أنا أحب = أنا أعاني

ليه قصص الحب العظيمة بتتقاس بمدى المعاناة والأسى؟ ليه فيلم زي Love story من عمالقة الافلام الرومانسية، عبارة عن واحدة بتموت بالسرطان؟

ليه فيلم The Notebook الحبيبين بعد ما كملوا حياتهم مع بعض وخلاص كان ممكن ننتهي عند النهاية العادية عاشوا سوا وخلصنا، وضمنيا كلنا عارفين ان كل الناس هتموت يعني، بس لأ.. إزاي؟؟ ودي تيجي؟؟ لازم يموتوا في الاخر برضه، وحط شوية كآبة ياعم على الاحداث.

حتى الفيلم اللى تلات اربع البنات اللى اعرفهم بيموتوا فيه A walk to remember وتقريبا بيحبوه عشان البطلة قالتله مش هتيجي جمبي غير لما تتجوزني عشان باباها كان قسيس، بس المهم، برضه ماتت بسرطان وجوزها اتفحت عشانها.. وتقدر تلاحظ ان قصته لا تختلف كثيرا عن Love Story أو حتى فيلم Sweet November.

حاجة م الاتنين.. يا السرطان ما بيحلاش غير للحبّيبه، يا الحب مبيحلاش غير مع الكآبة والمعاناة والأسى، انما اتنين حبوا بعض واتجوزوا والحياة حلوة دي يبقى عليك وعلى ديزني ومشتقاتها، أو كدة هيبقى فيلم مقاولات بقى!!!!

انا فعلا مش فاهمة ليه الغم؟؟ لو عايزين يحطوا لمحات من الحياة الواقعية يا عم ماحنا غرقانين في الواقع، ارحمونا شوية من النكد.

لا تليفزيون لا

بناءا على الأحداث التالية، توصلت للمقولة الحالية: "مبقاش فيه حد بيقول، الكل بقى بيهيء"

افتح التليفزيون قلب فيه شوية هتلاقي شوية برامج كتير عن الأغاني والمغنيين أو بمعنى أدق المؤديين، وكل واحد بيتكلم عن كليباته الداعمة للحرية والمناضلة للنمطية والتقليدية، والمناصرة لكل مباديء الثورة الفرنسية الحب والحق والخير.. وتشوف المذيع بيتكلم بجدية كأنه بيتناقش في قضية سياسية من العيار التقيل.. ييجي في الفاصل بقى الكليب عشان تتفرج على اي هبل في أي جبل، ويا خسارة الربع ساعة اللي استحملت فيها الحوار ده

قلب شوية كمان.. هتلاقي يمكن برنامج من برامج المساء، بتاعة أحداث وأخبار البلد واللي مش ممكن تلاقي فيها خبر يفرح، عيلة بتولع، واحدة ماتت، قرية غرقانه، غرامة جديدة هتفرضها الدولة.. اهي لازم خبر نكدي والسلام

المهم.. بعد استعراض الاخبار يمكن تلاقي حد محترم المحاور بيرغي معاه، بس المشكلة ان عشان تسمع كلام مفيد فانت ممكن تسمعلك ساعة كلام مفيد، ساعة الا ربع كلام مفيد، انما 3 ساعات كلام مفيد؟؟ مستحيل يعني.. كدة كتير.. كدة صداع.

الليلة كانت ضيفة الحلقة المبجلة للبرنامج المحترم 90 دقيقة المطربة الصاعدة والنجمة الأسطورية نيكول سابا.. وبكل فخر كان بيسألها المحترم برضه جدا "معتز الدمرداش" عن لو انها في كليباتها وبأغانيها بتحرض المرأة ضد الرجل.. فطبعا الست هانم ردت انها مبتحرضش ولا حاجة ده واقع و.... (شوية رغي عن قضية المرأة اللي اقل من الرجل فبتدافع عن نفسها وانها نص الرغيف)

واخيرا بيسالها لو انتي مرتبطة او متزوجة هتقبلي جوزك يقولك اقبلي الدور ده وبلاش الدور ده.. الرد بقى المفحم: "أنا عمري ما عملت اصلا عمل غير مشرف ولا لائق وبالتالي مش هيلاقي حاجة اساسا يقولي عليها لا أو آه.. ده إذا كنت مرتبطة يعني"

ابقي قابليني يا ماما، اما نشوف مين اللي هياخدك.

