تاج من أمادو

التاج كان صعب اوى يا امادو..

اصل خمس حاجات الناس متعرفهاش عني دي صعبة اوى لان فيه ناس قريبة اوى عارفة كل فتفوتة

هحاول اقول حاجات حصرية ولو اني كدة هقع في مأزق بين اني اقول حاجات شخصية اوى مش عايزة كل الناس تعرفها وبين اني اقول حاجات معادة القريبين هيكونوا عارفينها

ماعلينا من كل الوش ده هقول اللى ينفع يتقال

خمس حاجات محدش يعرفهم عني (أو يعرفهم اقرب الناس ليا)

بعشق التلج.. وبعشق التزحلق ع التلج وبعشق الفرجة على اي عروض في التلج.. يكفي أن صور التلج فقط بتريح أعصابي.

ممكن حد يضايقني او يأسفني مرة ويعتذر فاسامح ومرة كمان واسامح لكن باجي عند نقطة تحمل معينة مبحتملش بهب في الشخص ده واقول كل اللى فى نفسي مرة واحدة وساعتها يسقط من نظري ولا احنلوش تاني ابدا.. بيبقى سحب كل رصيده معايا وعليه ديون وابيعه كمان بخسارة.

اغلب صحابي اول ما اتعرفوا عليا كانوا بيقولو عليا هبلة وهايفة عشان بهرج كتير بس بعد ما عرفوني على حق قالولي انتي طلعتي عاقلة اوى بس مجنونة احيانا !!!!

عصبية اوى.. ولاني مش في كل الاوقات بقدر اعبر عن عصبيتي دي وبكتمها كتير "شكل الضغط هيجيلي قريب".. فالحل الوحيد بيبقى العياط.. وبالتالي بعيط كتير اوى بس مش قدام حد "قدر المستطاع"

ممكن احس بالذنب م الهوا.. واتنكد بسبب ده.

أمرر التاج ده لبنت الدرملي اللى بقالها كتير محدثتش بلوجها.. ولمحمد حسن.. ولقاضي ومهند ابن الشناوي.. وانا وانت ومية مسا ع الناس الكويسة.

تهييس على هامش الصحافة

شوف حابب تقسم حياتك لاي مدة زمنية واختار تشتغل في جريدة اسبوعية او مجلة شهرية او نصف شهرية.. حياتك هتتقسم حسب دورية الصدور

متحاولش تفكر كتير الناس بتبصلك ازاي لان بصفة عامة الناس دايما بتبص للصحفي على انه "التلم" الوحيد على الكرة الأرضية

افكارك راس مالك.. اقفل عليها في دماغها ومتراجعهاش حتى بينك وبين نفسك بالذات لو كنت شغال في جرنال

اعمل حسابك انك كل يوم على الاقل هتجيلك ساعة في اليوم هتقول لنفسك مفيش اي فايدة م اللي بعمله او بقوله.. يعني هو كلامي اللي هيغير الكون؟؟ هو فيه ناس بتقرا أصلا؟؟!

لو كنت صحفي في مصر بقى.. اعمل حسابك على مرمطة وتنطيط بتاع 10 سنين قبل ما تقول "أخيرا ارتحت".. ده اذا مرتحتش راحة ابدية عند ربنا فوق قبل الراحة دي

لو كنت محرر اوعى تفكر تقترح على مخرج صحفي فكرة ولا اقتراح ولا تعديل.. حتى لو كنت بتفهم اخراج يا سيدي.. والا هتسمح وصلة ردح م اللي قلبك يحبها "لو كانت المخرجة بنت" ولو كان راجل هيفضل فاكرهالك طول عمرك ومش هينسالك الوقفة دي أبدا مدى الحياة.. خليك في شغلك واعمل نفسك اعمى لو كان المخرج مبيفهمش

بلاش تفكر انك ممكن تخطب ولا تتجوز صحفي/صحفية زيك.. والا تحمل عواقب افعالك

الصحفي بيحضر الطبخة بتاعة الصحافة.. بيحضر ويشوف كل حاجة في الجرنال من أول الفكرة لحد التنفيذ والطباعة والتوزيع.. وبالتالي عايز تموت صحفي م الفرسة؟ قوله اقرا الجرنال اللى انت شغال فيه!

