الاثنين، يوليو 31، 2006

كله عشان السبابيب !!


لما ربنا يسبب الأسباب يبقى أحنا مندخلش السبابيب في بعضها .. خليك فاكر تلك المقولة لأنها حكمة بحق لو فهمتها كويس.
السبوبة هي العمل المتقطع غير الدائم وجمع سبوبة في معجم الألفاظ العامية اللي بيني وبينك "سبابيب" .. وللعلم السبوبة تحقق دخل أعلى من الوظيفة الدائمة –بشرط أن تطبق المقولة السابقة-

في مصر عدة طرق للحصول على السبابيب المختلفة وإليك بعضها :
· إذا كنت شاب فتستطيع أن تقدم في المعارض التي يقام أغلبها بأرض المعارض بمدينة نصر ستحصل في نهاية اليوم على 15 جنيه دون السؤال عما إذا تخرجت أم لا .. الفكرة كلها كيف تدر عليهم الربح.
· اذا كنت من كلية ألسن أو آداب لغة إنجليزية أو حاصل على كورسات جيدة في اللغة الانجليزية فتستطيع التقدم لمكاتب ترجمة .. والترجمة بالقطعة .. وتأكد انك ستحصل على مبلغ جيد.
· إذا كان ليك في اللغة برضه وزكي اجتماعيا – أو غبي وبتعمل تحسين- وفي كلية آثار أو إرشاد سياحي .. تواجد في منطقة سياحية مثل الأهرام أو أمام المتحف المصري والزق للسياح هناك وقدم لهم جولة سياحية بعمولة ممتازة.
· بنفس السياح سابقي الذكر خدهم لبازار معين تكون متفق فيه مع صاحب البازار وخد عمولتك منه لأنك جبتله مشترين وطبعا هيفهم السياح انك عاملهم خصومات.
· إذا كنت فتاة وتجيدي استخدام الخرز أو لا تجيدي مش فارقة .. فاحضري سلك سنارة البكرة بجنية ونص وهاتي الخرز .. وأدخلي الخرز بشكل متناسق وألوان متناسقة داخل سلك السنارة وبيعي العقد بجنيه لأصدقائك .. ستحققي ربح.
· إذا كنت فتاة كذلك فانضمي لجمعية خيرية مثل رسالة في قسم الورشة الفنية وستتعلم كيفية عمل الدبابيس ذات الأشكال وتستطيع أن تقوم ببيعها.
· تستطيع أن تقدم في شركات التسويق ولن تكلفهم شيء فلك نسبة مما تبيع .. أي انك إن بعت ستحصل على شيء وان لم تبع .. فبالسلامة.
· السبوبة الكبيرة بقى شرط لازم تكون متخرج .. قدم انك تكون في خدمة العملاء فى موبينيل أو فودافون .. ومتقلقش من انك ترتبط بوظيفة هما أصلا هيشغلوك سنة وخلاص على كدة إلا لو أثبتّ نفسك فيجددوا معاك العقد واقل مرتب هتاخده في الشهر 1000 جنيه .. وادعيلي.
· الجديد في عالم السبابيب بقى .. كورس صيانة موبايل اسأل عليه هتلاقي الموضوع ده منتشر تاخده في أسبوعين بالضبط بـ 150 جنيه .. ثم أصبحت قادر على تصليح الموبايلات وقدامك حل من أتنين إما انك تصلح الموبايلات بتاعة صحابك وكل موبايل عليه عمولتك أو لو محوش قرشين افتحلك محل متر فى متر .. وبرضه تدعيلي.
· وأنت رايح تاخد كورس في صيانة الموبايل هتلاقي جمبه كورس برضه صيانة كمبيوتر أغلى شوية .. خده برضه هينفعك .. وبرضه كمبيوترات صحابك تعدي عليك .. ومش شرط تدعيلي المرة دي.
· لو عندك كمبيوتر واهلك مركبينلك دي أس إل وعندك سي دي رايتر CD writer .. نزل الأفلام على السيديهات وبيعها لصحابك او قدام المدارس والكليات والجامعات .. ومتطلبش فيها كتير .. اشتري السيديهات بالجملة هتقف عليك الواحدة بجنيه ده لما تكون اشتريت أغلى حاجة .. وبيعها ع الأقل باتنين جنيه هتكسب الضعف وساعتها أحسن لك تدعيلي بقى.
· وأخيرا إذا كنت تكتب جيدا ونستطيع القول انك صحفي فتستطيع أن تذهب إلى أي جريدة لتعمل بالقطعة!!!

وأخيرا لا تنسى.. أهم حاجة السبابيب متدخلش في بعضها .. ربك بيسبب الأسباب وأكيد فيه سبب إن ربنا خلاك تقرا الموضوع ده !! ولو عندك سبابيب منعرفش عنها حاجة قول واهو كله عشان السبابيب.

هناك 11 تعليقًا:

أُكتب بالرصاص يقول...

بسم الله ماشاء الله عليك

يعني انت كده ماخلتيش حجة للشباب يقعد لى لاقهوة بحجة مافيش شغل

بس يا عم اتعب نفسك شوية ، روح اتعلم لك ايتها حاجة وعيش حياتك وشغل مخك ،

برافو عليك
ان عن نفسي ، هأطبع الحاجات دي كلها ، بعد اذنك طبعاً وابدأ أدرسها ،

واسوف ايه اللي ينفع واعلمه للواد ابني من دلوقت

بس

خاي الفهلوة بتاعتا تدخل في الموضوع والسبابيت طلع نصب في نصب


على كل حال

أفكار جيدة والله
تسلمي

Mai Kamel يقول...