قلب شوية أكتر..

هتلاقي برامج كتير برضه مبتقولش.. مهو مينفعش يبقى عندك قناة مفتوحة 24 ساعة كلها هتقول، لازملك كام ساعة تهيء فيهم.. وفيه كمان حاجة كدة اسمها Fillers دي ترجمتها الحرفية (الحشو) اللي بتملى وقت للقناة، ومعظم القنوات الحالية عايشة على الفيلرز، اديني ياعم اي كلام في 10 دقايق او 5 دقايق احشرهم بين اي برنامج او فيلم واخوه.

بلاش تقلب وتدخل في مفرمة المسلسلات اللي بقت ليها قنوات اكتر من قنوات الافلام.. على ايه؟ معرفش.. قال يعني بننتج مسلسلات جامدة.. بلا ستين نيلة، المسلسلات التركية لا تقل شيئا عن ملل وبطء المسلسلات المصرية.. واهو كله بيتنح في ربع ساعة وبيتكلم في نص ساعة وبينهم فواصل اعلانية خلصت الحلقة.

مش عارفة الصراحة التليفزيون المفروض يبقى ازاي.. انا فعلا مش عارفة الحل ايه بس الوضع الحالي انا بقيت حسه ان التليفزيون بقى رغي متواصل بلا توقف.. فعلا بقى بيجيبلي صداع.

Surprise Me!

نفسي في مفاجأة جامدة جدا وكبيرة جدا ومفاجئة جدا تكسرلي العادي جدا جدا جدا
مفتقدة احساس التجريب لاول مرة.. أول مرة

:(

----------------------------------

تذييل

في يوم الاحد 5 يوليو كنت على أخري واتمنيت مفاجأة

النهاردة الأربعاء مساءا الموافق 9 يوليو

D:

He did surprise me with the best surprise ever

:))))) i'm grateful for your excistance

Love you

:)))

من أجل هذا الجدل

بعد معركة جدلية وتصرفات غريبة أشبه بالمجانين، تقبل عليه، تجلس، تشعر بابتسامات متفرقة تخترق ثغرها ولا تدري كيف توقفها.. بشكل لا إرادي اعتادت على تلك الابتسامات –المستفزة- التي تخرج رغما عنها كلما وقعت في موقف محرج مماثل.
دوامة من الصمت تقع فيها فلا تدري ماذا تقول، هي تعلم جيدا انها الخاطئة والمتهمة بالجنان بالمقام الأول.. يباغت صمتها.. يسألها "مالك؟"

تبدأ في الحديث عن كافة ملامح الجنان التي تعتريها، تنتهي من الكلام، تشعر باقتراب دوامة الصمت اللعينة مرة أخرى.. فينتشلها برفق، يعاتبها بشيء أشبه بالحكي عن كل مخاوفه من تلك المعركة الجدلية التي قد تفضي بكوارث أكبر، بعد امتصاص كل الذعر والخوف، يتلاشى القلق تماما.. تهدأ الأعصاب.. يبدأان في الحديث كما لو أن شيئا لم يحدث.. وحين يتحدثان عن الموقف كما لو أنه كان في حياة أخرى تماما.. يفاجئها بأن تلك الابتسامات المتناثرة التي كانت تتعثر فيها خلال مباديء لقائهما، كانوا أجمل ما حدث لأن تلك الابتسامات كانت مهدئات تدريجية لأعصابه (رغم أنها كانت ابتسامات مستفزة فيما مضى).

welcome 2009

على هامش بوادر 2009 31 ديسمبر، اقضي اطول يوم في حياتي ما بين مدينة نصر والمهندسين والتحرير والمعادي ومابينهم مليون حدث وشخص وصدف وحياة، أعلم اني اختم 2008 واستهل 2009 بشكل مختلف