الصحفي سواء ع الورق أو في المقابلات الشخصية اولا واخيرا كاريزما.. والقبول من عند ربنا

أخيرا الصحفي لما يزهق يكتب الكلام الفقيع اللى انا كتبته فوق ده :)

وزارة الثقافة.. وظيفة ميري والناس درجات

عمرك قريت إعلان عن إن وزارة الثقافة طالبة موظفين شباب؟؟؟
- طبعا لأ
طيب لو فرضنا إنك وجدت ذلك الاعلان.. هل ستتقدم للعمل بأحد قطاعات وزارة الثقافة؟؟؟

ماذا تفعل لو عرفت انه كان هناك مكانا شاغرا فى أحد القطاعات بوزارة الثقافة وما ان ابلغ القطاع الشاب بانه تم قبوله لم ياتي الشاب ولم يظهر.
لن تتوقف الوزارة طبعا على هذا الشاب فهناك الملايين غيره يتمنون العمل.. فتم قبول شابه اخرى ولم تأت وشابه أخرى ولم تأت وهكذا.. بقدرة قادر يعزف الشباب عن الوظيفة.
هل هذا دليل على عدم وجود البطالة في مصر؟ أم أن شبابنا قرروا فجأة مقاطعة العمل.. او ان في وزارة الثقافة عمل اسود تحت نملة فى المحيط يمنع هذا المنصب من إشغاله؟؟!!

ربما ليس كل هذا وانما ببساطة هؤلاء الشباب والدتهم تدعو لهم بالعمل الطيب.. وقد استجاب لها الله!
فوزارة الثقافة ذات الوظيفة الميري العظيمة تقدم عملا ذهبيا لا يمكن رفضه! بداية بأن كل من يعلم بهذا المنصب الشاغر هو قريب فلان أو معرفة علان.. فلم يظهر أعلان أبدا لذلك القطاع بأنه يحتاج موظفين.
مع العلم ان المكتب اساسا غير محتاج لموظفين.. ففي المكتب هناك 8 عاملات حاليا كل وظيفتهم هي القص واللزق.. فالوظيفة الذهبية هي ان تجمع كافة الأخبار عن الوزارة من جميع المجلات والجرائد الملقاة أمام مكتبك لوضعهم في الملف الخطير لعرضها على المدير نهاية الشهر.. ولماذا كل ذلك؟ ليكون المدير على دراية بكل ما يحدث أمال حد يجيب في سيرة الوزارة وهو ميدراش؟!! وبجانب القص واللزق هناك بعض الأيام التي ينزل فيها العاملون لتغطية ندوات خاصة بالقطاع ولا تسأل عن كيفية تغطية تلك الندوات فليس هناك تغطية اخبارية ولا كاميرا ولا مسجل.. التغطية أن يحضر الموظف تلك الندوة وحضور سيادته كفاية ولله.. حقيقي منور!

وعن مزايا الوظيفة فهي طبعا ميري.. أي أنك تضمن العلاوات والحوافز بالإضافة إلى المرتب الحكومي المضمون من 180 إلى 200 جنيه، بالإضافة إلى تسلمك العهدة.

وتلك العهدة عبارة عن قطر وصمغ وقلم طبعا لزوم القص واللزق.. يعني هتقص وتلزق من جيبك؟؟ الوزارة كتر خيرها هتتولاك يابني وهتديك "القلم" المتين!

الوزارة مثلها مثل سائر القطاعات الحكومية.. تمتلك منظر يسر القلب ويشرحه.. والحمّام كذلك يحتوي على خضره مبهجة.. ولكن الخضرة التي اقصدها ليست زرعا –استغفر الله- وانما هي تلك الخضرة التي نستخدمها فى المحشي والتي تسد الاحواض هناك نظرا للعاملات اللاتي يغسلن الخضرة في الحوض.

