيا .... أو .... حتى الموت، بس هو شايف إنها دلالات على نكروفيليا في لاوعي المجتمع المصري مؤخرا.

انا شايفة اننا ممكن نتضامن مع المخزنجي فعلا ونقول الارهاب الارهاب لنخلي عيشتكو هباب.

دي مش تريأة.. انا فعلا بتضامن معاه، ليه نموت نموت ويحيا....، ليه مفيش تشبث بالحياة، أيوة هنخلي عيشتكو هباب، مش هنموت ومش هنسيبكوا في حالكو.. محتاجين تغيير الشعارات إلى حالة من الإيجابية وحب الحياة والأمل.

كفاية اكتئاب ويأس .. وفعليا مش لازم نسيب الحياة لذوي السلطة والعسكر يعيشوها بالطول والعرض ونعمق احساسنا بالخوف واننا على هامش الحياة

كفاية فكرة امشي جمب الحيط تسلم.. عمرك ما هتسلم، امشي جمب الحيط تتضرب بالشبشب زيك زي الصرصار بالظبط..

اقلع غماك يا طور وارفض تلف.. اكسر تروس الساقية واشتم وتف.

فكر مرة تانية، واتفرج على الارهاب والكباب من تاني.. هتحس كإنك بتشوفه أول مرة.

آن الآوان ترحلي يا دولة العواجيز

2011-05-25T19:59:00.000+02:00

ايادي مصرية سمرا ليها في التمييز

ممددة وسط الزئير بتكسر البراويز

سطوع لصوت الجموع شوف مصر تحت الشمس

آن الآوان ترحلي يا دولة العواجيز

عواجيز شداد مسعورين اكلوا بلدنا اكل

ويشبهوا بعضهم نهم وخسة وشكل

طلع الشباب البديع قلبوا خريفها ربيع

وحققوا المعجزة صحوا القتيل من القتل

اقتلني قتلي ما هيعيد دولتك تاني

بكتب بدمي حياة تانية لأوطاني

دمي دة ولا الربيع الاتنين بلون اخضر

وببتسم من سعادتي ولا احزاني

تحاولوا ما تحاولوا ما تشوفوا وطن غيره

سلبتوا دم الوطن وبشيمته من خيره

احلامنا بكرانا اصغر ضحكة علي شفة

شفتوتش الصياد يا خلق بيقتلوا طيروا

السوس بينخر وسارح تحت اشرافك

فرحان بيهم كنت وشايلهم علي كتافك

واما اهالينا من زرعوا وبنوا وصنعوا

كانوا مداس ليك ولولادك واحلافك

ويا مصر يا مصر آن العليل رجعتله انفاسه

وباس جبين للوطن ما للوطن داسه

من قبل موته بيوم صحوه اولاده

ان كان سبب علته محبته لناسه

الثورة فيضان قديم

محبوس مشافوش زول

الثورة لو جد متبانش في كلام او قول

تحلب وتعجن في سرية تفور في القلب وتنغزل فتلة فتلة في ضمير النول

متخافش علي مصر يابا مصر محروسة حتي من التهمة دي اللي فينا مدسوسة

ولو انت ابوها بصحيح وخايف عليها اي تركتها ليه بدن بتنخره السوسة

وبيسرقوكي يا الوطن قدامنا عيني عينك

ينده بقوة الوطن ويقلي قوم

فينك ضحكت علينا الكتب بعدت بينا عنك

لولا ولادنا اللي قاموا يسددوا دينك

لكن خلاص يا وطن

صحيت جموع الخلق قبضوا علي الشمس بايديهم

وقالوا لا من المستحيل يفرطوا عقد الوطن تاني

و الكدب تاني محال يلبس قناع الحق

بكل حب الحياة خوط في دم اخوك

قول انت مين للي باعوا حلمنا وباعوك واهانوك

وذلوك ولعبوا قمار باحلامك

نيران هتافك تحرر صحبك الممسوك

يرجعلها صوتها مصر تعود ملامحها تاخد مكانها القديم

والكون يصالحها عشرات السنين تسكونوا بالكدب في عروقنا

والدنيا متقدمة ومصر مطرحها

كتبتوا اول سطور في صفحة ثورة

وهما علما و خبرة مداورة ومناورة

وقعتوا فرعون هرب من قلب تمثاله

لكن جيوشه مازالوا بيحلموا ببكرة

صباح حقيقي ودرس جديد اوي في الرفض

اتاري للشمس صوت واتاري للارض نبض

تاني معاكم رجعنا نحب كلمة مصر

تاني معاكم رجعنا نحب ضحكة بعض

مين كان يقول ابننا يطلع من النفق

دي صرخة ولا غني ودة دم ولا شفق

اتاريها حاجة بسيطة الثورة يا اخوانا

مين اللي شافها كدة مين اول اللي بدأ

مش دول شاببنا اللي قالوا كرهوا اوطانهم

ولبسنا توب الحداد وبعدنا اوي عنهم

هما اللي قاموا النهاردة يشعلوا الثورة

ويصنفوا الخلق مين عنهم ومين خانهم

يادي الميدان اللي حضن الذكري وسهرها

يادي الميدان اللي فتن الخلق وسحرها

يادي الميدان اللي غاب اسمه كتير عنه وصبرها

ما بين عباد عاشقة و عباد كارهة

شباب كان الميدان اهله وعنوانه

ولا في الميدان نسكافيه ولا كابتشينو

خدوده عرفوا جمال النوم علي الأسفلت

والموت عارفهم اوي وهما عارفينه

لا الظلم هين يا ناس ولا الشباب قاصر

مهما حاصرتوا الميدان عمروا ما يتحاصر

فكرتني يا الميدان بزمان وسحر زمان

فكرتني بأغلي ايام في زمن ناصر

شايل حياتك علي كفك صغير السن

ليل بعد يوم المعاناة وانت مش بتأن

جمل المحامل وانت غاضض

بتعجب امتي عرفت النضال

اسمحلي حاجة تجن

اتاريك جميل يا وطن مازلت و هتبقي

زال الضباب وانفجرت باعلي صوت

لا حركتنا نبتسم ودفعت انت الحساب

وبنبتسم بس بسمة طالعة بمشقة

فينك يا صبح الكرامة لما البشر هانوا

وأهل مصر الأصيلة اتخانوا واتهانوا

بنشتري العزة تاني والتمن غالي

فتح الوطن للجميع قلبوا و احضانوا

الثورة غيض الامل وغنوة الثوار

الليل اذا خانه لونه يتقلب لنهار

ضج الضجيج بالندا اصحي يا فجر الناس

فينك يا صوت الغلابة وضحكة الانفار

وأحنا وراهم أساتذة خايبة

تتعلم ازاي نحب الوطن وامتي نتكلم

لما طال الصدي قلبنا ويأسنا من فتحه

قلب الوطن قبلكم كان خاوي ومضلم

أولنا في لسة الجولة ورا جولة

دة سوس بينخر يا ابويا في جسد دولة

ايوة الملك صار كتابة انما ابدا

لو غفلت عينا لحظة يقلبوا العملة

لكن خوفي مازال جوة الفؤاد يكبش

الخوف اللي ساكن شقوق القلب ومعشش

واللي مش راح يسيبه ولسة هيبقوا

وهيلاقولهم سكك وببان ما تتردش

وحاسبوا اوي من الديابة اللي في وسطيكم

والا تبقي الخيانة منك وفيكم

الضحك علي البق بس الرك علي النيات

فيهم عدوين اشد من اللي حواليكم

عبد الرحمن الأبنودي

أنا مبحبش قصايد الابنودي صراحة انما اعتقد ان دي واحدة من القصايد اللي بعد سنين ممكن الطلبة يدرسوها على انها اعظم قصايد الثورة ويحفظوها كمان

2 كرسي و 1 ترابيزة و .. صلحـــــــه !

2011-02-07T03:24:00.000+02:00

اعتدت دوما شرب كوبا من الشاي باللبن .. ولمن لا يعرف فهناك اختلاف كبير فى طعم الشاي باللبن مابين الكوب والمج .. وانا واحد حريف شاي باللبن وعارف .. عفوا فأنا دائما اعاني من أني أتنقل دوما بين المواضيع ولكن لا تخف فسرعان ما ألف ألف ثم أعود لموضوعي .. المهم .. أفرغ من ذلك الكوب المتين ثم ارتدي لاذهب الى الجريدة ومرورا بأبو عماد البواب وزوجته -اللى ناسي اسمها دلوقتي- ثم تصبيحة على عماد ذات نفسه -يعني هو ملوش نفس- .. ثم "تاكسي .. وسط البلد ياريس .. تمام" .

ادخل الى مكتبي واجلس وكالعادة أجد التليفونات تنهال عليّ

" رئيس التحرير حيخرب بيتك لو مبعتش المقال حالا"

"حالا .. حالا .. "

وابدأ في كتابة ماجلست أفكر فيه طوال الليل ثم..

الشاي باللبن وحياة والدك يا عم مرسي .

نحن جميعا الآن في انتظار الشاي باللبن .. لا تقلق فعم مرسي مجهزه من بدري يمكن من قبل ما اوصل لذا لا تقلق

و أدي الشاي ..

ثم أشرع في الكتابة ..

"قديما قالوا السمك الكبير بياكل السمك الصغير وحديثا تأكدوا ان السمك الكبير بيقرقش السمك الصغير مش بياكله بس .. والسمك الكبير هي الدول الكبيرة .. الكبيرة أوي أوي أو بمعنى آخر اصحاب الكراسي والترابيزات .. انه مفهوم قديم الازل "الكراسي والترابيزات" .. عندك مثلا زمان كان الاحتلال الانجليزي اول ما حط قدمه في مصر قام المصريون بمظاهرات وثورات وحرق وتدمير وخلافه ثم فكر الانجليز ما العمل ؟ وبدأت النظرية للتطبيق .. "نقعد ونعمل مفاوضات ونتكلم ونشوف انتوا عايزين ايه " قالها أحد الانجليز .. قعدنا واتكلمنا ولم نخرج بجديد سوى انهم ضيعوا لنا قليلا من الوقت في كلام مش جايب تمنه .. ثم مظاهرات مرة اخرى .. وهكذا فطنت الاسماك الكبيرة الى ان اى كرسيين وترابيزة بيجيبوا كلام ومفاوضات ويجيبوا وقت فاضي يرغوا فيه وبالتالى نقع في ثغرة تضييع وقت كان من الممكن استغلاله في فعل أي شيء يؤثر .. وبالطبع لم يرق الى الانجليز مبدأ أن يقوم العرب بفعل شيء يؤثر والا فلما تلك الترابيزة والكرسيين ؟؟

راحوا فلسطين هما هماهم السمك الكبير ده .. وطبعا عملوا مظاهرات وطبعا نفس الكرسيين والترابيزة ونفس الكلام وهلما جرة.

ولما عرفنا احنا بقى بعد سنين ان المفوضات اللى بيجرونا ليها مامنهاش فايدة .. بقوا يجيبوا الكرسيين والترابيزة ونبصلهم بكل القرف ونقول لا مش قاعدين ومش لاعبين وعاوزين نروّح .. طلعوا بالجديد بقى ، ألا وهو عملية سلام .. ها عاجبك ولا لأ؟

كويس .. يعني موافق .. روح يابني هات كرسيين وترابيزة حلوة كدة للباشا وادينا قعدنا تاني على نفس الترابيزة والكرسيين .. بس المرادي لو معجبكش السلام .. يبقى بنفس الكرسيين والترابيزة حتلاقيهم فى دماغك .. يعني خلاص .. اتربط مصيرنا بمصير العمر الافتراضي لنفس الكرسين والترابيزة .. بيني وبينكوا مش لاقي حل للكرسيين والترابيزة فى اننا نتخلص منهم ازاي .. انما على الاقل كفاية قعاد ع القهاوي لحد كدة..

ان لم نكن قد مللنا الكرسيين والترابيزة فلا شك انهم ملوا منا .."

انهيت المقال بجملة للخاتمة ثم ارسلتها لرئيس التحرير ..

بعد ساعة ونصف كنت فى طريقي للمنزل .. نزلت من التاكسي ثم ازيك يا عماد؟ الله يسلمك يابو عماد –يعني هو ملوش ....-

ثواني يابيه كنت عايزك في موضوع مهم

خير يابوعماد ؟

سكان العمارة كانوا وصوني اقولك اننا بنلم فلوس عشان نعمل اسانسير للعمارة باذن الله

ممممممممم .. شوف يابوعماد بسيطة اوى .. احنا نقعد ونتكلم .. وادى الكرسيين والترابيزة .. قولى بأه تاني ..

عايزين اييييييييييييييييه؟

------------------

مقال كتبته منذ ٢٠٠٤.. ولكن توقيته الحالي، وجدته ملائما لحاجة في نفسي

ولو هغير عنوانه ليناسب الوقت الحالي.. هسميه دعوة للتحاور والتفاوض والحوار

ديزني تنضج بـ Tangled

2010-12-29T20:02:00.002+02:00

اعتدنا مشاهدة افلام والت ديزني بشخصياتها النمطية خاصة اذا كنت ستشاهد فيلم يتضمن قصة الاميرة والامير او الأمير والأميرة الغامضة التي ستكتشف في نهاية الأحداث أنها الأميرة.. إلى اخر تلك الصور النمطية، إلا أن ديزني منذ أن قدمت The Princess and The Frog وقد كسرت تلك النمطية تماما

فجأة وبدون سابق انذار تحولت البطلة من الشخصية السطحية التي لا تحلم الا بالامير ذو الحصان الابيض الى فتاة عاملة سمراء اللون (وهو جديد تماما على ديزني) تتحول لشخصية ضفدعة قبيحة لتعشق روح البطلة فضلا عن الشكل الجميل المعتاد لكافة رسومات ديزني.

وخلال ٢٠١٠ عادت ديزني من جديد لتدق على نفس الوتر، وتحطم كافة صورها النمطية وشخصياتها المعتادة، فقدمت فيلم Tangled في أبهى صوره.

تدور الأحداث حول زهرة سحرية تعطي من يرعاها الشباب الدائم، وتلك الزهرة تحتفظ بها سيدة ما وجدتها بالصدفة في إحدى الغابات وأبقتها تلك الزهرة في يافعة وجميلة دوما.

ولكن تتغير الأحداث بعد حمل الملكة ومرضها الذي يدق ناقوس الخطر على الملكة والجنين في وقت واحد فيسعى الناس للغابة باحثين عن تلك الزهرة التي قيل أن فيها الشفاء.

بالفعل يعثرون على زهرة السيدة العجوز ويأخذونها ويقدمونها للملكة لتشفى تماما وتنتقل إلى الأميرة الرضيعة كافة قدرات الزهرة خاصة في شعرها الطويل ذو القدرات الخارقة، وتكتشف ذلك السيدة العجوز لتختطف الأميرة وتربيها بنفسها لتبقيها تحت أعينها، ويظل الملك والملكة يبحثون عن ابنتهما لتتوالى الأحداث من هنا.