ولله انا لما حطيت الموضوع ع البلوج كان نفسي حد يعمل ان شالله بحاجة منه.. فكون الموضوع عجبك وهتجربه فانا اكون متشكرة.. متنساش بس تقولى النتيجة ايه!! وربنا يوفق

غير معرف يقول...

كلها شغلانات مش مستقرة
ولما الواحد يبقى عنده 33 سنة حيفضل كده برضه

Mai Kamel يقول...

ولله هو السبوبة اصلا يعني شغل متقطع.. فمش فاهمة ايه غريب في الموضوع بالنسبالك؟!!!

محمد أبو زيد يقول...

بلد سبابيب صحيح

كلبوزة لكن سمباتيك يقول...

موضوع رائع و أفكار ايجابية و ممكنة جدا
جزاكي الله كل الخير
و كثر من امثالك
----
شرفينا

Dr. Tantawy يقول...

اسلوبك حلو اوي
و كفايه اخيار اسم عجبي :)
للأمام دائما

وعلى رأي مديرة حركة كلابيظ من أجل التغيير
افكارك ايجابيه ههههه

Me2nour يقول...

,lاله يا ميوية
مش أحسن من قعدة الشباب على القهاوي والصرف من جيب بابا و التلطيش في خلق الله بحجة إن مفيش شغل
اللي بيعمل كده يستاهل يتقال عليه راجل أو بنت بميت راجل
واللي قاعد في بيتهم بيعمل شات و يشرب سجاير و يقول دي بلد ملعونة و انا مشتغلتش علشان الواسطة معرفش يتقال عليه إيه
أمريكا بقت أكبر دولة في العالم لأن شبابها مستنوش التعيين على الكافي شوب... لكن كل من جاتله فكرة حاول ينفذها مهما كانت المعوقات

غير معرف يقول...

انا شامم فى الموضوع ريحه تريقه
البطاله غول يلتهم شبابنا فالبطاله احد العوامل الرئيسيه للانحراف
مش عيب ان الواحد يدور على اي شغل ويشتغله يعنى سبوبه زى ما انتى سمتيها فى هذا الزمن الردىء الذى تخلت فيه الدوله عن التعيين فى الوظائف العامه او فتح مصانع للتنميه وتشغيل الايد العامله بل بالعكس يوميا تغلق المصانع ويشرد عمالها تحت اسم الخصخصه والمصمصه والمعاش المبكر واللى مش عارف ايه, هى دى السبوبه الحقيقيه اللى بيستفاد منها راكبى قطار الخصخصه ومصمصه الشعب حتى النخاع
مش ترجعى تقولىلى سبابيب الشباب اللى حصلهم اكتئاب هم واهاليهم بعد ما صرفوا عليهم دم قلبهم وقاعدين يتفرجوا عليهم ومش عارفين يعملولهم حاجه غير انهم يقطعوا من مرتباتهم من لحم الحى ويدوهم المصروف علشان يصرفوا لحد ما تجيلهم فرصه ويشتغلوا ويقدرو يصرفو على نفسهم
المهم انتى طرحت نماذج ايجابيه ما فيهاش عيب غير صاحبنا اللى متفق مع صاحب البازار
فيه نموذج تانى والنموذج ده بيعذبنى وبيألمنى جدا كل يوم لما باشوفه وهو الشباب او الفتيات اللى بيبيعوا على القهاوى والمحلات وتقعد تسمع منه قصيده عصماء فى شرح المنتج اللى بيبيعه بعد ما يسمعك تاريخ حياته اسمه ومتخرج من ايه ومندوب لشركه مشعارف ايه الدوليه وتجد انه لا احد ينصت اليه اصلا من الجالسين على المقهى وهو يسابق الزمن فى الكلام والشرح للمنتج الذى يحملهثم بعد ذلك ينصرف دون ان يكلف احد عنائه من الرد عليه ,فيؤلمنى جدا هذا المنظر وااسف لحاله
كفايه بقى تريقه على الشباب اللى ما لهمش ذنب
وشكرا لسعه صدرك واتمنى انى ما اكونش فهمتك غلط انك بتتريقى
على فكره انا مش منتمى لطابور العاطلين انا شغال فى مكان متميز جدا فى احدى اجهزه الدوله ومرتبى معقول نسبياعن اقرانى فى الوظائف الحكوميه الاخرى لكن برضه ما بيقضيش لذا عندى سبوبه بعد الظهر

Mai Kamel يقول...

اتمنى انت كمان متكونش فهمتني غلط.. السبابيب اللى انا قلتها كلها شفتها قدامي وبتحصل ومش شايفة فيها اي عيب يعني مش تريأة.. اسلوبي ساخر ده طبع فيا.. انما انا مش بتتريق اطلاقا على الشغلانات دي بالعكس انا بقولها عشان الناس تعرفها واللى يقدر يعملها ليه لأ؟؟؟؟؟

shrioo يقول...

شكرا على التوضيح وعلى اسهاماتك فى طرح بعض الحلول لمشكله البطاله لكن لا داعى لاطلاق اسم السبابيب عليها حتى لا ينفر منها الشباب ويعتبرونها اعمال وضيعه وبالتالى يحجمون عن العمل ويقعوا فريسه للاكتئاب