وظيفة ميري بمكتب وقلم وصمغ وطول النهار شغل يادوبك متقسم عليك انت و 8 غيرك و200 جنيه اخر الشهر وتبقى ملك زمانك.. ولو امك دعيالك بصحيح يمكن تنول كام صباع محشي اخر يوم وانت وحظك.
نرجع لمرجوعنا بقى.. لو فرضنا انك وجدت ذلك الاعلان.. هل ستتقدم للعمل بأحد قطاعات وزارة الثقافة؟؟؟

مي كامل

اسم الكريم إيه؟

في فيلم الراقصة والسياسي.. كانت الراقصة تستشيط غضبا حين علمت أن السياسي قد كذب عليها في اسمه.. وحين سألها إيه لازمة الأسامي يعني؟ كان ردها عليه موجز ومفيد.. "إيه فايدته؟ فايدته إن الناس بتعرف نفسها بيه"!وأسماءنا في الحياة متعددة فهناك اسمك الحقيقي واسم الدلع.. واسم القفش "أي حين تكرهك أمك وتندهك بطريقة تؤكد لك أن الطوفان قرب".. هي مجموعة من الأسماء البديلة التي تهبط على الإنسان وتلتصق به حتى يعرفه الجميع بهذا الاسم وسرعان ما يختفي الاسم الأصلي ولا يسمعه صاحبه سوى في منزله على لسان إخوته ووالدته.
اسم الدلع.. هو اسم يلتصق بك منذ الصغر ولا تعرف من أين ظهر ومن الشخص الذي أطلقه أول مرة.. وتجد العجائب في أسماء الدلع.. فهناك أصحاب نظرية الدلع المشتق من أول حروف الاسم.. فزينب تكون زيزي أو فريدة فيفي وهكذا وهناك أسامي باختصار "متنفعش" فسحر لن تصبح سحسح.. أو رنا لن تصبح رنرن.. وهنا كان لابد لحل للخروج من هذا المأزق فبدأت أسماء الدلع الغريبة.. لتصبح رنا تُتُسه.. أو توته وهما اسمان ليس لهم أدنى علاقة برنا أصلا. وهناك من لم يعجبها اسمها بالأساس فمسعده صارت شاهيستا "أقسم لك أن هناك بحق من تسمى شاهيستا ولست أدرى أهلها جابو الاسم منين!". وهناك فتحية التي صارت ميرنا مثلا.. ويا ويلك يا سواد ليلك لو ناديتها باسمها الأصلي أو عرفت قصة تغيير الاسم!وهناك بعض "الفورمات" فبعض الأسماء ثابتة كقاعدة.. مثل ميدو فهو أكيد يتبع شخص اسمه محمد.. أو حمادة لأحمد أو محمد، ولو أنها أحيانا تستثنى من القاعدة ليصير حمادة اسما منفردا بذاته، وأبو علي الذي بالضرورة هو حسن.
أما الألقاب فهي لا تعد ولا تحصى وتجدها أحيانا غريبة غير مفهومة، فهناك أحمد الملقب بين اصحابه بـ"هيق" لأنه في صغره كان يضحك فكانت ضحكته عبارة عن "هيق هيق هيق" فصدر عنه اللقب.. تشعر وكأن اللقب "يلزق" على صاحبه في موقف معين في لحظة معينه ليتغير مجرى اسمه عند تلك اللحظة.. تستيقظ من النوم "لا بيك ولا عليك" وتذهب للكلية أو المدرسة وعلى حين غرة يحدث الموقف وتصير هيق أو فرفور أو كركور فجأة!وأغلب الألقاب تكون باستخدام أغرب اسم في سلسلة أسمك الثلاثي أو الرباعي أو ربما يكون اسم العائلة حيث أن الأسماء المتشابهة كثيرة بين احمد ومحمد ومحمود فيستخدمون اسم العائلة للتمييز مثل زقزوق او الضبع أو الحيوان أو الجزار.. فكل اسم عائلة له مكانته ولكن الاسم أصبح اللقب المميز لك!وهناك لقب يطلقه صاحبه على نفسه كنوع من التميز.. مثل تيتو خاصة بعد ظهور فيلم تيتو لأحمد السقا.. أو كازانوفا لمن يتفاخر بعلاقاته النسائية والعجيب أن تجد هذا الشخص دوما شكلا ومضمونا لا يصلح أبدا لأن تكون له أصلا علاقات نسائية.. بس يلا أصحاب العقول في راحة!الأسماء تظهر كموضة كل فترة فتجد دفعة أغلب بناتها أسمائهن مروة أو دفعة أخرى سارة أو دفعة أخرى نهاد وهكذا، وآخر أخبار دفعة هذه الفترة أنها يغلب عليهم الأسماء الغريبة والتي يبرر أهلها السبب إنها اسما من القرآن أو اسم البحر باللغة اللاتينية أو النور باللغة "المعرفش إيه"..لن تتعجب حين تبدأ أن تسأل واحدة من البنات اسمك إيه لتجد الإجابة "رهف – جومانا – جانا – نرفانا... الخ".. ولن أتعجب أنا حين ترد عليها بنفس القافية "آه يانا"!