إذا كنت من متابعي ديزني فستلاحظ بسهولة كافة الاختلافات التي إن لم تكن ديزني قد اعلنت انها منتجة الفيلم لتصورت ان الفيلم Spoof على افلام ديزني.

فالمفاجأة الأولى أنه ليس هناك أمير، وليس من أصحاب الجياد البيضاء، بل إن بطل القصة هو شاب يتيم يعيش على السرقة والنصب وعدوه الأول هو الحصان الابيض الذي يتعامل كل منهما مع الاخر على انه العدو اللدود له.

حتى الأميرة التي لا تعرف من تكون حقا، فهي تحلم دوما بالخروج للحياة واكتشاف الخبرات الجديدة، وليس حلم الفارس ذو الجواد الابيض العتيق.. بل تؤكد كثيرا على أحلامها المختلفة التي تريد تحقيقها وعلى ضرورة أن تمتلك حلما في حياتك أو بمعنى أدق هدفا للحياة

حتى (الإفيهات) في الفيلم جاءت غير تقليدية بالنسبة لديزني فحين تعلن الأميرة عن اسمها (رابنزيل) يسخر منها الشاب ويرد God Bless you أو يرحمكم الله كما لو أن اسمها عبارة عن عطسة وليس اسما محترما.. هل يمكنك تذكر أي أميرة من أميرات والت ديزني تم السخرية من اسمها -حاشى لله-؟!

كذلك بالنسبة للسيدة العجوز الشريرة، فمثلها مثل كل الناس ليست تسير على وسادة من الشر طوال الوقت، وإنما أحيانا ما ترى جانبها الطيب في رحلة تقوم بها تستمر لمدة ٣ أيام تلبية لرغبة ابنتها الأسيرة.

حتى الأشرار والمجرمين الذين تقابلهم الأميرة في الحانة، سرعان ما تبرز جانبهم الآخر للتأكيد على ان كل الاشخاص يتمتعون بجانب سيء وحسن، وليس هناك من شر مطلق أو خير مطلق وهي مبادئ لم تفكر ديزني من قبل في تقديمها بل كانت تعمد إلى التركيز على الشخصية البيضاء أو السوداء فقط.

نهاية الفيلم لا تزال تقع تحت ثقافة ديزني والتي -في اعتقادي- لا يمكن تغييرها، فالفيلم موجه للأطفال ولن تجرؤ ديزني على تقديم فيلم ذو نهاية سوداء للأطفال.. فهي تعتمد على الواقع والحياة ليدرك الأطفال حقيقة الحياة البعيدة عن اللون الوردي.

الفيلم بشكل عام جيد جدا، ومبهر فعلا نظرا لأن القصة المقدمة كذلك لم يتم تقديمها من قبل وبالتالي فكل ما تراه يعد جديدا على عينك، كما تتمتع الرسوم بالإبهار كعادة ديزني.

يبقى عيب الفيلم الوحيد أنه لم يكن له أي داعي لوجود تقنية الـ 3D فهي لم يتم استغلالها بشكل جذاب ولم تضف إلى الفيلم أي عنصر جديد.

احنا في عصر البلطجة يا فندم

2010-12-14T23:09:00.000+02:00

مرحبا بك عزيزي الانسان في عصر البلطجة

هو حقبة زمنية تلي عصر الكرامة بسنوات عديدة، صحيح ان بعض الاشخاص لم يتمكنوا بعد من التأقلم على ملامح العصر الجديد، الا اننا لنمكنك من مواكبة العصر الجديد، نحيطك علما بملامح هذا العصر.

تنزل من بيتك تلاقي عربية كاسرة على عربية تانية، وتلاقي اللي كاسرة نازلة منها واحد بيه او واحدة شرشوحة حتى وبمنتهى اللاتربية بالزعيق والشخيط والالفاظ القبيحة بتهزأ العربية المكسور عليها، ولو نزل من العربية المكسور عليها حد ابن ناس ومؤدب ومحترم يبقى هيتكسف ويعرف انه اتفضح فضيحة السنين ويلم بعضه ويمشي.

لك ان تدرك ان الكاسر هو اللي كسر عين المكسور عليه، ده اذا مقدرش ياخد منه فلوس كمان او اعتذار ع الماشي.

احنا في عصر البلطجة يا فندم

مش هتنزل من بيتك، انت قاعد في بيتك بتتفرج على فيلم ابو علي مثلا، ركز في المشهد لما ابو علي جه ضرب الراجل الميكانيكي اللي كان بيضرب العيل الصغير، والميكانيكي قاله انا اسف يا باشا انا اسف يا بيه، "فجأة بقيت بيه عشان بضربك؟".. صحيح.. شوف الموقف ده عدى قدامك كام مرة؟؟ كام بيه بقى بيه وباشا وسيد البهوات كلهم عشان ايديه طويلة ع الناس؟

احنا في عصر البلطجة يا فندم

تابعت الانتخابات الاخيرة؟ الموضوع بقى لا ديمقراطية ولا برامج انتخابية ولا اي حاجة خالص، شدني جدا فيديو من الفيديوهات لواحد واقف بسلاح ابيض وبيقول للناس محدش هينتخب النهاردة، قالوله ليه؟؟ وانت مالك هو انت السلطة؟ قالهم اه انا السلطة بقى.

ولله سواء هو السلطة ولا مش هو السلطة، لما نيجي لدم وسلاح يبقى السلطة للي قادر يعور.. مهما الزمن اتطور ولا المجتمع اتمدين برضه يفضل غريزة الانسان في الحفاظ على نفسه هي الاساس.

ويكفي ان تعمل سيرش على بلطجية الانتخابات ٢٠١٠ عشان تتفرج على سيرك دموي

احنا في عصر البلطجة يا فندم

افتكر مشهد في رواية ان تكون عباس العبد لما كان البطل بيعدي الشارع وكان وقت مرور موكب سياسي، فالعسكري بيشاورله يبعد عن الطريق، البطل معندوش اي حاجة يخسرها هو ضايع وصايع ومنيل بنيلة

قاله اللهي يجعلك قرطاس في امتحان سواقة لواحد احول

ربنا يسهلك غور في داهية

ساعتها زميل العسكري قاله، ياعم سيبه ده شكله مسنود

صح كدة.. هو ده.. كل ما تقل ادبك للاسف، بقى يتعملك حساب

تسكت وتعمل ابن ناس، يتداس عليك بالمداس

بص بصة اوسع حبه، وقديمة تلات حبات، اصله مثل قديم فحت يعني، استيطان اسرائيل لفلسطين هو استيطان تابع لنفس المبدأ.. هو مبدأ واحد وقيس عليه كل التصرفات بمختلف المستويات.

احنا في عصر البلطجة يا فندم

مين يبلطج على مين، واللي يبلطج ويشلأ ويقل ادبه هو اللي ياخد مش حقه بس، ده ياخد اللي مش حقه كمان

عزيزي المواطن، لا تكن بلطجيا طبعا، ولكن لا تكن ابن ناس امام البلطجية، حاول تكون خليط..

ومرحبا بك في عصر البلطجة.

---------------------

مما سبق اليك مجموعة من الارشادات السريعة لتواكب بشكل فعال ملامح العصر الجديد:

لو حد كسر عليك بالعربية، اصغرله، اصغرله جامد اوي، متسمحلوش انه ينزل ويهلل، انزل هلل قبله، او امشي بعربيتك سريعا ولا تديله فرصة يفتح بقه.

اللي يزمرلك زمارة مزعجة وطويلة، قفل عربيتك وزمرله زمارة اطول واكثر ازعاجا، عرفه انه مش سيد الشارع بروح امه

في الشغل اللي يعلي صوته عليك، علي صوتك على امه، وطالما انت مقصرتش في شغلك والشخص هو اللي بدأ بالتطاول من حقك ترد عليه

علم ابنك انه ميسيبش حقه، ولما يبقى حد ييجي يعتذرله يبقى يعفو عنهم، علمه ميقبلش ان نفسه تكسّر

لو كنتي بنت وماشية في الشارع، اللي يقولك كلمة اشتميه، حتي لو هتجري بعدها، بس اشتميه، عرفيه انك قرفانه من امه

ولو حد اتحرش بيكي في مواصلات افضحيه، علي صوتك وجعري ولمي الناس، صدقيني اللي قالك انك كدة بتفضحي نفسك ده عصره انتهى، لو مفضحتيش الشخص الواطي ده هيفضل يعمل كدة

ممكن اقعد ارص ارشادات الى ما لانهاية، بس المبدأ واضح ومحدد، متبقاش بلطجي لاننا انضف من كدة، بس متقبلش كسرة عين، ولا كسرة نفس، واعرف البلطجي وعلم عليه، في الاول والاخر لو هو كان عايش بشكل آمن مكانش اصلا لجأ للبلطجة.. هو من جواه اضعف منك بكتير.

-----------------------

الصورة من فيلم Gangs of Newyork | عصابات نيويورك.. العصابات زي ماهي، لبسو برانيط، جينزات، حتى لو لبسوا طرح، مليون شكل وشكل، بس مبدأ العصابة والبلطجة والتخويف واحد

يوم الباكابورتات المصرية

2010-11-28T23:11:00.001+02:00

من المثير للكوميديا والقرف معا لو قلت اني هتكلم عن الانتخابات الجارية النهاردة او بكرة او الاعادة المعهودة الحد الجي

اصلي هقول ايه مختلف عن باقي الناس؟

الكل بيشتم وبيشجب وبيعترض

واللي بيعمل اكتر من كدة بيتضرب، لو رحت تنتخب هتضرب لو فكرت تنتخب على مزاجك

ولو مروحتش تنتخب هينتخبولك بالنيابة عنك.. ناس طيبين قوي يحبوا يريحو المواطن ويظبطوه ويفسحوه

الانتخابات.. مرمطتك اولا

المهم.. سيبنا م القرف ده.. بعيدا عن مين مترشح ومين جاله رشح يكشي كلهم يقعوا في معمل ترشيح، الا ان الانتخابات ليها جوانب مضيئة جدا، ممكن متكونش واخد بالك منها سيدي المواطن.. ولهذا، احب انصحك بارتداء نضاره فوشيا مسخسخ وقلع النضارة السودة الكبة الوحشة، وبص للانتخابات المصرية بنظرة اخرى.

بتروح شغلك مشي او بمواصلات او بعربيتك، ايا كانت المواصلة اللي بتستخدمها في الشوارع المصرية، بص بصة تأملية للشوارع وشوف الوشوش اللي حواليك والبوزات اللي المرشحين واخدينها لنفسهم، هتلاقي واحد صوره مالية كوبري مثلا وهو واقف ساند على طرف صورته وفيه نظرة تحدي (ولهذه النظرة مغزى) هتحس مثلا انه بيقولك بعينه اليمين (هتستجري متنتخبش؟) او بحاجبه الشمال اللي مرفوع (انا مش محتاج لصوتك يابن الـ ....... انا كدة كدة هاخدها).. طبعا كلهم هياخدوها باذن الله وبتمناهالهم من قلبي نفر نفر، بس من فضلك ارجع بص تاني ع الصور وفكر الصورة دي خدت وقفة ازاي وبصة ازاي وخلفية ازاي، كل حاجة معمول حسابها ومدروسة.
يوم الحد هو اول يوم انتخابات.. بذمتك.. عمرك شفت شوارع مصر فاضية كدة؟ ده هنا يابني، انت في هنا وانت مش حاسس.. اولا اولاد سيادتك اجازة م المدرسة يعني توفير مصروف، وتوفير وقت للمذاكرة، وكمان مش الحد وبس ده الحد والاتنين والتلات كمان، ويمكن تبقى ابن محظوظة وتكون مدرسة عيالك حصل فيها قتل ودم وياخدولهم باقي الاسبوع اجازة لحد ما يلموا الجثث او يدفنوها.
مفيش شحاتين.. بذمتك ملاحظتش ان اليوم ده مفيش شحاتين؟ ركز تاني.. ايوة نفس الاشارة اللي انت بتعدي عليها كل يوم.. تمام.. فين بتاع المناديل؟ فين الست الغلبانة امو عيل؟ فين ابو ايد مقطوعة وابو رجل مسلوخه؟؟ طبعا مش هتلاقيهم.. يعني هما هيسيبوا ٥٠٠ جنيه او ٣ كيلو لحمة بيتوزعوا وهيستنو حسنة سيادتك؟؟ بالعقل يعني، ده يوم في السنة يا مواطن.. اليست الحياة اجمل بدون شحاتة في الاشارات؟
ركز تاني في الشوارع.. معلش هو يوم محتاج تركيز حبتين.. فاكر العربية المهببه بتاعة الونش اللي بتيجي تلبس على عربيتك؟ باختصار انت مش هتلاقي عسكري ولا امين شرطة فاضيلك اصلا.. كلهم بيأمنوا الانتخابات الشفافة النزيهه، وعلشان النزاهه والوجاهه فكل الامن بيأمن العملية اليوم ده، تركن بقى صف تاني صف تالت، صف عاشر حتى.. مش انت قضيتهم اليومين دول.. عزيزي المواطن لأول مرة هتركن براحة اهلك بدون كلابش.
قالك ايه قالك اه.. هو اليوم كله كدة، قالك فيه اتنين بيشروا دم من اول شبرا لحد التجمع، قالك ان ٣ من الاخوان نزلوا على سبعة من الوفد بالشوم، لا لا لا انت غلطان دول بتوع الغد هما اللي ضربوا الاخوان، وراحوا اتعالجوا في مستشفى كان بناها اول امبارح الحزب الوطني.. خد من ده كتييييييييييييييييير جدا، ويمكن الجديد كل سنة ان الفيديوهات والفيسبوك بقوا اب تو ديت.. يعني الفيلم يحصل، يتنقلك مباشر ع النت.. فيلم حي اكشن على كوميدي على تراجيدي، سمك لبن تمر هندي.. خلطة مصرية متميزة.

لا يسعني في النهاية سوى تذكر مشهد هتاف اصدقاء عادل امام في امير الظلام وهما بيقولو فريق البكابورتات.. باكابورتات.. باكابورتات.. عزيزي المواطن النهاردة يوم الباكابورتات.

لو سالتك انت مصري

2010-11-06T14:17:00.000+02:00

المصريين أنواع كتير جدا، كل واحد شايف مصر من وجهة نظره وبيتعامل معاها من خلال افكاره هو، وهي كمان بتتعامل معاه من خلال منظوره ده تمام.

اجب عن السؤال التالي ولو حتى بينك وبين نفسك، مش لازم ترد عليه في تعليق، واعرف انت انهي نوع من المصريين، عشان المرة الجاية لما الست نانسي تسالك لو سالتك انت مصري تقولي ايه، تعرف تجاوب بقلب.