31 ديسمبر في مكتبة البلد بالتحرير، يعطيني "شخص عزيز" جنيها ويشرح لي حكمة الجنيه، فحين تبدأ عامك الجديد بهدية من شخص غير متوقعه ستصبح تلك الهدية تميمة حظ لديك.. حسنا على أية حال نيته الطيبة فقط كانت كفيلة باسعادي جدا :)

31 ديسمبر في مجلة صباح الخير، احصل على احلى قطعة شيكولاتة تذوقتها في حياتي بالصدفة اسمها Patchi :)

1 يناير 2009، اسير على كورنيش التحرير، ادندن اغنية "انريك اجلاسياس" Rhythm Devine" وافتح بالصدفة محطة نايل اف ام لاجد الاغنية في ذروتها.. اشعر بالانطلاق :)

1 يناير 2009، يتساءل البعض ماذا فعلت صبيحة 2009، أرد بتلقائية (أنا أعمل على حل مشاكلي)

2 يناير 2009، تجمع عائلي محبب، ووليمة وعيد ميلاد وابتسامات، ويبقى البرد الشديد الذي جعلنا جميعا (نتدفى في بعض) من أفضل ما يمكن حدوثه في بداية العام.

3 يناير 2009 أشاهد فيلم My Sassy girl، ورغم انه يمكن اعتباره فيلما عاديا، الا ان توقيته مع تزامن الحالة النفسية وكل الموجودات المحيطة يجعل من الفيلم حالة فريدة خاصة جدا، وسط دموع كثيرة تاثرا بمشهد معين فيه، اجدني أكثر من سعيدة بعد نهايته.. مهيبرة.. مبسوطة.. مبتسمة.. اتحدث لكل من صادف ووجدته مستيقظا في هذا الوقت المتأخر، وأكتب هذا البوست

عام سعيد على الجميع.. يارب اجعلها سنة حلوة وطيبة يارب.. وارفع الغم والكرب على كل من يعانون يارب :)



-------------------------------------------

تذييل سنتيح:

لست ادري لماذا يحتفل الغالبية بالبوست المائة لبلوجاتهم، هو البوست الـ 100 ايه الفرق بينه وبين الـ 99 والـ 46؟؟

ماعلينا، كل سنة وانتو طيبين

حان الوقت

ساعات الحياة مبتديكش فرصة تتأمل، فجأة تلاقي رياح التغيير هبت عليك وفجأة الحياة اتغيرت، وفجأة انت كمان اتغيرت

كل ده وانت ملكش اي يد في اللي حصل..
ايه اللي حصل؟؟ ولا حاجة اتغيرت.. ماشي، طيب اتغيرت للاحسن ولا للاوحش، متفرقش كتير يعني هو انت قادر ترجع زي زمان اصلا؟؟ اقبل بالوضع الحالي وتأقلم يا فندم
قليل جدا بقى لما بتقرر بنفسك انك تتغير والاكثر ندرة انك تحقق اللى قررته ده، اغلب الاوقات بتبقى قرارات عنتريه، في لحظة قلت انا هتغير، وبخ على كدة

عامة.. خلينا نجرب وادينا مش هنخسر حاجة.. ومين عارف، يمكن ميطلعش قرار عنتري



فلنتقابل بعد حين :)))

ع الهامش:
تحياتي لصاحب شعار حملة أوباما Change We Need
ومن منبري هذا أقوله، أبدعت يا معلم

من 20 سنة

هييييه.. ولله والواحد كبر وبقى يتحسبله حساب.. لاحساب بجد يعني مش مجازا.. حساب جاري وودايع وكلام كبير كدة
في عامي الواحد وعشرين احب افتكر التطور اللي ظهر عليا بما اني بقيت م الراشدين وكدة.. اكيد مش هقعد احسب الغم والهم اللى حسيت بيه على مدار سنة يغور يعني.. خلينا فى الحاجات الحلوة.. الواحد ايه غير ذكريات وشوية حاجات فوق بعض كدة
اسباب كتير تخليني مبسوطة ان كل الحاجات دي حصلت قبل ما اتم الواحد وعشرين وابقى من الراشدين