مي كامل

صور تستحق المشاهدة!

في شبه جزيرة سيناء وعلى الأخص في طابا وماحولها من مناطق تجد بعض المناظر والأماكن التي تستحق التصوير لاشك.. منها ماهو ديني ومقدس ومنها ماهو سياسي وكاد أن يصبح مقدس.. اتيحت ليا الفرصة اني اتواجد هناك كام يوم ولقطت الكام صورة دول

الصور دي من طابا وسانت كاترين

صورة جبل دكا .. الذي ذكر في القراءن في الآية الكريمة "وَلَمَّا جَاء مُوسَى لِمِيقَاتِنَا وَكَلَّمَهُ رَبُّهُ قَالَ رَبِّ أَرِنِي أَنظُرْ إِلَيْكَ قَالَ لَن تَرَانِي وَلَـكِنِ انظُرْ إِلَى الْجَبَلِ فَإِنِ اسْتَقَرَّ مَكَانَهُ فَسَوْفَ تَرَانِي فَلَمَّا تَجَلَّى رَبُّهُ لِلْجَبَلِ جَعَلَهُ دَكّاً وَخَرَّ موسَى صَعِقاً فَلَمَّا أَفَاقَ قَالَ سُبْحَانَكَ تُبْتُ إِلَيْكَ وَأَنَاْ أَوَّلُ الْمُؤْمِنِينَ" سورة الاعراف الأية 143
الجبل المذكور هو ذلك الجبل والذي من يومها تحول إلى تل وليس جبل.. ولأنه اتدك فقد سمي بجبل دكا.


دي صورة شجرة العليق .. وتلك الشجرة التي اضاءت لسيدنا موسى عليه السلام فقال لأهله اني ءانست نارا لعلي أتي منها بقبس.. ولما راح هناك لقاها شجرة مضيئة مش نار محترقة وقدام الشجرة الواد المقدس طوى اللي قال فيه ربنا لموسى "اخلع نعليك إنك بالواد المقدس طوى" والمفروض انهم حولو الوادي المقدس لمكان حوطوه بسور وعملوله باب وللاسف مكانش مسموح بالدخول عشان نصور!