السؤال: (وتذكر.. انت في القلب.. تكلم .. بلا خوف)

علشان تمشي أمورك في مصر، في مختلف الاماكن او المصالح.. بتعمل ايه من الامور التالية؟

١- بتمشي ومعاك كارنيه حزب وطني، او بتقول انك من الحزب الوطني

٢- بتمشي وف جيبك شريط فياجرا واللي بيعصلج بتغمزه بقرص

٣- بتمشي وف جيبك عشرات جديدة في باكو نضيف وبتوزع شاي الناس

٤- بتستعمل كارنيه شفهي تحت عنوان (انت مش عارف انت بتكلم مين) مع الاخذ في الاعتبار استعمال كل معارفك اصحاب المناصب

---------------------------------------------

اذا كانت اجابتك رقم ١

انت مصري ابن مصري وحقيقي انت في القلب، فدرايتك بابسط حقوقك المصرية للمواطنة في انك تبقى تابع للحزب الوطني نابع اكيد من ايمانك الشديد بأحقية المصريين في العدالة الاجتماعية واكل الملوخية بالتقلية..... الخ

م الاخر، انت عرفت من اين تؤكل الكتف، وخدت الحكاية من قصيرها وببساطة. بمعنى ادق.. على راي تامر حسني اخترت صح.

اذا كانت اجابتك رقم ٢

انت خبير في الشخصية المصرية الصميمة، وخاصة الشخصية المصرية الحالية اللي بقت تعبانة وشرقانه وحالتها عدم، وواضح انك بتروح مصالح حكومية كتير حيث الغالبية بقوا Expired واي حاجة زرقا بقت بتجذبهم تمام زي الفراش تجاه النور.. وانت عارف بقى اخرة الفراشة على النور ايه.. عموما الدنيا فانية والبقاء لله..

يرجى العلم بان من النادر تلاقي فتاة او سيدة بتستخدم الاختيار الثاني، فالغالبية هتكون من راجل لراجل زيه، من مواطن لمواطن اخوه.

اذا كانت اجابتك رقم ٣

انت مصري تقليدي بشع، لازلت تتعامل بالاساليب التقليدية العتيقة. نصيحتي لك عليك ابتكار وسائل متجددة ومبتكرة، ياعم شكّل وانت رايح، مرة كيلو رز، مرة كيلو لحمة، ولا مانع من كيلو طماطم مؤخرا فاسعارها جعلتها ملكة الخضروات مؤخرا.. عليك بمراجعة نفسك وحساباتك مرة أخرى بالتأكيد.

اذا كانت اجابتك رقم ٤

عليك دوما التأكد من استمرار علاقاتك مع هؤلاء الرتب، ولا داعي للاتصال بهم فقط وقت الزنقة، فعليك بتعزيز اواصل العلاقات الدبلوماسية بينك وبينهم، وعليك حساب المدة الزمنية لكل منهم بشكل دوري قبل الطلوع على المعاش فقط عشان تبقى في الـ Safe Side.

مسابقة الجمهور..

اذا كانت لديك وسائل اخرى مبتكرة لم نسمع عنها من قبل، برجاء اعلامنا بها فقط لنتبادل الثقافة المصرية المختلفة..

شكرا.. اخي المواطن.

سنووايت.. جو تو هيل

2010-11-06T00:08:00.001+02:00

في ١٩٣٧ ظهر فيلم من شركة والت ديزني كان ظاهرة في وقتها، وأسطورة وحدوتة ما قبل النوم.. كل حاجة ممكن تنطبق على الفيلم ده.. الرومانسية، الطفولة، البراءة، السلام العالمي.. قول مصطلحات من تلك النوعية زي ماتحب

فيلم سنووايت والسبع أقزام أو بياض الثلج والأقزام السبعة زي ما تمت ترجمتها حرفيا واتنشرت في المكتبة الخضراء* بيحكي قصة في منتهى البساطة؛ اميرة والدها مات ومن وهي طفلة متسستمه على انها في انتظار الامير اللي هياخدها على الحصان الابيض

ولان الحياة مش دايما بمبى، فكل معاناة الاميرة دي ان زوجة ابوها اللي مات، مشغلاها عندها ومطلعة عينها، وكل يوم تصحى زوجة الاب وتسال المراية مين احلى مني يا مرايتي لحد ما تقولها المراية ان سنووايت هي احلى منك فتقرر انها تخلص منها.

الموضوع لا يتوقف عند هذا الحد، بالفعل تروح الاميرة مع صياد بايعاز من زوجة الاب ويحاول قتلها بس ضميره يصحى فيسيبها في الغابة وتقابل الاقزام السبعة وتحاول الملكة زوجة الاب قتل سنووايت بس تفشل وتموت في عاصفة قوية وسنووايت تنام سنين لحد ما الامير يصحيها وتوته توته خلصت الحدوتة

كل ده مش مهم اصلا.. اولا لان كلنا شفنا الفيلم او قرينا القصة او اتحكتلنا واحنا اطفال. المهم انك لو جيت تتفرج ع الفيلم وانت كبير هتلاقي كوارث.

المباشرة الفظيعة في النصايح المريعة اللي تلاقيها طول احداث الفيلم، ان سنووايت بتعلم الاقزام السبعة ان مينفعش ناكل بدون ما نغسل ايدنا، ولازم نستحمى يا اطفال، ولازم نبقى طيبين ونضاف... الخ، ممكن تكون الاساليب دي كانت شغاله مع اطفال زمان، بس الاطفال بتوع دلوقتي اللي بيتفرجو على ماتريكس وعارفين توايلايت ومصاصي الدماء المحبوبين، مبقاش ياكل عقلهم الجو ده خالص.
الانسة سنووايت كل هدفها في الحياة هو انتظار الامير ابو حصان؟؟؟ ياسلام ع الهدف والمصير، ويافرحتي ان النهاية قفلت عند انها اتباست ومشيت معاه، ايوة وبعدين؟؟ هل الامير طلع ابن ناس ولا ابن جذمه؟؟ طلع عينها ولا كان كويس؟؟ ولا حد يعرف، هي النهاية انها اتجوزت ولبست فيه، وقالك انهم عاشوا في (سعادة للابد).
انا مشوفتش ان سنووايت طيبة ولا حنينه ولا كويسة، هي مكانتش اكتر من هبلة وساذجة سذاجة السنين، مفيهاش ادنى ذكاء ولا تمييز، يمكن عشان مخرجتكش من بيت ابوها وكانت متقوقعة؟؟ جايز.. يمكن كمان عشان كل تعاملاتها كانت مع الحصنة والحمام والعصافير فوجود البني ادمين كانت مش واخدة عليه!

اعتقد ان فيلم سنووايت لا يصلح لان تعاد مشاهدته بعد ١٩٥٠.. ده اخر صلاحيته، بعد كدة هتفقد احساسك بانه كارتون وهيجيلك ضغط عصبي من فكرة الاستكانة الشديدة اللي يمكن توصلك من الفيلم زي ما وصلتلي بالظبط، فكرة انك بترسخ في دمغة البنات تحديدا ان انتي واحدة هبلة في انتظار اللي ياخدك من حياتك او ياخدلك بحقك او يغير ظروفك.. وده عمره ما هيحصل.. انتي كدة في انتظار جودو يا امي.

انا من منبري هذا بقولك يا ست سنو.. انا مبقتش بحبك خالص ومش راضية عنك ولا عن موقفك صراحة.. ومش ناوية افرج عيالي على الفيلم ده واخرتك هتبقى قصة هحكيها بطريقتي انا ليهم.

-----------------------------------------------------------------

*مش عارفة لو حد كان بيقراها ولا لأ زمان بس هي كانت جنة ديزني العربية في أوائل التسعينات :) من عهدي يعني

Worth Watching

2010-10-30T23:26:00.004+02:00

تعرف الضحى؟

2010-06-09T00:37:00.006+03:00

صلاة الضحى..
كتير يعرفوها وكتير برضه قابلتهم ميعرفوهاش، بس عموما صلاة الضحى مش هي صلاة الصبح خالص.. صلاة الضحى صلاة بتتصلي من الشروق وحتى اذان الظهر، بس مش معنى كدة لما يفوتك الفجر وتصليه بعد الشروق يبقى انت بتصلي الضحى؟ لا انت بتصلي الفجر أو الصبح قضاء لانك فوت الفرض (بديهي)!

صلاة الضحى بقى سنة مؤكدة.
وقال عنها الرسول عليه الصلاة والسلام
"يصبح علي كل سلامي من أحدكم صدقة. وكل تسبيحة وتهليلة صدقة. وتكبيرة
صدقة. وتحميدة صدقة. وأمر بمعروف صدقة. ونهي عن منكر صدقة. ويجزيء
أحدكم من ذلك كله ركعتان يركعهما من الضحي".

وقال زيد بن أرقم: خرج رسول الله - صلي الله عليه وسلم - علي أهل قُباء وهم
يصلون الضحي فقال: "صلاة الأوابين إذا رمضت الفصال من الضحي". أخرجه أحمد ومسلم.

أقل صلاة الضحي ركعتان. ولا حد لأكثرها وحددها الشافعية بثماني ركعات،
وحددها آخرون باثنتي عشرة ركعة.

فعن أم هانيء أن النبي - صلي الله عليه وسلم - صلي سجدة الضحي ثماني ركعات،
يسلم من كل ركعتين.

أنا عارفة ان كل ده ممكن يكون ناس كتير عارفينه، بس صلاة الضحى فرقت معايا بشكل شخصي جدا.. لإني مكنتش اعرف الفضل بتاعها ده كله، وصليتها في وقت أزمة وضيق وحالة نفسية تحت جدا وظروف سخيفة، ودعيت فيها دعاء مش محفوظ ولا حاجة، مجرد اللي حسه بيه.
وعلشان اليوم معداش عادي، والظروف كلها اتغيرت تماما للأحسن بفضل الله، قررت اني اواظب على صلاة الضحى طالما ليها أثر مادي وملموس في حياتي كدة

ربنا يديمها عليا نعمة، ويرزق فضلها للمؤمنين والمسلمين يارب.

I believe i can Cry

2010-06-05T22:18:00.005+03:00

i don't know, some say that tears are so sad element, i say that it depends, but the thing that no one would be against or disagree, is that tears coming out from crying, and crying makes you more comfortable and gets you into relief. even if you hate it!

when i get deep into the moment, without realizing it, i found myself crying, even if i'm in a middle of discussion, even if it's a normal talk. (i know that's weird)

when i get so nervous, i cry (it makes me calm down)

when i feel pity over myself, can't stop crying (i know it's selfish, but yeah how doesn't love his-self?)

when i want to sleep and stay awake, i became easy to cry, but here it depends.

when i want something badly, and asking Allah to give that to me, i cry.

when i feel that i'm blessed, i cry.

when i got a deep hug, sometimes, i cry.

when i feel lonely, cry.

i hardly cry over dead people, (don't know why) but i really hate farewells which makes me cry (it's obvious).

The worst cry ever, when you cry over no reason, or you don't know it, and the best one ever when you cry over satisfaction and shying from Allah.

أنا أحب = أنا أعاني

2010-03-27T23:28:00.004+02:00

ليه قصص الحب العظيمة بتتقاس بمدى المعاناة والأسى؟ ليه فيلم زي Love story من عمالقة الافلام الرومانسية، عبارة عن واحدة بتموت بالسرطان؟

ليه فيلم The Notebook الحبيبين بعد ما كملوا حياتهم مع بعض وخلاص كان ممكن ننتهي عند النهاية العادية عاشوا سوا وخلصنا، وضمنيا كلنا عارفين ان كل الناس هتموت يعني، بس لأ.. إزاي؟؟ ودي تيجي؟؟ لازم يموتوا في الاخر برضه، وحط شوية كآبة ياعم على الاحداث.

حتى الفيلم اللى تلات اربع البنات اللى اعرفهم بيموتوا فيه A walk to remember وتقريبا بيحبوه عشان البطلة قالتله مش هتيجي جمبي غير لما تتجوزني عشان باباها كان قسيس، بس المهم، برضه ماتت بسرطان وجوزها اتفحت عشانها.. وتقدر تلاحظ ان قصته لا تختلف كثيرا عن Love Story أو حتى فيلم Sweet November.

حاجة م الاتنين.. يا السرطان ما بيحلاش غير للحبّيبه، يا الحب مبيحلاش غير مع الكآبة والمعاناة والأسى، انما اتنين حبوا بعض واتجوزوا والحياة حلوة دي يبقى عليك وعلى ديزني ومشتقاتها، أو كدة هيبقى فيلم مقاولات بقى!!!!

انا فعلا مش فاهمة ليه الغم؟؟ لو عايزين يحطوا لمحات من الحياة الواقعية يا عم ماحنا غرقانين في الواقع، ارحمونا شوية من النكد.

لا تليفزيون لا

2010-01-25T03:11:00.007+02:00

بناءا على الأحداث التالية، توصلت للمقولة الحالية: "مبقاش فيه حد بيقول، الكل بقى بيهيء"

افتح التليفزيون قلب فيه شوية هتلاقي شوية برامج كتير عن الأغاني والمغنيين أو بمعنى أدق المؤديين، وكل واحد بيتكلم عن كليباته الداعمة للحرية والمناضلة للنمطية والتقليدية، والمناصرة لكل مباديء الثورة الفرنسية الحب والحق والخير.. وتشوف المذيع بيتكلم بجدية كأنه بيتناقش في قضية سياسية من العيار التقيل.. ييجي في الفاصل بقى الكليب عشان تتفرج على اي هبل في أي جبل، ويا خسارة الربع ساعة اللي استحملت فيها الحوار ده

قلب شوية كمان.. هتلاقي يمكن برنامج من برامج المساء، بتاعة أحداث وأخبار البلد واللي مش ممكن تلاقي فيها خبر يفرح، عيلة بتولع، واحدة ماتت، قرية غرقانه، غرامة جديدة هتفرضها الدولة.. اهي لازم خبر نكدي والسلام

المهم.. بعد استعراض الاخبار يمكن تلاقي حد محترم المحاور بيرغي معاه، بس المشكلة ان عشان تسمع كلام مفيد فانت ممكن تسمعلك ساعة كلام مفيد، ساعة الا ربع كلام مفيد، انما 3 ساعات كلام مفيد؟؟ مستحيل يعني.. كدة كتير.. كدة صداع.

الليلة كانت ضيفة الحلقة المبجلة للبرنامج المحترم 90 دقيقة المطربة الصاعدة والنجمة الأسطورية نيكول سابا.. وبكل فخر كان بيسألها المحترم برضه جدا "معتز الدمرداش" عن لو انها في كليباتها وبأغانيها بتحرض المرأة ضد الرجل.. فطبعا الست هانم ردت انها مبتحرضش ولا حاجة ده واقع و.... (شوية رغي عن قضية المرأة اللي اقل من الرجل فبتدافع عن نفسها وانها نص الرغيف)

واخيرا بيسالها لو انتي مرتبطة او متزوجة هتقبلي جوزك يقولك اقبلي الدور ده وبلاش الدور ده.. الرد بقى المفحم: "أنا عمري ما عملت اصلا عمل غير مشرف ولا لائق وبالتالي مش هيلاقي حاجة اساسا يقولي عليها لا أو آه.. ده إذا كنت مرتبطة يعني"

ابقي قابليني يا ماما، اما نشوف مين اللي هياخدك.