اتعلمت سواقة وطلعت الرخصة وبقيت بتخانق مع الخلق بالعربية وجربت نفسي في شوية حوادث على قدي
خلصت كلية واتخرجت وطلعت عيني وعين اللى جابوني فى تطليع الشهادة وطلعت الحمد لله
باعتبار ما سيكون هنهي مرحلة شغل سخيفة كانت فى حياتي.. وربنا يسهل واعرف اخلع منها.
حد مهم في حياتي علمني ان مش كل الفرص بتيجي على مقاس الناس وان مهم الواحد يقدر يقول لا في وش الاغراءات ومفيش حاجة اسمها فرصة متتعوضش.. (اشكرك بجد).
عملت شغل في مجلة جود نيوز سينما افتخر بيه مع اني مكملتش فيها اكتر من 6 شهور حتى الان ، والاكثر فشخرة طبعا الملفين اللى عملتهم واحد بصحبة محمد قرنة والتاني اول ملف اعمله لوحدي وربنا يستر.
هو انجاز عبيط اوى يعني بس هتحس بيه كل واحدة بتعشق الكوتشي.. بس بقيت بعرف امشي بكعب .. واقدر دلوقتي اقف بفخر واقول لعيالي انا يا ولاد عشان امشي بكعب قعدت 20 سنة بتعلم D:
من ساعة ما تميت 20 لحد الـ 21 خسرت ناس زي الفل وكسبت ناس زي الفل وسعيدة جدا باللى خسرتهم وسعيدة اكتر باللى كسبتهم وطايرة م السعادة بقى باللى اثبتولي انهم صحابي بجد ولسه انا وهما صحاب .. واهو الكل كسبان :)

مش قادرة افتكر اكتر من كدة .. بس احب اتمنى قبل ما اتم العام الـ 23 تحصلي شوية حاجات حلوة تانية (ايوة يعني في خلال سنتين من دلوقتي) واهو ربنا يسهل:
ابقى ثابتة في شغل انا راضية عنه وعن ناسه
ابقى سافرت ايطاليا وجيت واحكي عن التجربة دي
ابقى مخطوبة او متجوزة او متطلقة D: واحكي برضه عن التجربة دي ههههههههههههههههههههههههههههه
ابقى رايحة جايه بزكزوكة بتاعتي
اكون عملت حجة او عمرة على الاقل ....
يلا مين عارف بقى.. يامين يعيش :)

تصبحو على حضن دافي

بحس بالوحدة في ايام غريبة قوي.. وبكره الوحده جدا

متفهمش ليه فى اكتر ايام بتكلم فيها الناس وتهرج مع اغلبهم ويحسو انك فراشة طايرة من السعادة في اليوم ده تحديدا بتروح وانت مليان كآبه غريبة

كأنه مينفعش يفلح ظنهم فيك وتكتشف انك مش مبسوط زي ماهما تصوروا

حتى الاشخاص اللى متعود تستنجد بحضنهم في اليوم ده تحديدا مبتلاقيهمش.. وتصعب عليك نفسك اكتر

تبدأ تفكر.. هو انا اصلا كنت مكتئب وكنت بداري بالتهريج؟؟ ولا انا كنت كويس وعادي وكتر التهريج خلاني افكر في حالي؟؟

بعد كوم تفكير.. تتعب اوى.. وترمي جسمك ع السرير تقول هكمل تفكير عليه.. بس النوم يغالبك وترتاح من مخك ده

تصبحوا على خير

وللجبال قمم

كان فيه شوية نكت سنتيحة كدة بس لها معزة عندي انا خاصة عن القمم.. قمة الفرحة وقمة الذهول والكلام ده.