على اطراف طابا.. تجد الحدود المصرية وتقابلها الحدود الفلسطينية سابقا الاسرائيلية حاليا.. في الصورة تجد العلم المصري يقابله العلم الاسرائيلي.. ويقال ان كان فيه خناقة كبيرة على كيلومتر من حدود مصر كانت اسرائيل عايزة تنسبها لارضها اللى اصلا محتلاها لانها على ربوة عاليه ومن خلالها ممكن تكشف عدة مساحات في دولتي مصر واسرائيل بس بعد طول نزاع حكمت المحكمة الدولية باحقية مصر في ذلك الكيلومتر


الرئيس الراحل انور السادات قرر يعمل استراحة في شبه جزيرة سيناء وسماها وادي الراحة.. بناها بالشكل اللى انتو شايفينه ده وبنى فيها مسجد وتمنى انه يبني كنيسة ومعبد يهودي ويحول المكان لمجمع اديان.. للاسف مات قبل تحقيق الفكرة وطبعا اللى بيموت محدش بيعبر افكاره ولا احلامه وانتهى المكان على الحال ده.. للعلم المكان شكله لطيف والبناء جيد


قلعة صلاح الدين على جزيرة فرعون وهي قلعة تهدمت تماما ونهبت تماما وماتراه هو بناء جديد بالكامل على امل اعادة ترميم ولكن لم يكن هناك اثار ليعاد ترميمها فتم بناءها كاملا


البحيرة الصناعية في قلعة صلاح الدين بطابا

جدير بالذكر ان اليهود قبل ما يسيبو سينا دمروا كل ما استطاعو تدميره من اثار متبقية او بناءات او منشآت واخيرا الاثار اللي كانت موجودة سواء في دير سانت كاترين أو حتى في القلعة اتنهبت تماما برحيلهم.. طبعا كلنا عارفين دلوقتي مين اللى نهبها!!

في عيد ميلادي العشرين

مرة في مرات التهييس العظيمة طلعت لجملة عظيمة زي الحالة تمام "وما ازيك الا كلمة يقولها الغرباء ليبدو لنا بمظهر الاصدقاء ولكن هيهات هيهات هيهات"

والف هيهات كمان.. واحد ولا انا اهمه في اي حاجة ويسالني ازيك؟ يافرحتي قال يعني لو قلتله مش كويسة هيعملي حاجة ولا هتفرق معاه حتى!

طب بنقولها ليه؟؟ نفاق اجتماعي؟؟ جايز..!

افتكر جملة لصديق "احمد عطية" كان عمرو زقزوق بيسأله لو هتموت كمان اسبوعين تعمل ايه؟؟

قاله "هروح لكل واحد نافقته واقوله يا حيوان".. حكيم يا ولد!

حبه اقول كلمتين لنوعين من الناس.. ناس كانت فكراني بجد وقالتلى كل سنة وانا طيبة.. يمكن مكانوش بيكلموني علطول ولا انا على بالهم دايما اكيد بس ع الاقل افتكروا يحسسوني انى اهمهم بشكل ما.. حتى اخر حد كلمني كان الاسلوب والطريقة وكل حاجة حسستني اني اهمهم

الناس التانية "النفاق الاجتماعي" احب اسالهم ليه؟؟ موتي وسمي حد يبقى لزج وييجي يقولى سوري نسيت عيد ميلادك بس عموما بما انه فات احب اقولك كل سنة وانتي..

ساعتها ببقى نفسي اقولها اهو انتي!

ياستي نسيتي المعاد انسي للسنة الجيه مش تيجي تقوليلي انا عارفة اني نسيتك بس مش هسمحلك تفتكريني نسيتك .. يلا نمثل سوا اننا فاكرين بعض واننا صحاب!

ولله ما فاهمة الناس دي

ماعلينا يسألوني بقى "تتمني ايه يا حلوة؟؟" وياحلوة دي مش عشان انا حلوة ولا حاجة لا هي بتتقال كدة بما ان اللى بيسالني دايما بيبقى اكبر مني فحلوة بتبقى دلع ينم على الصغر.