قلب شوية أكتر..

هتلاقي برامج كتير برضه مبتقولش.. مهو مينفعش يبقى عندك قناة مفتوحة 24 ساعة كلها هتقول، لازملك كام ساعة تهيء فيهم.. وفيه كمان حاجة كدة اسمها Fillers دي ترجمتها الحرفية (الحشو) اللي بتملى وقت للقناة، ومعظم القنوات الحالية عايشة على الفيلرز، اديني ياعم اي كلام في 10 دقايق او 5 دقايق احشرهم بين اي برنامج او فيلم واخوه.

بلاش تقلب وتدخل في مفرمة المسلسلات اللي بقت ليها قنوات اكتر من قنوات الافلام.. على ايه؟ معرفش.. قال يعني بننتج مسلسلات جامدة.. بلا ستين نيلة، المسلسلات التركية لا تقل شيئا عن ملل وبطء المسلسلات المصرية.. واهو كله بيتنح في ربع ساعة وبيتكلم في نص ساعة وبينهم فواصل اعلانية خلصت الحلقة.

مش عارفة الصراحة التليفزيون المفروض يبقى ازاي.. انا فعلا مش عارفة الحل ايه بس الوضع الحالي انا بقيت حسه ان التليفزيون بقى رغي متواصل بلا توقف.. فعلا بقى بيجيبلي صداع.

Life is Perfect

2010-01-15T01:58:00.009+02:00

قليل الحالات اللي بحس فيها اني لو متكلمتش هطق او هنتحر

ورغم ان الميول الانتحارية عالية جدا عندي الفترة دي، بس للاسف مش لاقيه فرصة مناسبة حاليا.

اتكلم، صوّت، ان شالله حتى تولع في روحك، مبقاش حد بيسمعك، محدش هيقولك وطي صوتك ولا بتعمل ايه، احنا عايشين في عالم اطرش

كله بيتكلم بس ومحدش عنده وقت يسمع، واللي عنده وقت معندوش طقطان للسمع

الوقت بيجري والناس بتجري ولو مفيكش حيل تجري معاهم ياكشي تولع

قليل الحالات اللي بحس فيها اني على هامش الحياة

ورغم ان فيه حد ممكن افضفضله بس حسه اني مش قادرة اشيله هم فوق همه.

احلم واكبر واشتغل وعيش حياتك، مانت لو محلمتش محدش هيحلملك.. واوعى تتصور انك لما تقعد حاطط ايدك على خدك حد هييجي ياخد بايدك ههههههههههههه ده بس في الأفلام العربي، انما الحقيقة لو مقومتش نفسك هيردموا التراب عليك والله يرحمك كمان.

قليل الحالات اللي حسيت فيها بيأس فظيع وتضاؤل غير متناهي ..

الا انه كثيرا خلال الفترة الحالية ما تتملكني رغبة تدميرية وانتقامية فظيعة، تدمير مين وانتقام من مين مش عارفة، وللحقيقة.. مش فارقة.. انا جوايا حقد وغل خام.

500 days of summer

2010-01-04T03:43:00.004+02:00

This is a story of boy meets girl. But you should know up front, this is not a love story.

مارك ويب، ايوة اللي واقف ع اليمين ده

الاسم ده ارجع تاني واقراه، غمض عينيك وقوله، حاول تحفظه بشتى الطرق عشان هتسمعه كتير جدا خلال السنين القادمة كواحد من أبرع المخرجين اللي هيقلبوا موازين السينما الأمريكية.

المخرج ده معملش فيلم روائي سينما حتى الان غير فيلم 500 Days of Summer وبسرعة دخل قائمة imdb لأفضل 250 فيلم.

الإخراج مش معقول، قولي ايه التقنيات اللي تحب تشوفها أو شفتها قبل كدة؟

انيميشن؟؟ هتلاقيه في منتهى البساطة في عصفور من الكارتون بيطير حوالين البطل عشان ينقلك شعوره بالسعادة أو بالادق الطيران من السعادة.

رسم الكاريكاتير؟ أو الشخبطة؟؟ أو يمكن بتحب الأفلام القديمة بالأبيض واسود، طيب ايه رايك لو نقسم الشاشة نصين ونحط البنت في حته والولد في حته ونشوف كل واحد بيعمل ايه.. بلاش كل ده، ايه رايك اعملك مقارنة ع الشاشة برضه بين خيال البطل والواقع اللي اتعرضله.

لو كل التقنيات السابقة لم تلفت نظرك بعد، فما رأيك بتقديم أيام السنة بشكل في منتهى العشوائية، ولما تروق وتهدى اقعد مع نفسك جمع القطع سويا.

الفيلم رائع بكل المقاييس، التمثيل، الإخراج، الحوار العبقري، الراوي بصوته الرخيم الرائع، كل شيء.. لم أر عيبا في هذا العمل السينمائي التحفة فعلا Master Piece.

This is a story of boy meets girl. The boy, Tom Hansen of Margate, New Jersey, grew up believing that he'd never truly be happy until the day he met the one. This belief stemmed from early exposure to sad British pop music and a total mis-reading of the movie 'The Graduate'. The girl, Summer Finn of Shinnecock, Michigan, did not share this belief. Since the disintegration of her parent's marriage she'd only love two things. The first was her long dark hair. The second was how easily she could cut it off and not feel a thing. Tom meets Summer on January 8th. He knows almost immediately she is who he has been searching for. This is a story of boy meets girl, but you should know upfront, this is not a love story.

Just because she's likes the same bizzaro crap you do doesn't mean she's your soul mate.

Tom, I know you think she was the one, but I don't. Next time you look back, I think you should look again.

Most days of the year are unremarkable. They begin, and they end, with no lasting memories made in between. Most days have no impact on the course of a life. May 23rd was a Wednesday.

So damned helpless

2009-12-31T01:37:00.001+02:00

it's awful when you feel helpless towards those who you love and care for, you feel helpless, useless and you became out of mind, ready to do anything, really anything, just to make them feel a little bit better.

:(((((((((((((((((((((((((((((

ميفوتكش في 2010

2009-12-30T14:30:00.022+02:00

قبل ما ابدأ بس احب اوجه شكر خاص للاستاذ المبجل محمد حسن بيه باشا :) الاستاذ اللي ضغط عليا ولولاه مكانش البوست ده طلع في سنته D: ميرسي يا حسن

وتقدر تقرا قايمة حسن لافلام 2010 التي تستحق المشاهدة من اللينك هنا

---------------------------------------------------------------------------

كل سنة بتوقع ان الافلام هتبقى اجمد من السنة اللي قبلها، وخلال 2010 وبعد ما بقى اخيرا عندنا في مصر سينما 3D بصفة دايمة، اتوقع ان السينما في 2010 هتبقى اجمد واجمد

ونتمنى ان على 2011 يبقى في مصر Imax ونقول يارب

Shutter Island

المخرج مارتن سكورسيز، العبقري الوسيم ليوناردو ديكابريو ومارك روفالو وايميلي مورتيمر تشكيلة مينفعش تتفوت صراحة، بالاضافة الى اني مفتكرش ان ديكابريو خذلني قبل كدة غير يمكن في the beach وانا مسامحاه عليها.

في انتظاره في مارس 2010

Inception

الفظيع الفظيع الفظيع كريستوفر نولان (لايمكن متكونش عارفه خاصة لو كنت شفت The Dark knight) هذا الفظيع هو مخرج الفيلم، ومن بطولة برضه ليوناردو ديكابريو، وبالتالي يمكن تطبيق الكلام عن الفيلم السابق على الفيلم ده بتاع انه عمره ما خذلني وكدة، الجامد كمان ان مع ليوناردو الممثلة المتقنة جدا "إلين بايدج" مثلت قبل كدة Whip it و Juno.

في يوليو 2010

Twilight: Eclipse

الكثير سيتهمني بالمراهقة بس فعلا أنا موهومة بالفيلم بلا ادنى سبب منطقي، i'm just under Twilight spell ومينفعش مستناهوش ولا استنى كمان الجزء الرابع بتاعه.. واللي يعرف مكان الروايات كمان بتتباع فين عربي او انجليش يقولي بليز. كفاية لحد كدة مش هتكلم عنه اكتر من كدة.

يونيو 2010

Alice in wonderland

يمكن دي المرة الوحيدة اللي هتقتنع ان الفيلم بالشخصيات الواقعية أفضل من الكارتون رغم اني مجنونة انيميشن، الفيلم للمخرج تيم بورتون وجوني ديب وهيلينا بونهام كارتر، زود عليهم كمان أن هاثاواي.. تبقى المعادلة مظبوطة جدا ومينفعش انك تدخل الفيلم وتخرج زي مادخلت، أكيد هتخرج شخص تاني.. ملحوظة لو مكنتش شفت Sweeny Todd لاااااااااااااااااازم تشوفه في مارس 2010

Knight & Day

أوك.. هل يكفي ان تعلم أن توم كروز وكاميرون دياز هما ابطال الفيلم ده؟ ممكن كتير يكونوا بيكرهوا الاتنين بس لو كنت شفت فيلم Mr and Mrs Smith فاعتقد انك هتستمتع بالفيلم ده

في مصر يوليو 2010

The Bounty Hunter

الفترة القادمة ممكن نسميها موسم جيرارد باتلر، بعد 300 وthe ugly truth واخيرا the Gamer مبقاش ينفع ميعلقش معاك اسم جيرارد باتلر، بعيدا عن كونه أكيد واحد من أكثر 100 رجل جذاب على وجه الأرض واللي اكيد هيحتل فيها مرتبة متقدمة رغم اني معرفش بس متوقعاها جدا يعني.

مع جيرارد باتلر الممثلة جنيفر انستون، ورغم ان بعض افلام جنيفر ساعات بتبقى نص نص بس المخرج هو اندي تينانت مخرج فيلمي Fool's gold وHitch.

Up in the air

رغم ان الفيلم نزل في 2009 الا انه هينزل في مصر فبراير 2010، ويكفي القول بانه واحد من افضل عشر افلام تم اختيارهم في 2009، بالاضافة إلى ان بطل الفيلم هو جورج كلوني.. واللي بيقوم فيه بدور واحد وظيفته هي طرد الموظفين الزائدين عن الحاجة. وظيفة غريبة والحكايات اللي تطلع منها أغرب.

مينفعش يفوتك في فبراير 2010

هاري بوتر

مهو مش طبيعي اننا بعد ما نتفرج على 6 اجزاء من هاري بوتر هنيجي في الجزء السابع ونعمل عبط يعني.. الجزء السابع والأخير من كثافة أحداثه تم تقسيمه على جزئين أخرين، ماذا سيحدث بعد وفاة دمبلدور؟ اكتشف ده في نوفمبر 2010.

The Tree of Life

براد بيت، شون بين ورحلة 3 أخوات في منتصف الخمسينيات.. مفيش لسه كلام محدد عن الفيلم اوى، بس بعد the Curious case of Benjamin button وقايمة افلام براد بيت الرائعة، مينفعش تسمع اسم براد بيت في فيلم وتشك إنه ممكن يطلع وحش. أما العبقري شون بين فسواء كان مخرج او ممثل فالراجل ده مبيهرجش، ولأنه يهودي كمان فده ادعى انه يأكدلك انه مبيهرجش نظرا لإن غالبية اليهود أصلا محترفين في الإعلام، وشون بين تحديدا عبقري فعلا.

Eat, pray, love

صراحة انا مقريتش الكتاب، ويادوب لمحت كام لقطة من حوار أوبرا وينفري مع مؤلفة الكتاب التي كتبته بناءا على تجربتها الذاتية في إنها سافرت في رحلة لاكتشاف الذات وبتاع... بعيدا عن كل ده فالجميلة والتلقائية جوليا روبرتس هي اللي هتجسد الشخصية دي، واعتقد ان الفيلم يستحق المشاهدة، المشكلة فقط إنه هيتعرض في اكتوبر 2010 في ايطاليا فاعتقد انه عقبال ما يوصل مصر فيها كام شهر يعني ممكن نشوفه في 2011.

Leap year

ايمي ادامز ممثلة بكل معنى الكلمة، بدءا من فيلم Enchanted وانطلقت تلك الممثلة ليشهد الجميع بموهبتها الرائعة، وعلى مدونة المخرج محمد خان هتلاقي بوست كمان مخصص ليها، الفيلم من بطولة ايمي ادامز وماثيو جوود.. ورغم انه من نوعية الرومانسي كوميدي بس اسم ايمي ادامز جدير حقا بمشاهدة الفيلم عشان خاطر عيونها. حتى الان مفيش كلام عن اذا كان الفيلم هينزل مصر ولا لأ، بس مش مشكلة بقى التورنت ربنا يخليهولنا.

Toy Story 3

ايه رايك؟؟ بذمتك مش كفاية إنك تعرف إن وودي وباز هيرجعوا من جديد في مغامرة مثيرة بعد كل السنين دي؟ خليك بس عارف إن بعد كل السنين دي لا يمكن اندي يفضل صغير، أندي هو كمان كبر زيك بالظبط ودخل الجامعة! انتظروه في يونيو 2010
Salt

انجلينا جولي والمخرج فيليب نويس يعودان للعمل سويا بعد نجاحهما الكبير في فيلم The bone collector (صعب متكونش شفته). الفيلم أكشن وجاسوسية مش دراما ومأساة زي Changeling الاخير بتاع انجلينا، بس اعتقد ان انجلينا في Changeling بدأت تمثل فعلا فمستنيه اشوف نتيجة عملها مع كلينت إيستوود غيرتها وطورتها ولا ابعتلها ميل اقولها اقعدي في بيتكو.

Monsters Inc
فيه كلام عن ان الفيلم جاري العمل عليه، بس امتى، مين هيمثل، اي ملامح عنه لسه مبانتش.. بس الخبر في حد ذاته شيء في منتهى الروعة، واتمنى ان سامي مغاوري وهنيدي وحنان ترك برضه يدبلجوا الفيلم للعربي.. ويقال إنه هينزل في 2012.

خلال 2010 ربما تظهر افلاما اخرى تستحق المشاهدة وتستحق الترقب أيضا، لذا يمكننا الاكتفاء بهذا القدر قبل بداية العام المقبل.

Thanks Julie, Julia and Ahmad :)

2009-12-23T04:30:00.005+02:00

A perfect movie in a perfect night just to fit in with everything :)))))

With all these ups and downs, with all these obstacles and ditches we have in our life, here is coming Julie, that wonderful lovely (Amy Adams) just to add a whole new perspective to my life.