اكتر ما كانت بتضحكني ان قمة الذهول انك تلاقي ركن جوا اوضة مستديرة وقمة الفرحة انك تلاقي الركن ده.. الافيه ده كان بيعجبني اوى كان فيه ذكاء رغم سخافته.

المهم نبعد عن الافيهات ونتكلم جد شوية بقى كما في علم النفس فلنسرد ما بخواطرنا.. فبعد شكوى اكثر من زائر حول ان البلوج بقى مليان سينما وفن كتير والناس قرفت يعني.. قررت ارفه عنهم شوية.. ولو انها اول مرة ارفه عن مادة ترفيهيهه بمادة جادة بس يلا ماعلينا.

قمة الأمل: لما اسمع صوت ضحكة طفل عالية مسخسخ فيها م الضحك جدا

قمة التعاسة: مسن في اواخر عمره مكتئب بحجرته وحيد ، مذنب يأس من نفسه ومن تكراره للذنب

قمة الفرحة: لحظة أمل في وسط كتلة يأس مسدودة في وشي

قمة العذاب: الفراق

قمة الحب: لما تفضل الحبيب عن نفسك

قمة الذهول: انسان قادر على التعذيب

قمة الراحة: لما احس برضا ربنا عليا

قمة الارتباك: لما اتكسف "خاصة من شخص معين جدا"

كفاية الشوية دول المرة دي.. انا حبه اسمع القمم كذلك منكم.. اعتقد كل واحد بتختلف عنده تفاسير المشاعر عن غيره من البشر

يلا.. دعوة للسفسطة مجانا

المقعد الجانبي

إذا نظرت في أي سيارة تجد أنها مكونة من كرسيين أماميين وكنبة خلفية.. وربما أكثر من كنبة إذا كانت سيارة أكبر مما أشرت إليها.. وإذا كانت السيارة ملكك فمكانك معروف.. خلف المقود هكذا أنت القائد والسائق والمتحكم الأول والأخير في الطريق للسيارة ومن فيها.. حتى ولو لم تكن تعرف الطريق أو من على جانبك هو الذي يشور عليك المكان والإتجاهات إلا أنه أولا وأخيرا انت المتحكم في الموافقة والانصياع أو الرفض.. فانت حر والحرية هنا هي الاختيار.. انت ملك اختيارك الأول وكل من في السيارة تابعين لك وخاضعين لقرارك ومن يعترض فمكانه الأوحد هو الشارع والخروج خارج مملكتك.

الكنبة هي المكان المثالي للاطفال للحماية.. فهم يجلسون فى اكثر الاماكن حماية وبعيدين كل البعد عن الطريق بل واذا نظروا من لزجاج الخلفي فيستطيعو رؤية ماتخلفه اثار سيارتك فقط ولكن ان يروا الطريق او بدايته فهو غير ممكن.. اقصاها رؤية جانبية من زجاج المقعد الخلفي.

واخيرا المقعد الجانبي.. هل انت ممن يجلسون فيه؟؟

على الرغم من ان المقعد الجانبي ليس على اهمية مقعد السائق ولكنه الاستشاري الاوحد للسائق.. بالاضافة الى مميزات اخرى.. من نظرة على الطريق او سؤال احد الناس في الشارع عن الطريق او التحكم في الكاسيت.

المقعد الجانبي له كل السحر والخصوصية حين تركب الفتاة بجوار الفتى.. فتعرف انها تتعامل من منطلق الأقرب إليك أو زوجة المستقبل.. حين تركب الفتاة بجوار صديقتها وتجلس اخرى فى الخلف تعرف ان تلك في المقعد الجانبي اقرب للسائقة من التي فى الخلف

تعرف ان من يجلس فى المقعد الجانبي له تعامل معين وخصوصية معينة وصلاحيات معينة محببة للسائق ومخصصة فقط له دون المقعد الخلفي.

المقعد الجانبي.. دوما حلمت بالجلوس فيه طالما لم اكن السائقة.. ليس لرؤية الطريق ولكن لتلك الخصوصية التي يحملها للجالس تجاه السائق.

ترى.. اين تجلس في السيارة التي ليست ملكك؟