"اتمنى ايه!! طب ارد اقول ايه؟؟ اتمنى شوية ضمانات مش مضمونة.. اتمنى حد يضمنلي بكرة.. ضمان ان بكرة مش هيغدر بيا.. ضمان اننا مش راح نتفارق.. ضمان اني راح اشوف اللى فارقوني وتعبني فراقهم واني مش راح افارق تاني حد يعز عليا

اتمنى احتواء ابدي

اتمنى حد يديني ضمان اني مش هحس بذنب تاني.. اني هعيش بدون ذنوب.. حد يضمنلي ان صوت الضحكة هفضل سامعاها في ودني.. ان دموعي تبطل تنزل بسبب وبدون سبب.

عشرين سنة مرو تمام.. مر عليا فيهم ناس كتير.. ناس جم وناس راحوا وناس فضلوا.. وناس غيروني وناس غيرتهم.. افتكر كل ما كنت اصاحب بنوتة جديدة كانت طريقة ضحكتي تتغير وتبقى زيها.. لحد ما ثبتت للاسف على الضحكة الشيطانية الماردة الحالية..

حسه انى فارقت فئة الناس اللى مش بتتحاسب على حاجة.. طول مانت تسعتاشر ولا تمنتاشر اى حاجة بتنتهي بالتاشر دي كنت تنط ولا تجري ولا تصرخ محدش بيلوم عليك وكأن الـ "تاشر" دي فئة العبط اللى هو انت هتدق عليه ده تاشر يعني!

بالرغم من ان ناس هتعتبرها اهانة فهي للاسف مدح جامد اوى في سنكو.. لانك اول ما بتم العشرين بتحس انك لازم تكبر بقى وميصحش وعيب وانتي كبرتي.. يعني ايه تنطي؟ اما للبنات فالكعب العالي بيبدأ يقتحم حياتكو بشكل اوسع

وانا طول عمري اكره الكرافت والكعب العالي "اي حاجة تنم عن الرسميات" ونفسي برضه اقابل أحمدي "الاخ بتاع البساط الاحمدي ده"

نهايته اهو عيد وعدى ووقت وبيعدي.. والرك عللى بيعمل فرق.. عموما معتقدش ان بوست زي ده هيعمل وياك فرق.. اعتبرني كنت بفضفض ووقعت عليك القرعة عشان تسمع!

لامؤاخذة.. ازعجت سيادتك!

كلاكيت أول مرة

قديما ظهر فيلم من نوعية الخيال العلمي كانت فكرته تناقش ماذا لو قمنا بتصغير البشر ليستطيع العلماء إدخالهم بجسم مريض ومن ثم معالجته .. وأثار الفيلم ضجة كبيرة عند عرضه بالسينما .. ثم بعد سنين بدأ العلماء في وضع تصوراتهم وعمل التجارب المختلفة إلى ان وصلنا لليزر وصرنا الآن نعالج المرضى بنفس الطريقة دون تصغير أحد بل بإدخال آلات مسحية صغيرة جدا .. فقد كان التقدم العلمي أصله فيلم أو بدقة أكثر مجرد فكرة!!

V for vendetta

فيلم "في فور فينديتا" أو "الثأر" –كما تمت ترجمته في أغلب سينما الوطن العربي- للمخرج جيمس ماكتيج مخرج سلسلة أفلام ماتريكس و السيناريو للأخوين فاشوفسكي يأتي مقتبسا عن رواية صدرت في الثمانينات تتناول قصة بطل يوصف بأنه "إرهابي" يحاول إسقاط الحكومة البريطانية صاحبة الحزب الواحد الدكتاتوري .. ويقوم بدور الإرهابي "v" الممثل هوجو ويفينج والذي يرتدي قناع طوال عرض الفيلم فلا ترى وجهه أبدا وعلى الرغم من ذلك تتعاطف بشدة مع البطل مما يلغي القول بأن تعبيرات الوجه أحد عوامل تعاطف البشر مع بعضهم البعض ، وتشارك الممثلة ناتالي بورتمان في بطولة الفيلم.
تم تقديم الفيلم بشكل مبتكر وجديد وهو تداخل الأزمنة.. فتارة يحدث فلاش باك أو العودة للماضي وتارة أخرى تتوالى الأحداث الآنية .. والرائع انه لا يحدث خلل في الفهم لدى المشاهد بل يستطيع كذلك فهم كافة الأحداث والربط بينها ببراعة مما يؤكد على جودة السيناريو والحوار والإخراج كذلك.
ويصف الكثيرون هذه النوعية من الأفلام والتي بدأت بفيلم فهرنهايت 11/9 بأنها تناقش السياسة الأمريكية في الشرق الأوسط والعالم النامي ككل مثل سيريانا وفيلم "الطريق إلى جوانتنامو".