Thanks Julie and Julia, and Ahmed for suggesting that great wonderful movie for me in this particular night :)

Finally, great regards to the lovely NORA EPHRON

She's the writer of the master piece you've got mail, Sleepless in seatle, when harry met sally and of course (Julie and Julia).

if you have the chance to watch that movie, please please please do.

Bon Appetit ;)

Once upon in december

2009-12-17T01:17:00.004+02:00

Again, in December 2009

You'r going to no where armed with nothing.

When that December's curse ends!!!!

I'm not a fan of December anymore.

2009-10-13T16:44:00.003+02:00

الدعاء ده ببساطة يخليك تدي الناس والدنيا كلها بالجذمة القديمة، ولا يفرق معاك حد بنكلة

عن أبي العباس عبد الله بن عباس رضي الله عنهما قال :

" كنت خلف النبي صلى الله عليه وسلم يوما فقال:

( يا غلام إني أُعلمك كلمات : احفظ الله.. يحفظك

احفظ الله.. تجده تجاهك

إذا سأَلت فاسأَل الله

وإذا استعنت فاستعن بالله

واعلم أن الأُمة لو اجتمعت على أَن ينفعـوك بشيء لم ينفعوك إلا بشيء قد كتبه الله لك

وإن اجتمعوا على أن يضروك بشيء لم يضروك إلا بشيء قد كتبه الله عليك

رفعت الأقلام وجفت الصحف ) .

رواه الترمذي وقال :"حديث حسن صحيح ".

10 things I hate about myself

2009-10-11T01:35:00.002+02:00

10 things I hate about myself

1. I hate it when I cried in front of a romantic movie, although I know that the End seems to be happy.
2. I hate it when I got so much sarcastic in front of strangers, to break the ice.
3. I hate my crazy attitude towards the Chocolate.
4. I hate my shy of saying that I care to some people I really care about.
5. I hate it when I get depressed, blue and sad.
6. I hate it when I got so rude with people when I'm not in the mood, I really hate when I see myself so awful.
7. I hate it when I couldn't keep in touch with people I really wanna still know, it's just the life that took us away from ourselves.
8. I hate it when I can't find any free time for me; playing, reading, talking, praying, loving… etc.
9. I hate it when I shout or yell at someone.
10. I hate it when I didn't get satisfied about myself, which is mostly happened.

2009-09-30T21:45:00.005+02:00

لان بقالي كتير مجيتش هنا فممكن ارصد اخر التطورات بشكل موجز جدا، يمكن لو غبت تاني فترة طويلة وجيت اكتشف ان الاحوال اتغيرت لاحسن

على طريقة كريم عبد العزيز في فيلم أبو علي "اتاري مجري القانون في قفايا وانا معرفش"، "أتاري الأزمة الاقتصادية العالمية في قفانا احنا واحنا منعرفش" الازمة تؤثر على كل من حولي وعليا بشكل شخصي كمان.
الكل يعاني من أزمة مالية من اللي بياخد 6 الاف في الشهر لحد اللى بياخد الف جنيه في شهر، والملاحظ ان ماسح الاحذية والسباك والنجار وكل الحرف الصغيرة واصحاب الايدي العاملة لم يتأثروا طبعا بالأزمة، طبيعي.. مهما شغالين بدراعهم وكل ما كان شغلك صغير مش هيتأثر بالبلاوي الكبيرة.. هنيالك يا عم (اللهم لا حسد)
حالة من الاكتئاب تخيم على الأجواء نظرا لضيق ذات اليد طبعا (نتيجة طبيعية للنقطتين السابقتين)
يبدو أنه لا مفر من الماضي، هتعيش هتموت بكل العك اللى هببته في حياتك من اول ما اتولدت لحد الساعة اللي فاتت.. مش عملتلي فيها جدع زمان؟ استحمل بقى يا حلو.
بطبيعة الحال، ازمة فلوس واكتئاب وحاجات حلوة كدة، فاللطيف ان الصحاب بدأو يتلموا من جديد كي نتماسك سويا .. ماشي.. عاجباني الحالة دي ومبسوطة اني بستخبى وسط صحابي.
رجالة جدعة بدأت تظهر ع الساحة، والأزمة بتبين معادن الناس، منهم عالم زبالة يكشي يلوعوا، ومنهم عالم رجالة وقفوا وقفة رجالة ولسه واقفين :))
رغم العالم المادي، الواحد لقى نفسه لسه فيه سينس الرومانسية، ولسه بيحلم الحمد لله ولسه بيحس بالناس ولسه بينفض عن نفسه الاكتئاب لما يشتد قوي ويحاول يكلفته :))) تلاقي البسمة بتشق طريقها وسط التكشيرة غصب عن أم التكشيرة :) ولتحيا الابتسامة مهما كان الغم اللى احنا فيه.

مما سبق نستنتج أن:

طبيعي ان مفيش راحة بتدوم ولا شقا بيدوم، شكرا لزيادة التأكيد.

كلمة طظ كلمة ذهبية تشبه البنادول في اقل من ثانيتين تشعر ان الاكتئاب راح واختفي تمام زي الصداع

يبدو أننا على وشك التحول لمنحنى خطير ومغير قوي في الأحداث، في الانتظار السيناريو الرباني، وربنا يستر.

ربنا يستر بقى

Surprise Me!

2009-07-05T23:26:00.007+03:00

نفسي في مفاجأة جامدة جدا وكبيرة جدا ومفاجئة جدا تكسرلي العادي جدا جدا جدا
مفتقدة احساس التجريب لاول مرة.. أول مرة

:(

----------------------------------

تذييل

في يوم الاحد 5 يوليو كنت على أخري واتمنيت مفاجأة

النهاردة الأربعاء مساءا الموافق 9 يوليو

He did surprise me with the best surprise ever

:))))) i'm grateful for your excistance

Love you

:)))

يوم عادي جدا

2009-07-03T13:54:00.003+03:00

يوم من الأيام العادية.. يوم من اللي هو في وسط الأسبوع ده

بعد نوم يكاد يصل لست ساعات اذا حالفني الحظ كثيرا، استيقظ حسب التساهيل (تقع التساهيل في المنطقة ما بين 9 و10 ونص صباحا)، سريعا نفتتح اليوم بمكالمة هاتفية رقيقة غير مثيرة للاعصاب على الاطلاق من العميل (ذو اللون الأحمر)

هذا العميل يعشق الاطمئنان علي، يعشق ايقاظي والتأكد من اني صحيت وفطرت والحاجات دي

الانسه على التليفون تتاكد اني كمان ساعة هوصل للمجلة وتقفل معايا

معركة منزلية على الصباح لا ضير منها اطلاقا، مع ذكر قائمة بمجموعة من الهدوم اللي بقالي كتير مبلبسهاش وده في حد ذاته خطأ فادح في نظر الست الوالدة

(قلت يا واد طنش خالص) افكر كثيرا بتلك الجملة واصارع التأخير وانزل

المهندسين.. المهندسين .. المهندسين.. منذ أن اطلقت في هذا العالم كمرأة عاملة لما اجد غير دولة المهندسين مكانا يجمع كل اماكن الشغل الممكنة.. نهايته ع المهندسين

قد نبدأ بالدور التامن في العمارة قدام نادي الصيد، وانتظار اسانسير لا يأتي سريعا، أطلع، أجلس ع المكتب.. ولتبدأ الجولة الاولى من الصراع مع الوقت، يتخللها بعض الضغط من العميل اللي كان صحاني في بداية اليوم، اسعى للسيطرة على الامور (مرة تصيب ومرة تخيب)، اذا صابت افضل في مكاني.

أما اذا خابت، فاتحرك من شارع نادي الصيد الى شارع لبنان، ادخل المجلة، معركة جدلية وعصبية وكل الانواع الممكنة للمعارك مع كل الناس، اقضي على الامور فضلا عن السيطرة عليها وانزل

احاول اللحاق سريعا بالمبنى اللي جمب شارع مصدق عشان الحق المحاسب والحق اقبض فلوسي، وارجع تاني للبنك اللى في شارع نادي الصيد عشان اصرف منه الشيك، واودع أميرة على وعد اني هخلص شغلي، واطلع مرة تانية الدور التامن في شارع نادي الصيد، ادخل البلكونة والاقي الدنيا ضلمت.

احاول اهدى من التليفونات الكتيرة للعميل اللي استلمتني من الصبح لحد بليل، واحاول اظبط To Do List كل خمس دقايق اغير فيها.. الاقي مكالمة من الست الوالدة والاقي الساعة جت 9 بليل، احاول للمرة الاخيرة بشكل يائس السيطرة على الأمور، بوعد كل من له دين عندي اني هخلص كل الشغل النهارده.

اروح باسرع ما يمكن كيلا يتهموني بالتأخير في الشغل (وكأنهم هيصدقوا اني كدة مبتأخرش)

اصل للمنزل، مكالمة هاتفية طويلة تفصلني عن العالم كله، تقنعني ان الحياة وردية بجد، واني ملكة الكون والعالم.. اكتفي بها خير جزاء على هذا اليوم، وتتلاشى سطور الـTo do list ، وأنام، علشان اصحى تاني يوم...... (برجاء العودة للسطر الأول مع حذف بعض السطور واضافة البعض الأخر حسب الظروف).

لما تخاف منّك

2009-06-15T21:20:00.002+03:00

عمرك فكرت ايه اسوأ نسخة منك؟
مؤخرا ارى مشاكل كثيرة من حولي، الكل لازال يحب الاخر، ولكن المشاكل اصبحت مسيطرة بشكل ما على حالتهم النفسية.. يتقوقع احدهم في غرفته فيشعر بالحنق وتبدأ هي في البكاء او يهرب هو من مشاكله بالنوم ربما او بسيجارتين في البلكونة.
اخشى أن اصبح مثل هؤلاء، والكل يصرّح بأن "اللي ايده في الميه مش زي اللي ايده في النار، ولو مكاني كنتي هتعملي زيي"
ماذا سيحدث لو اصبحت في مكان كل هؤلاء بالفعل؟
هل ساتحول لنموذج لربة منزل دائمة الانتقاد، تشعر بالتقزز من زوجها لانها تقبلته في ظروف الماضي ولم يعد الان ذو فائدة؟
هل ستقضي الظروف الاقتصادية على اية ظروف عاطفية تشعرني اني لازلت فتاة صغيرة قابلة للمعاكسة والدلال؟
أم ربما سأصبح فتاة مادية.. لاتهتم سوى للمال فقط، وساًصّرح أنا الاخرى "معاك قرش تسوى قرش، ممعاكش.. امال جي تهبب ايه بروح أمك؟
ربما سأصبح المرأة العاملة.. ناكشة شعري وغير مهتمه بمظهري في المنزل، وخارج المنزل اصبح مديرة الشركة ذات الهيبة –والخيبة- والكلمة الأولى والأخيرة ستصبح لمعادلة 1+1=2، وشغلك أمانك وحصنك يا فلاح.
اخشى ان اصبح كل هؤلاء وأكثر، ويا خوفي من الأكثر!
خاصة وأني ارى كل هؤلاء يوميا... في كل مكان، في الشارع والعمل وشلة الصحاب والأهل، حتى في الافلام القديمة الابيض واسود، وفي الافلام الحديثة وحتى في افلام السبكي.. دوما يتهموني باني رومانسية –تبع المدرسة الرومانسية مش الرومانسية والحب وكده- التفكير، واني باختصار (عايشة في عالم الاحلام والرومانسية).
سؤال.. اذا كان كل هؤلاء يحيون حياة تعيسة هكذا.. فلماذا لا يغيرون بانفسهم شيئا؟؟ لست ادرى ماهية العنصر المفقود في كل حالة، لكن الاكيد ان هناك حل..
(الأكيد أن هناك حل)
(الأكيد أن هناك حل)
(الأكيد أن هناك حل)

(الأكيد أن هناك حل)
هذه أيضا أحد أفكاري اللامنطقية الحالمة المقتبسة من عالم الاحلام والخيال..
حسنا.. ان كان الامل سيصبح شيئا من درب الخيال، يارب اكفني الاصطدام بالواقعية المفرطة، واجعل لي نصيبا من الخيال الجامح دوما.
اللهم آمين.

about love

2009-06-08T01:19:00.006+03:00

Love around me everywhere :)

where-ever i'm looking i found 2 couples loving each other deeply

i'm so High :))))))

if not for the supporting each other, why would be loving each other?

Love u all, Love u, Love LOVE

:)))))

الله.. الوطن.. الفلوس

2009-05-16T13:55:00.008+03:00

منذ التتر وانت تقابل مقولات شهيرة مثل
It's not a personal issue, it's Just business
على خلفية موسيقى فريق The o'jays
Money.. Money..Money.. money من اغنية For the love of Money
لتتهيأ تماما لما سوف تقابله على مدار ساعة من ضغط وتوتر، وبعد 15 حلقة ستعرف من Fired ومن Hired :)

أشعر أنه لو كان هناك شعارا للبرنامج كان هيبقى "الله.. الوطن.. الفلوس"

The Apprentice أو "المتدرب بترجمته الحرفية" هو واحد من افضل البرامج على الاطلاق، تعتمد على اهم عنصر يبحث عنه اغلب الناس وهو العمل
ومع الازمة الاقتصادية والغلاء وكل الكلام ده يصبح العمل عامل جذب، الاجمد ان العمل واللي معتمد عليه البرنامج بيلعب على فئات مختلفة من الجماهير فلو كنت صاحب عمل او بتشتغل فعلا فانت اكيد هتبقى مخنوق وطقهان وهتحس بشعور الناس اللى بتتسابق في البرنامج
ولو كنت بتبحث عن عمل فجالك برنامج بيديلك احساس كانك بتشتغل بالظبط، فسواء كنت عامل او عاطل البرنامج ده لسيادتك.

البرنامج معتمد على مهمات يتم توزيعها على فريقين مكونين من مجموعة كبيرة من الافراد كل واحد فيهم كان مدير في شركة او صاحب عمل او مساعد مدير سلسلة فنادق او مطاعم ... الخ، وبيبدأ الفريقين يتنافسوا عشان يعملوا المهمة بافضل شكل ممكن
اللى بيفوز بيكسب جايزة مختلفة كل مرة، وكل مرة هتتعقد هتتعقد ملكش سبيل تاني
واللى بيخسر بيتطرد منه شخص ما.. في اوضة الاجتماعات اثناء طرد الشخص المغضوب عليه ستجد فرصة لسماع واحد من اجمل حوارات العمل الجادة والناشفة جدا.. هتعرف امتى تقفل عللي قدامك مناقشتة، وامتى تماطل، وامتى تجيب م الاخر
وامتى كمان لما تتطرد تتطرد بكرامتك بدل ما تخرج بمنظر زبالة.