Aeon flux

ايون فلكس والذي ظهر كمسلسل كارتون للأطفال عام 1995 ثم ظهر كفيلم سينمائي بعد عشر سنوات في 2005 وتلعب بطولته تشارلز ثيرون وإخراج كارين كوزاما .. يحكي الفيلم عن مدينة تم صنعها لتكون خالية من أي أمراض لحماية المتضررين –سابقا- من فيروس قتل أغلب سكان الأرض وبشكل ما تتطور الأحداث لنكتشف أن استنساخ البشر صار ناجحا وفعالا حتى أن المدينة بأكملها قائمة على الاستنساخ.

V for vendetta.. Aeon flux ليس هناك ما يربط بينهم في القصة او التصوير او الإنتاج او ... إلا أننا نستطيع تسميتها أفلام التمرد والثورة .. التمرد على القهر حتى ولو كان في مصلحة البشر .. كسر الأسوار وتحطيمها مهما اعتقدنا في وجود الأمان خلف السور .

كلا من الفيلمين في فور فينديتا وAeon flux يحدث تمرد داخل نفس المشاهد من اجل الحصول والمطالبة على حياة أفضل حياة مضمونها سلام وحرية .. إلى آخر تلك المسميات الجميلة التي حوتها اليوتوبيا الأفلاطونية .. ولا تتعجب عزيزي القارئ حين تجد فى v for vendetta احد الشخصيات وهو يتمسك بالقران كمصدر لثقافته على الرغم من كونه ليس مسلما .. إلا أن ذلك لم يمنعه من الاقتباس منه والعمل بما يقتنع منه على لسان الشخصية بالفيلم.

بكرة أحلى من النهاردة .. يمكن!!

ما نحيا فيه حاليا نستطيع تسميته -بثقة- عصر الإرهاب .. ليس لان أمريكا أطلقت على الشرق الأوسط منطقة الإرهاب ولكن الإرهاب منها أولا ثم فيها ثم فينا .. الإرهاب المعنوي والمادي والتخريبي انتشر بشكل كبير .. حتى أن عقول المؤلفين صارت تتمنى لو بعد عشرة أعوام أو أربعمائة عام لم يعد عدد السنين مهم إلا انه صار السؤال إلى متى الفساد؟ هو المسيطر على عقولهم فاحد الأفلام تبدأ أحداثه من 2015 والآخر 2011 وكلاهما يتوقعا حدوث فيروس يقضي على عدد كبير من السكان ثم تتطور الأحداث لتدخل السياسة في استخدام ذلك الفيروس .. ويظهر القيد والدكتاتورية.