يبقى ان البرنامج اغلب مهماته معتمدة على التسويق والاعلام، ربما لهذا الحد انا متورطة مع كل تفاصيله من التتر لحد النهاية.. ساعات بحس ان البرنامج عبارة عن دورة تدريبية مجانية فعلا..
عن جد البرنامج ده يستحق انك تشوفه ولو حلقة واحدة بس، ولو معجبكش ومتورطتش فيه وطلبت انك تشتغل مع ترامب كمان ابقى اقلب القناة يا سيدي.. ومش بعيد كمان في وسط البرنامج تكتشف انك كدة عمرك ما اشتغلت بجد، وانك عمرك ما قابلت مدير فاهم كمان.. بس الموضوع يستحق المحاولة.
البرنامج بيتذاع يوميا من الحد للخميس على دبي وان الساعة 5 ونص، وبيتعاد الساعة 1 تاني يوم

Just married

2009-04-26T00:47:00.004+03:00

أمام كل قصص الحب الفاشلة التي سمعت عنها أو عرفتها، يكفيني قصة حب واحدة فقط تكتمل لتعطيني أملا في الحياة

ربما لهذا السبب وحده أرى الحياة بشكل مختلف اليوم..

أميرة ومصعب.. أشكركما وألف مبروك

مصعب.. اعتقد انك لم تعرف او يمكن اميرة محكيتلكش، بس انا كنت فى كواليس قصتكم من أول دقة ;)

اضغط على اميرة شوية ويمكن تحكيلك.

أميرة.. رغم التحليل الأولي في البدايات، ويأس في النص، وأمل ونجاح اخيرا، وفونطاس النهاردة D: بس بحبك يا بت انتي، عقبال ما تعيشوا حياة أفضل مما تخيلتوها يارب

:))))

Mosaab, you may kiss the bride ;)

in the mood for serious

2009-04-05T01:39:00.005+02:00

WORTH WATCHING

من أجل هذا الجدل

2009-04-04T15:31:00.004+02:00

بعد معركة جدلية وتصرفات غريبة أشبه بالمجانين، تقبل عليه، تجلس، تشعر بابتسامات متفرقة تخترق ثغرها ولا تدري كيف توقفها.. بشكل لا إرادي اعتادت على تلك الابتسامات –المستفزة- التي تخرج رغما عنها كلما وقعت في موقف محرج مماثل.
دوامة من الصمت تقع فيها فلا تدري ماذا تقول، هي تعلم جيدا انها الخاطئة والمتهمة بالجنان بالمقام الأول.. يباغت صمتها.. يسألها "مالك؟"

تبدأ في الحديث عن كافة ملامح الجنان التي تعتريها، تنتهي من الكلام، تشعر باقتراب دوامة الصمت اللعينة مرة أخرى.. فينتشلها برفق، يعاتبها بشيء أشبه بالحكي عن كل مخاوفه من تلك المعركة الجدلية التي قد تفضي بكوارث أكبر، بعد امتصاص كل الذعر والخوف، يتلاشى القلق تماما.. تهدأ الأعصاب.. يبدأان في الحديث كما لو أن شيئا لم يحدث.. وحين يتحدثان عن الموقف كما لو أنه كان في حياة أخرى تماما.. يفاجئها بأن تلك الابتسامات المتناثرة التي كانت تتعثر فيها خلال مباديء لقائهما، كانوا أجمل ما حدث لأن تلك الابتسامات كانت مهدئات تدريجية لأعصابه (رغم أنها كانت ابتسامات مستفزة فيما مضى).

حبه تحت وحبه فوق

2009-03-29T23:14:00.005+02:00

الحياة مستويات وطبقات وحاجات كتير فوق بعض، مستوى مهني او عائلي او في الصحاب او في نفسك او حتى مع ربنا.. كلها مستويات وكل واحد ومستواه يعني

حاجات كتير تفقع وتحرق المرارة، والواحد قرف من كتر الحاجات اللي بتقرف

قرفانه من روحي ومن أغلب الحاجات اللي حواليا، قرفت من اسلوب الشغل بالشكل ده،

كل يوم الاقيني بقول رباعية تخاريفي: حاسب من الاسافين وحاسبلها، حاسب م الاسافين ومن حبلها.. راح تنتهي ولابد راح تنتهي.. مش انتهت اسافين من قبلها؟؟

ولله مش اكيد بقى الموضوع ده، اصل مش كلها بتبقى اسافين فيه مغارز وفيه حفر وفيه نقر، الطريق منيل يعني

قرفت من السيطرة والتحكمات، وحبه فوق وحبه تحت واخص عليك يابتاع الكحك، تقريبا بتاع الكحك كان السبب منه لله..

صحيح انا مبقاليش كتير تحت، يعني كنت فوق قوي من فترة طويلة، بس اديني اتجابت تحت، وعندي الشجاعة الادبية (نفسي اعرف اشمعنى الأدبية بتيجي ورا الشجاعة لزق) بس المهم عندي الشجاعة الأدبية اني اقول اني بقيت تحت

عادي يعني.. كلنا لها.

ولأني بعتقد ان البلوج عبارة عن (مالطة افتراضية، متاخدة من بتنده في مالطة ومحدش سامعك وبتجعر مع روحك) فانا بقى احب اصرخ مع روحي شوية واقول ان ليا شوية طلبات

عايزة يبقالي شوية سيطرة على الوقت، على العصبية، على ردود الأفعال.

انا نفسي اقول للواطيين انتو واطيين في وشهم واهبدهم قلمين وامشي، ساعتها يمكن احس بجد اني عملت لروحي حاجة.
نفسي اعمل لنفسي ريموت كنترول، وقت ما الاقي القناة بدأت تعرض ما لايحمد عقباه اقلب علطول، بسهولة كدة يبقى القلب
نفسي اخلص من حالة اللاسلم واللاحرب دي، ياسلم يا حرب وخلينا نخلص، العين بالعين وخلينا احنا الاتنين عمي

نهايته.. من منبري هذا احب اعلن اني اكتفيت، شكرا.. كفاية كدة

ممكن بقى شوية فوق؟

انا وحشني فوق ده :(((((((((

دعوة للجنان

2009-03-21T00:29:00.003+02:00

هل ندّعي الجنون كيلا يحكم علينا الناس؟ أم لا يحكم علينا الناس لأننا مجانين؟

!!!!

اصلها بصراحة فرصة، تلاقي كل واحد فرحان بنفسه قوي ويقولك "لأ اصل انت متعرفنيش انا ابن مجنونة" المفروض ساعتها تخاف انت بقى وتعملّه الف حساب، الواد مقطع بطاقته يعني، مجنون ومبيهموش

الجنان بقى صفة يتمنى الجميع ان يتصفوا بها، لانه ليس على المجنون حرج، وبالتالي فهيكون معاه رخصة يعمل اللي يحبه بدون ما حد يحاسبه.

اعتقد هيكون فيه مساواة لو عممنا الجنان المكتسب ده، ساعتها هنعيش كلنا في حالة من الجنان الفعلي، وهيبقى زيي زيك، انت مجنون وانا مجنونة، وجنان على جنان ميلفش بقى ساعتها

انما المشكلة ان يبقى فيه طرفين، واحد عامل نفسه ابن مجنونة والتاني ماسك نفسه مهما اتعصب، طيب ده ظلم بصراحة

زي ما الاخ العصبي ماسك نفسه وبيبذل جهد انه يتعامل مع الناس كويس رغم اللي فيه، على المدّعي الأول أن يقوم بالمثل والا فلنطبق الجنان على الجميع.

سقف الحلم

2009-03-07T13:49:00.007+02:00

إلى من أعاد إليّ الحلم مرة أخرى
إلى من حطم هذا السقف المطبق على أنفاسنا
وإلى سبب قراءتي لـ (ساحر الصحراء) لباولو كويليو وترجمة عبقري الأدب بهاء طاهر
بجد.. شكراً

----------------------------------------------

منذ الطفولة تغمرنا الأحلام الخيالية، تتدفق على أذهاننا وخيالنا الخصب بلا داع، نعيشها رغما عنا، فنظل مواطنين من الدرجة الأولى في عالم الخيال إلى أن يباغتنا جواز سفر إجباري يلزمنا على الرحيل لارض الواقع، لنبدأ في التعامل مع كل المشاكل بما يسمى "المنطق والعقل والواقعية"، وبعد الاعتياد على هذا العالم الجديد تصبح في عامك العشرين أو الواحد والعشرين راشدا مدركا تماما لما تفعل وقادر على اتخاذ القرارات الخاصة بك.

من حين لاخر قد تسرح قليلا وتعود لارض الخيال والاحلام اللاواقعية الا ان وصول صراخ إليك ناتج عن معركة جدلية كفيل بايقاعك لارض الواقع رغما عنك.. تشعر وكأن الكون كله قد تآمر لاقناعك بانك رحلت بشكل ابدي وتماما عن تلك الارض الاخرى، وتتناقص عدد مرات السرح والسفر الى ان تتلاشى شيئا فشيئا، لتصبح انسان واقعي بنسبة 100%..

شخص يحكمه المنطق والعقل حتى قبل ان يباشر احلامه، فعليك قبل ان تحلم على ارض الواقع ان تحسب كافة العوامل التي قد تحيل حلمك لواقع او تطلق لك رسالة (صرف النظر) عن هذا الحلم الذي لن يمكن تحقيقه، اذا كان هذا المقياس فلم نكن لنستخدم تليفونا يوما ما، او نشاهد تليفزيون او نرى اي اختراع جديد لانه طبعا كان مجرد حلم وخيال واحلام يقظة لصاحبه.

ومن تكون انت او هي او هو كي يحدد لك سقفا لاحلامك بناءا على عوامل وعناصر واقعية؟!!!
اذا كان الحلم نفسه شيئا للمستقبل وعناصره ستصبح في المستقبل هل يصح ان تقيسه انت بحاضرك لتعلن (صرف النظر) لمجرد عدم توافق الحاضر مع مستقبل لا تعلمه؟

اعتذاري لكل المتآمرين على التشبث بالواقع (اشعر بالشفقة عليكم)

The Joker

2009-02-07T21:27:00.005+02:00

Let's face the truth he is villain, sure.. But he is a guy who works with a philosophy, yeah maybe it's a freak one like him but it's still a "philosophy" in some way… and with a little reconsidering in his thoughts maybe you'll convinced with some or 2 of them.

The Joker Quotes:

If you good at something never do it for free

I believe whatever doesn't kill you, simply makes you.. stranger.

I took Gotham's white knight and I brought him down to our level. It wasn't hard. You see, madness, as you know, is like gravity. All it takes is a little push!

The only sensible way to live in this world is without rules!

Dropped at the first sign of trouble. They're only as good as the world allows them to be. I'll show you. When the chips are down, these... these civilized people, they'll eat each other. See, I'm not a monster. I'm just ahead of the curve.

Upset the established order, and everything becomes chaos. I'm an agent of chaos. Oh, and you know the thing about chaos? It's fair!

10 إيجابيات في فيلم مقلب حرامية

2009-02-06T23:28:00.002+02:00

بعد ساعة ونصف هي مدة مشاهدة الفيلم ستدرك قيمة الوقت في حياتك، وربما تقرر انك لن تهدر دقيقة زائدة من عمرك في الـ (أي كلام).

مقلب، عنوان الفيلم كان في قمة الدقة والروعة والاصاله والفخامة وكل المدح الممكن لصاحب الاختيار العبقري المبجل (مقلب) الفيلم مقلب، حيث يصح ان تقصد به انه مقلب اي خازوق لكل المشاهدين اللي دافيعن فلوس، او مقلب بمعنى انه مقلب زبالة او صفيحة زبالة.

الافيش العبقري، فالقفا الذي يظهر في الأفيش لكل الستاف كان اجمل ما يمكن تصويره والتقاطه والتعبير عنه في الفيلم، عمرك شفت بطل فيلم في حياتك يبقى بمنظر اي ممثل في الافيش ده؟

تشغيل الدماغ، طوال عرض الفيلم مخك لن يتوقف للحظة، فستفكر في كل ما تركته ولم تفعله خلال هذا الوقت بمعنى ادق ستقوم من الفيلم بقائمة Things to do، كما انك ستفكر كثيرا خلال الفيلم في كل الافلام الاجنبية اللي شفتها واللي مشوفتهاش واللي المفروض تشوفها اللي اقتبسوا منها المشاهد الفكسانه اللي قدامك

تعرف ان وزارة المالية هي وزارة بتبيع لعب اطفال غالبا، اعتقد ان لو وزارة بتبع بطاطس هتحط حرس وامن اكتر من مجرد 4 عساكر 3 بيحبوا اكل الجاتوه وواحد مبياكلش غير هوت دوج، وده مش افيه من عندي.. ده من الفيلم!!!

تحمد الله على ان هناك هاكرز مصريين بيدخلوا السينما بكاميرا فيديو عشان لولاهم مكنتش قدرت اشوف الفيلم مضروب ع النت ومدفعش فيه مليم احمر، ومع ذلك قلبي واكلني ع الوقت اللي راح .. امال لو كنت دفعت كمان؟؟
-----------------

ولله حاولت اكملهم لحد 10 عشان الاقي اي نيلة ايجابية في الفيلم بس للأسف.. الموضوع كان أكبر مني ومنكم
عليه العوض ومنه العوض
شكرا ع الشلل

اعرف حجمك وعلم عليه

2009-02-06T04:42:00.004+02:00

الاحجام في زمننا الراهن اصبحت مشكلة عويصة، فكلما زاد وكبر الحجم زادت القيمة المباعة والمدفوعة في المقابل، احجام السندوتشات الكبيرة تباع باسعار اعلى من تلك العينات المخصصة للدوقان وليس الأكل
احجام السمن والزيت والسكر كلما زاد كلما خاف المشتري على جيبه، فهذا يعني مبلغ اكبر، واذا زاد الحجم وظل المقابل كما هو تشعر وكأن هناك شيئا ما مريبا، عليك الشعور بالارتياب ومعك كل الحق.. كيف يزيد الحجم ولا تزيد الفلوس؟!
ولان العلاقة بين المقابل والحجم علاقة طردية (كما علمونا) يزيد التابع بزيادة المتبوع بشكل ثابت، فحجمك انت الاخر كشخص عليه بالزيادة، وانت صغير غير وانت كبير، وانت طفل غير وانت راجل شحط ملو هدومه، عليك بدفع مقابل اكبر، وعليك باكتساب مقابل ايضا اكبر.. وانت وحجمك..
المشكلة.. مشكلة حجم، أزمة أحجام، فهناك تواطؤ اجتماعي على ان يعلن كل شخص عن حجم زائد له مجاني في وسط اوكازيون يبيع فيه نفسه بشكل مرموق تجعل المشترون مقبلون عليه وعلى اتم الاستعداد لدفع مقابل كبير يصيبهم بالرضا.. فقد اشتروا (راجل)
احد المعارف حكى لي على ان جريدة ما طلبته للعمل معها، وحين وافق في باديء الامر أنبه صديقه بشدة فهي جريدة سمعتها (مش ولا بد) فاتصل بهم بعد ساعتين ليعتذر لهم، وقت الاعتذار كان الحجم اختلف، فقد اصبح الشخص الان من صحفي صغير الحجم الى صحفي كبير الحجم لديه القدرة على التناكه والإمارة والرفض، وبالتالي كان زيادة السعر والمقابل برضا تام من الجريدة هو رد الفعل الاول، وكان رفض الصحفي بشكل حاسم هو رد الفعل البديهي على هذا الاسلوب في التعامل، ومابين البايع والشاري يفتح الله
المشكلة.. كل المشكلة، في السلع ذات التغليف الزائف، وما اكثرها على الأرفف، تعلم جيدا انك امام شخص عادي جدا بعد كفاح 30 سنة وصل أخيرا لمنصب يرضى هو عنه، وتعتبره انت منصب عادي جدا لشخص عادي جدا، الا ان كل تلك العاديات التي تراها لا يراها هو، فهو لم يصدق ما وصل اليه بعد، لذا بدأ في زيادة حجمه لمحاولة ملء ذلك الكرسي رغم ان تاريخ الصلاحية اوشك على الانتهاء، ولا داعي لهذا الحجم الزائد فاذا كان قد عاش 30 عاما مرمطون كم تبقى من العمر ليعيش مش مرمطون؟
ماعلينا.. اعتقد ان كل انسان يباغته حجمه الحقيقي قبل أن ينام بثوان معدودة، ياتي اليه شبح في حجم ما هو وحده يدركه تمام الادراك، ليرى نفسه جيدا قبل أن يسلم أمره لله ويسافر لمملكة النوم.. فقد لا يتمكن من الاستيقاظ مرة أخرى، وقد يحتجز في جمارك العودة بسبب وزن زائد.

?????

2009-02-05T00:29:00.001+02:00

ليه والناس نايمة بتحس انك لوحدك اوى، ولو صحيو بتحس ان فيه دوشة جامدة اوى؟

ليه الناس وشوشها بتتغير لما نفوسها بتتغير؟؟ أمال المنافقين بيفضلوا منافقين ازاي؟

ليه بنفضل بعيد عن ناس بنشيلها مشاعر حلوة؟ ونفضل بنعز بعض بس مبنشوفش بعض؟

ليه الحمير مبيعترفوش انهم حمير ومخهم تخين، والبقر برضه مبيعترفوش انهم بقر رغم انهم من جواهم متاكدين انهم بقر البقر.

ليه اكتر حاجة نفسك تصرخ بيها في وسط كل الناس بتبقى الحاجة اللي هتنزل كلمة The End؟

ليه الناس بترضى تبيع دماغها لأبالسه؟؟ وبعد فترة يكتشفوا انهم شياطين فعلا بس الغباوة انهم يفضلوا بايعين.

ليه الغبا وبا؟

انا خلصت.. ياريت محدش يسالني ليه هذيتي الهذي ده، ليه تحط تعليق على حاجة معجبتكش اصلا!!!

about being spontaneous

2009-01-05T01:07:00.004+02:00

(1)

تكاد ترى ملامحه من على بعد، وجه مألوف يعيد تعريف معنى الراحة لديها من جديد، يدس فمه فيطبع قبلة على صفحة جديدة في الحياة، تفتحها لتقرأ بسم الله الرحمن الرحيم، وتتوكل على الله.
عرفت كثيرا معنى الخوف، الخوف مما لا تعرفه، الخوف من تلك العلامة الكبيرة التي تستفهم عما سوف يحدث.. حان الوقت للكف عن الخوف، فكرت.. ربما عليها ان تعيش قليلا تلك الحالة التي تغمرها من حين لأخر حين تنادي بالمغامرة والمخاطرة والعيش بلا حدود وتصبح قائدة التمرد والثورة.

(2)
حفنة من الرمال تملأ حيزا من الفراغ، حفنة تتحكم في مصائر الجميع.. لست وحدك من يحاول تحطيم ذلك الزجاج، فكلنا هذا الرجل، أما أنا فلا أقوى على المشاهدة، اعتدت التدخل في الأحداث والتعديل فيها.. فلا تتوقع ان اتمسك بتلك الساعة الرملية كثيرا.. ملولة أنا يا سيدي، ومثلي لا يعرف العجز أمام الملل، فأنا مدمنة للتصرف السريع، خاصة التصرف العفوي، فاعذرني ان لم استطع الوقوف سامدة.

(3)

أفتقد الكتابة، تلك الكلمات المنسابة بلا تفكير عميق ولا مراجعة مقلقة، متى تتاح لك الفرصة كي تكتب ما يخطرلك بلا أدنى تفكير في العواقب؟؟ متى تستل قلمك لتكتب وتقتل من تشاء وقتما تشاء.. كم مرة ستسنح لك تلك الفرصة كي تكتب وتهرب سريعا..

welcome 2009

2009-01-03T02:04:00.007+02:00

على هامش بوادر 2009 31 ديسمبر، اقضي اطول يوم في حياتي ما بين مدينة نصر والمهندسين والتحرير والمعادي ومابينهم مليون حدث وشخص وصدف وحياة، أعلم اني اختم 2008 واستهل 2009 بشكل مختلف

31 ديسمبر في مكتبة البلد بالتحرير، يعطيني "شخص عزيز" جنيها ويشرح لي حكمة الجنيه، فحين تبدأ عامك الجديد بهدية من شخص غير متوقعه ستصبح تلك الهدية تميمة حظ لديك.. حسنا على أية حال نيته الطيبة فقط كانت كفيلة باسعادي جدا :)

31 ديسمبر في مجلة صباح الخير، احصل على احلى قطعة شيكولاتة تذوقتها في حياتي بالصدفة اسمها Patchi :)

1 يناير 2009، اسير على كورنيش التحرير، ادندن اغنية "انريك اجلاسياس" Rhythm Devine" وافتح بالصدفة محطة نايل اف ام لاجد الاغنية في ذروتها.. اشعر بالانطلاق :)

1 يناير 2009، يتساءل البعض ماذا فعلت صبيحة 2009، أرد بتلقائية (أنا أعمل على حل مشاكلي)

2 يناير 2009، تجمع عائلي محبب، ووليمة وعيد ميلاد وابتسامات، ويبقى البرد الشديد الذي جعلنا جميعا (نتدفى في بعض) من أفضل ما يمكن حدوثه في بداية العام.

3 يناير 2009 أشاهد فيلم My Sassy girl، ورغم انه يمكن اعتباره فيلما عاديا، الا ان توقيته مع تزامن الحالة النفسية وكل الموجودات المحيطة يجعل من الفيلم حالة فريدة خاصة جدا، وسط دموع كثيرة تاثرا بمشهد معين فيه، اجدني أكثر من سعيدة بعد نهايته.. مهيبرة.. مبسوطة.. مبتسمة.. اتحدث لكل من صادف ووجدته مستيقظا في هذا الوقت المتأخر، وأكتب هذا البوست

عام سعيد على الجميع.. يارب اجعلها سنة حلوة وطيبة يارب.. وارفع الغم والكرب على كل من يعانون يارب :)

-------------------------------------------

تذييل سنتيح:

لست ادري لماذا يحتفل الغالبية بالبوست المائة لبلوجاتهم، هو البوست الـ 100 ايه الفرق بينه وبين الـ 99 والـ 46؟؟

ماعلينا، كل سنة وانتو طيبين

وداعا ديسمبر 2008.. وداعا بقى.. غور

2008-12-28T23:05:00.006+02:00

ديسمبر، أو كانون الأول، أو شهر 12، أو اخر شهر في السنة، أو شهر عيد ميلادي، أو شهر عيد ميلاد وئام واحمد ومحمد واحمد أوديب ورانيا جلال، أو شهر وخلاص.. المهم انه شهر يحمل 31 يوم

ولهذا الرقم قدسية، فلم يكن الشهر محملا بـ 28 يوم مثل فبراير مثلا، او 30 يوم مثل نوفمبر، انما هو واحد من اولئك الاشهر الطويلة التي لن تنقضي عليك بسهولة، فلن تنقضي قبل ان تقضي على جزءا منك، حتى ولو كان ابسط تلك الاجزاء عام ينقص من عمرك. ابتهج لست هنا كي ارثي عام مضى من عمري، فقط وددت ان انحني احتراما لقوة ذلك الشهر هذا العام.

ديسمبر 2008، اذا أرّخت لهذا الشهر فلن انتهي، ففيه انتهت سنين وبدأت أخرى.. كم التغيرات التي شهدتها حياتي في ذلك الشهر منذ أوله وحتى آخره ليس لها وصف، فهي كثيرة وثقيلة، ثقيلة بالشكل الذي يجعل البكاء في صمت مطبق وحده رد الفعل اللاارادي الصادر عن ذلك الحصر.. ورغم أن الشهر أوشك على الانتهاء فلم يتبق فيه سوى بضعة أيام، إلا أني لم أعد أضمن ان تمر تلك الأيام بسلام

هل يمكن أن يحمل شهر واحد كل تلك التحولات؟؟ اينعم في سبتمبر الماضي غلبتني هفوة تغيير وروح شجاعة ومبادرة لم اعتدها من قبل، لكن فعلا لم اتصور ان تأتي ريح التغيير محملة بتسونامي خارق.

إذا كان ما اكتبه هنا يفتح لي بابا او يغلق لي اخر او تتأثر به حياتي، فارسل الى من يهمه الأمر.. كفاية.. اكتفيت من الشهر ومن التغيير ومن سرعة الاختلاف ومجريات الأمور، فلتتوقف قليلا أو فلتعطني الريموت ودعني معه وحدنا.......

-------------------------------------------------------

ع الهامش: إليه.. أشعر الآن بشعورك حين اختنقت من شهر أكتوبر، رحمك الله تعالى.

هذي خماسي

2008-12-13T05:54:00.003+02:00

شكل خماسي، يتكون من خمس اضلاع، لن تعلم له شكلا محددا ولا اسما محددا، فهي مجرد خمس عوامل تتضافر معا لتخرج هذا الشكل.

البرود: يغلف كل شيء، تراب تمكث تحته الاشياء، وكالعائد من السفر تشعر بارهاق وتعب لا يساعداها على نفخ ذلك التراب كله، وبعيدا عن التراب فذلك البرود لا حل له على أية حال تدع كل شيء مكانه، وتكتفي باصطناع الراحة.
التوقيت: هو البطل فى كافة المواقف، كثيرا من التصرفات كانت لتتغير في توقيتات مختلفة.
التوقعات: الأضخم والحدث الاكبر على الاطلاق، والنوع الخائب منها هو البارز دوما، كم من توقع وخاب بالسلب او الايجاب.. تتوقع ان تصبح مكتئبا واذا بالمفاجآت تتوالى، احذر من التوقعات
اللون الرصاصي: ولعنة الله الف مرة على اللون الرصاصي الكئيب، اعتقد ان اللون الرصاصي وجد ليجعلنا نقدر الالوان الواضحة كالاسود والابيض وحتى الفوشيا المسخسخ.. اذا بحثت عن اضاءة مناسبة لاحداث كئيبة في فيلم عن الاموات وضحايا الحروب وفراق الأحبة ممزوجة بيأس مصاصي الدماء حتى، لن تجد انسب من اضاءة رصاصي، تضفي لونا رصاصيا ولا تنس دهان الحوائط بنفس ذات اللون لتحل اللعنة على كل شيء.
التغيير: اقف أمامه خاضعة تماما.. بالقدر الذي اخشاه افتقده، وبالقدر الذي افتقده احسب نتائجة، وفي كل مرة يصبح المجهول وعلامات الاستفهام اسياد الموقف، وما علينا الا تلبية فرض التأقلم.

تحياتي الى كل المتأقلمين في حياتهم.. فليبارككم الرب

El Maquinista

2008-12-11T03:09:00.007+02:00

إلى أي مدى يمكنك تحمل الذنب؟

اذا قررت ان تحدد هويتك من جديد، هل ستتوقع الخير أولا أم الشر؟؟

في لعبة المشنقة بأعلى، هل تختار أن تكملها بـ Mother أم بـKiller؟

مفترق.. فاختار

-------------------------

فيلم The Machinist من بطولة كريستان بيل، يحكي قصة مواطن عادي عمل حادثة بعربية ذات يوم ادى فيها لاصابة طفل عمره ميزيدش عن 10 سنين، بقى عنده صرع اثر الحادثة، اما الشخص نفسه "تريفور" نسى تماما اللى حصله بفعل "النسيان المدفوع"، وكمل حياته.

الفيلم بتبدا احداثه بانك بتتعرف على "تريفور" بانه حد عادي جدا، واحد بيعاني من الارق بقاله سنة، مبينامش غير خمس دقايق اذا عرف يتحصل عليها، وبالتالي تجده شخص هذيل اقرب للمواطن المطحون

بعد فترة من الاحداث المتداخلة وهلاوس بيشوفها وبيعاني من تانيب الضمير البشع، بتتكشف الحقيقة تماما، لحد ما يقرر انه يسلم نفسه عشان ينام اخيرا او بمعنى ادق "يرتاااااااااااااااااااااااح".

-------------------------

كريستان بيل شخص قوي جسمانيا، ازاي تحول شخص جسمه عضلات للمواطن المطحون؟؟

كريستان عمل ريجيم اقرب ما يكون للاضراب، وبدا يشرب سجاير مع انه مكانش مدمن سجاير عشان تسد نفسه ويوصل بسرعة للهذال ده، للدرجة ان فيه مشهد في الفيلم بيجري فيه البطل، اتعاد المشهد اكتر من مرة عشان عضلات رجلين كريستان كانت غير مؤهلة للمجهود العادي زي الجري، وبالتالي هو عاني فعليا من انه مكانش بني ادم طوال تصوير الفيلم لحد ما استرد صحته.

الفيلم بسيط، مفيهوش فكر عبقري او اساليب مفاجئة، بس جديا يستحق المشاهدة.. ع الاقل كفاية الراجل تعب معانا يعني وتحول للمواطن المطحون.

فيه شيء عم بيصير

2008-11-23T01:19:00.003+02:00

فيه شيء عم بيصير.. فيه شيء بده يصير
احن لصوت فيروز.. فهي الوحيدة ربما التي تغنت بكافة تلك الهواجس والحالات، تلك التي تطاردني دوما، ومع العلم باني اعلم مسبقا قضية القدر وانه عاجلا او اجلا كافة علامات الاستفهام ستتلاشى الا ان الخوف دوما هو الاسلوب الوحيد المسيطر على تلك الحالات
اخشى النهاية واخشى البداية ايضا، اصبحت اخشى كافة شيء.. هل يكفي ان نرغب بالشيء بقوة كي يحدث؟؟
لا زال هذا السؤال يؤرقني منذ ان بدات التفكير به منذ 5 سنوات وحتى الان
اخشى التورط.. ارغب في الهروب قبل ان يصير شيئا ما
رغبتي الاساسية في الخروج من تلك الدائرة، ان اصبح خارج جسدي، اشاهد واراقب من بعد، وبعد ان اطمئن على ان كل شيء اصبح على ما يرام ساعود
اعدك اني ساعود، فقط عدني بان كل شيء سيصبح على ما يرام، ارغب في شخص يتمكن من ترتيب تلك الفوضى.

فيه شيء بده يصير فيه شيء عم بيصير

لاتزال فيروز تشدو.. ولا ازال مرتعبة من العواقب.. ولااريد التورط اكثر من هذا، اود ان احذف بعض الاشياء من القائمة، ربما احذف اسمي شخصيا من تلك القائمة لاعلن عدم ملكيتي لها او مسئوليتي عنها
"اتوكل على الله.. فقط اخشى التورط.. ارغب في الهروب من كافة شيء.. لست كما كنت كي اتمكن من الصمود"

اجب عن الاسئلة التالية

2008-10-14T00:05:00.004+02:00

اختر مما بين الأقواس:

(إما ان تكون شخصا يعيش حياته - أو أن تكون شخصا يفكر في حياته)

(إما أن تحلم أحلامك بنفسك- أو ان تصبح جزءا من حلم شخصا آخر)

(إما أن تعبر عن رأيك- أو أن تريح عقلك من التفكير بلا داع)

(إما أن تحيا لتتعلم - أو انتقي شكل الشلته* التي تريد أن تكونها)

(إما أن تخلص - أو تتوقف عن المطالبة بالتقدير)
------------------------------------------------

* الشلته: ايوة هي المخدة اللي بنقعد عليها دي، ومش غلطة لغوية ولا حاجة انا قاصداها

بألف وجه

2008-10-11T22:29:00.003+02:00

سافصح لك عن سرها، الموضوع في غاية البساطة، وبسيطة هي ايضا، الحياة لا تستحق كل هذا التعقيد الذي نحملها اياه.. فقط اقتنع بانك ستقابل الف شخص في وجودها.. هي لا تستدعيهم، هم الذين يحضرون بشكل مباغت لها ربما أكثر منك..
والحل لتلك المباغتة؟ استعد لتلقي وامتصاص المفاجأة دون فزع.. واتقن الارتجال جيدا.. قد تصير محترفا يوما ما.. من يدري؟

بصوت هاديء شبه نائم تحادثك.. تشعر وكأنها تتحدث اليك من احلامها، تشعر ايضا انك بسهولة ستستدرجها، هي لن تفكر كثيرا قبل ان ترد عليك فستخرج منها بالاجابة الصريحة الصادقة بسهولة، تشعر وكأنها ابنتك أو اختك أو ذلك الحضن الدافيء الذي ستلقي اليه كل ما اتعبك من الحياة يوما، وما ان تصل للنقطة التي ستدرك فورا انها صارت طوع بنانك، ستفاجأ بصوت اجش يرد عليك "ايه؟".

بصوت جاد وحازم تقنعك بأن سبب نوم الأفيال لمدة طويلة هو أنهم ربما يحلمون بالتهام ارانب برية تسبح في فضاء ذو لون بمبي.. ستلقي اليك قولا محملا بالـ "اي كلام" وستقتنع فورا بكلامها، ولما لا يوجد فضاء ذو لون بمبي؟ بهذا الصوت الجاد وتلك النبرة الحازمة لابد وان نحاول جعل الفضاء بلون بمبي.. فلنخوض التجربة معا.

طفلة تلعب بكل ما اوتى لها من قوة، تلك هي الشخصية التي ستجدها في صوتها الطفولي الشقي، حالة من البهجة ليس لها معنى ولا مبرر ستدفعك فورا للتفكير في حدائق خضراء وتذكر وقت المدرسة واللعب والبحر.. ولا تنسى قلعة الرمال، لعبة كل الأطفال.

جفاء تام وملل شديد في صوت آخر ستسمعه، يجعلك تندم على الدقائق التي تحسب عليك بلا ادنى داع، والأسوأ أنك بجانب المقابل المادي الذي ستدفعه، ستدفع جانب معنوي بعد أن يصيبك الملل والزهق لمدة ساعة او ساعتين، وستجد جملة واحدة تتردد في رأسك "موت وخراب ديار"!!!

الشيطان وحده سيحضر تلك المحادثة، وبذلك الصوت لن تجد مفرا من مصاحبة الشيطان قليلا لتستمع الى ذلك الصوت، ضماني الوحيد اليك هو ان تلك المحادثة لن تستمر طويلا، استعد للتحول.

اللعبة لاتزال مستمرة، فمؤشر التغير لا يهدأ اطلاقا، زئبقي النوع شديد الحركة.. استغل الموقف وغير اللوكيشن والديكور كلما مللت الشخصية، وستتغير الشخصية بتغير المكان سريعا، فقط اتقن فن الارتجال، كيلا يصاب المشاهدون بالملل، فالمسرح لا يملك خاصية الفواصل الاعلانية، لاتملك سوى ستائر قرمزية، واذا اسدلت الستائر اعلنت وقت المغادرة.

حان الوقت

2008-09-26T01:46:00.006+02:00

ساعات الحياة مبتديكش فرصة تتأمل، فجأة تلاقي رياح التغيير هبت عليك وفجأة الحياة اتغيرت، وفجأة انت كمان اتغيرت

كل ده وانت ملكش اي يد في اللي حصل..
ايه اللي حصل؟؟ ولا حاجة اتغيرت.. ماشي، طيب اتغيرت للاحسن ولا للاوحش، متفرقش كتير يعني هو انت قادر ترجع زي زمان اصلا؟؟ اقبل بالوضع الحالي وتأقلم يا فندم
قليل جدا بقى لما بتقرر بنفسك انك تتغير والاكثر ندرة انك تحقق اللى قررته ده، اغلب الاوقات بتبقى قرارات عنتريه، في لحظة قلت انا هتغير، وبخ على كدة

عامة.. خلينا نجرب وادينا مش هنخسر حاجة.. ومين عارف، يمكن ميطلعش قرار عنتري

فلنتقابل بعد حين :)))

ع الهامش:
تحياتي لصاحب شعار حملة أوباما Change We Need
ومن منبري هذا أقوله، أبدعت يا معلم

pay it forword

2008-09-14T01:00:00.006+02:00

What did you ever do to change the world?

Like some other kids, 12-year-old Trevor McKinney believed in the goodness of human nature. Like many other kids, he was determined to change the world for the better. Unlike most other kids, he succeeded.

When someone does you a big favor, don't pay it back... Pay It Forward

1- It has to be something that really helps people.

2- Something they can't do by themselves.

3- I do it for them, they do it for three other people.

These are the rules when you pay it forward

It's just a good quote from the movie:

I guess it's hard for people who are so used to things the way they are - even if they're bad - to change. 'Cause they kind of give up. And when they do, everybody kind of loses.

حلقات مفرغة

2008-09-09T04:56:00.009+02:00

"فسفوسة"

من فضلك لا تحقر من شأنها ، فهي صحيح قد الفسفوسة ولكنها تتقن دورها تماما لتعمل على تشويه منظر الوجه بشكل جيد، وتجدها واضحة بارزة في مكان مميز كي يتمكن الجميع من ملاحظتها والتعليق المعتاد عليها "على فكرة انتي عندك فسفوسة" ..

قال يعني وانا نازلة الصبح مشوفتش منظر خلقتي في المراية، وقال يعني معرفش ان عندي.. تعليق سخيف!!!

الحلقة تبدأ بظهور الفسفوسة ثم يأتي الاكتئاب بسببها، فتزداد الفسفوسة نضجا، ويزداد الاكتئاب، والاكتئاب من شأنه احداث الفسافيس، فلا تذهب الفسفوسة ولا يذهب الاكتئاب وتصبح الحلقة دائرة بين الاكتئاب والفسفوسة.

"الأكل"

فلنجعلنا محددين "الشيكولاتة" ولعنة الله على الشيكولاتة صاحبة الاوزان الثقيلة، والصديقة الصدوقة للاكتئاب المضاعف الذي يلي الفسفوسة.

تكتأب فتتجه للشيكولاتة لتزداد وزنا، لتكتأب زيادة، لتتجه للشيكولاتة، وهلما جره.. ولا مفر من الشيكولاتة.. انه الفخ يا ولدي

مؤامرة

2008-09-07T04:42:00.003+02:00

هي المؤامرة المستحكمة فلا ترهق نفسك كثيرا، وحاول ألا تستسلم لهم.. ستجد الضربات من كل صوب وحدب، وستنبهر بعدد الأشخاص الذين يهاجمون بشكل منظم، أما الذهول فسيصيبك حين تتعرف على هوية الأشخاص نفسهم لتكتشف أنهم جنودك -الذين كانوا جنودك فيما مضى- فانسى كل الصلات والمعارف، واكشف عن خنجر مسموم مدبب في وقت ملائم بعيدا عن الأعين والنظرات.. واغرسه بقوة ودون تردد .. لاوقت أكثر من هذا لتضيعه فلتضغط أكثر وبحزم قوي لتنهي المسألة تماما دفعة واحدة وليستقر الخنجر في قلبك.

أو تقوقع وانعزل إذا استطعت.

استناد

2008-09-03T03:00:00.005+02:00

هي لن تدعي القوة، فهي ستكتفي فقط بايماءة رأسها والتي لن ترها عبر الهاتف.. ولكن ربما ستستشعر في صمتها سكونا لم تعهده، قد تبدي تعجبا.. ولك مطلق الحرية في ابداء أسوأ الآراء بشأنها، لك مطلق الحرية في الحكم عليها كيفما يحلو لك.. هي لن تعترض كثيرا فهي تؤمن جدا بأن الاختلاف في الرأي يفسد للود ألف قضية وقضية.

أما قضيتك سيدي الفاضل فهي معقدة بشدة، لذا لن تستمع إليك من منطلق الناصح الأمين، أعدك أنها ستتألم لألمك، وقد تباغتها دموعها تنفيسا عن ذلك الألم.. وستصاحبها فكرة احتوائك أياما طويلة، وقد تشعر بالذنب لانها لم تتمكن من محو حزنك لفترة، .. إلا أنه بعد كل تلك المشاعر النبيلة والتي لن تستفد منها أي شيء.. سيبقى الأمر على ما هو عليه

فلا تبتئس كثيرا.. يمكنك الاستناد عليها إلى أن يتغير منحنى الحياة المرير ليستحيل إلى ذلك المنحنى المبتسم المبعث عليك وعليها بالتفاؤل.. فقط لا تنساها في أخبارك السعيدة.

نسيت أن أخبرك بأنها ستدعو لك.

رمضان كريم

2008-08-31T04:33:00.002+02:00

قد لاتشاء الظروف أن اتمكن من التواجد هنا لفترة..
كل عام وكل المسلمين بخير يارب
ويارب قايمة الدعاوي تستجاب وميجيش رمضان الجديد قبل ما دعاوي رمضان القديم تستجاب كلها اللهم امين يارب
:))))

اغمى عليك قبل كدة؟

2008-08-28T23:29:00.004+03:00

وقفت في الطابور الممتد والذي لم تتمكن من رؤية نهايته نظرا لقصرها.. وكلما زاد الطابور طولا كانت الشمس تزداد سخونة، بمرور الوقت لاح لها الموظف الذي ستقدم له طلبها من بعيد، وقبل أن تتمكن منه تمكنت الشمس منها لتصيبها بضربة من العيار الثقيل افقدتها توازنها ليغمى عليها بشكل كلاسيكي لتقع بين أيدي الشاب ضخم الجثة الذي أوقفه القدر خلفها.

المفروض ان الشاب ده يحبها بعد كدة وتتكمل احداث الحدوتة الرومانسية، بس الواقع ان مفيش اي احداث رومانسية حصلت هو لحقها وقومها وخلصت المدرسة وخلصت الكلية وكبرت ولا شافت خلقت اللي جابوه مرة تانية D: عفوا .. هكذا الواقع.

أما الأوقع، فان كل الحاجات دي اصلا متحصلكش D:D:D:D:D:

في الأوقع.. انا عمري ما اغمى عليا حتى، ولو اني دايما متخيلة ان حالات الاغماء دي هتبقى حاجة رائعة جدا.. مش لاني هقابل Prince Charming مثلا.. اطلاقا بس الفكرة كلها ان فيه مليون موقف لو كنت اغمى عليا ساعتها كانت الحياة هتبقى الطف كتير كتير كتير.

المرة الوحيدة اللى الناس اتفقت انها تعمل الشكل اللي في الصورة ده قدامي، كان يوم ما قررت اعمل نطة حمام السباحة من على سلم الكلية ونزلت زارعة بصل بس مش في بسين بقى، في ارض الكلية S:
للامانة مش هقول اني اتألمت وبتاع، لاني اكتشفت من الوقعة دي ان اللي بيقع لمدة 15 ثانية تقريبا ولا بتحس باي حاجة، انت بتحاول بس تدرك ايه اللي حصلك.. بعد فترة بقى بتحس بكل اللى محستش بيه، وهتحس احساس بقى على ابوه يعني D:
المهم.. هتمر الايام وهفضل معتقده ان حالات الاغماء من اروع مايمكن ان يحدث للناس.. يعني في اشد المواقف حرجا لو اغمى عليك هتبقى حاجة جميلة جدا.
ولو في وسط خناقة بين اتنين بيهموك والشباشب والشواكيش حاسس انها هتطلع، لو اغمى عليك ساعتها هتبقى احلى حاجة حصلت لعلاقتهم.
ساعات في البيت كمان بتتمنى انه يغمى عليك، لما صوت الوالد والوالدة يعلى اوى وتبقى تعبت من الخناق والصداع بتتمنى يغمى عليك وتصحى لما يخلصوا عشان تصحى في الهدوء كدة.
لما الدنيا بتقفل اوى فى وشك وكله بيبقى سواد في سواد الاغماء بيبقى ضي الامل الوحيد D:
مواقف كتير متخيلة فيها ان حالات الاغماء هتبقى هايلة جدا فيها.. ياسلام لو كان الاغماء ده بـ "زرار"، كانت الحياة بقت حاجة تانية خالص.. موقف معجبنيش دوس ع الزر، اتخنقت جدا من الحياة دوس ع الزر، عايز تروح م الشغل ومش عارف دوس ع الزر برضه.. يعني هما هيشغلوك وانت مغمى عليك؟!!
بستغرب على الناس اللي بيغمى عليهم من اقل حاجة.. نفسي اعرف اعراض الاغماء والفوقان برضه، طيب اللي بيغمى عليه ده بيحلم بحاجة وهو نايم كدة؟؟ ولا بيبقى حاسس باللي حواليه ولا ايه الموقف يعني؟؟
ياخوانا اللي اغمى عليه يبقى يقول للي لسه مأغماش، واهو هيبقى يشيله لما يغمى عليه، هنردهاله يعني :)