لازالت السيطرة للواقع الملموس

وعلى الرغم من الأمل نحو السلام والحرية إلا ان في الفيلمين تجد الوسيلة لذلك العنف كذلك .. وكأنهم يطبقون ما تقوله إسرائيل "بالدم والنار سقطت يهودا وبالدم والنار ستقوم يهودا" .. هي باختصار فكرة ما اخذ بالقوة لا يسترد إلا بطريقته ..
هي دعوة صريحة للتمرد على الفساد بإنسانية مطلقة تتحكم في مشاعر المشاهد أولا ثم يحكم عقله ليقتنع بها بشده .. هي فكرة أتت في وقت معين –حاليا- وقالوا قديما أن الفكرة يتحكم في إحيائها أو وفاتها التوقيت.
"صنعت القواعد لنحطمها" هو مبدأ آخر تلاحظه بشدة في تلك الأفلام من طراز معا نحو التمرد .. وجليه في فيلم v for vendetta حينما تم تحطيم النظام الحاكم الفاسد .. الا ان المؤلف نسى أو تناسى أن الحكم الفاسد لا ينتهي فلم يضمن الفيلم للمشاهد الا تعود الكرة الفاسدة مرة أخرى .. باختصار لم يضع بذور لحكم عادل سليم .. أ هو المستحيل تخيل نظام عادل؟؟
لم يكن هذان الفيلمان هما الوحيدين الداعيان لمثل تلك المبادئ فهناك غيرها ظهر قديما أيضا مثل ايلاند island 2005 وإذا بحثنا فسنجد أن في كل عام تقريبا يتم إنتاج فيلم من تلك النوعية "معا نحو التمرد" .. السؤال هو: هل تلك النوعية من الأفلام ستتحقق فى الواقع ذات يوم؟؟ هل ستموت فكرتها أم ستحيى لتتطور !!

حالة برد

الواحد بيفضل ناسي فكرة ان يجيله برد ويعمل فيها اللى مش همه لحد ما يزوره المرض السنيح ده.
سناحة البرد مش في ادويته ولا انك تقوم الصبح ميطلعلكش حس ولا الرشح ولا اعراضه "عشان مش حبه اقرفكو" بس الفكرة انه مبيروحش بجد.. هو قدرك كدة هتقضي ايامه يعني هتقضيها ولما يحب هو يروح هيروح لوحده

الاظرف في دور البرد ان الناس بتستهيفه وتقولك يا راجل قوم مفيكش حاجة انت هتمثل؟
و ناس تانية بتبدا تمارس رغبتها في انها تعمل الدكتور
"شوف يابني انت تنقعلك لمون في مية وتشرب ميته"
"بصي انتي تحطي جرايد عشان الكحه تتشفط من ضهرك" ولله اول مرة اعرف ان الضهر مكان الكحه للامانة.
"لا اوعو تجيبو سمك انهاردة احسن عندنا دور برد في البيت"
والسمك يا عيني مظلوم في وسطهم.

ولا خبرة المريض.. تحت بند اسأل مجرب ولا تسالش طبيب .. فنبعد عن اللى عايشين دور الدكاترة ونروح للمجرب.. انا جربت الدوا الفلاني وكان بينيمني كتير اوى بس ايه كان ممتاز .. او حد يسالني وانتي بتاخدي ايه بقى للبرد احسن ده لازم له ادوية مخصوصة وبتاع .. وايا كان الدوا اللى هطلع باخده فهو ولا حاجة جمب المفعول الاكيد بتاع دواه
والمعروف اصلا ان كل ادوية البرد بتنيم .. طب ايه الجديد؟
وهو البرد اصلا هيروح هيروح لوحده زي ما جه لوحده

اللطيف بقى العادات الصحية اللى الناس بتبدأ تقولها غير الجرايد وغليان اللمون والنعناع والكلام ده.. النصايح التانية اللى بتجري وراك في كل خطوة في البيت.. زي كني في السرير.. وانا موتي وسمي اسمع كلمة "كني" دي.. ولا متقعديش في المروحة والحرارة اصلا 40 يعني لو مقعدتش فى المروحة هتجيلي حمى.. المروحة مضرة طب خلاص هفتح التكيف واهو ضرره اقل.. لالالا هتقلب بكحه وهتسخني.. يعني تموتوني؟؟
الحل في مرض البرد انك تقتل حامل الفيروس فالفيروس يموت.. يا فرحتي

احلى ما في البرد شخصيته المستقله.. حد قوي كدة ييجي بمزاجه ويمشي بمزاجه.. ياسلام لو كان الواحد فيروس برد ذو شخصية كدة!

حتى جاهين اتخنق م البرد فطلعت رباعيته العبقرية
ياحزين يا قمقم تحت بحر الضياع
حزين انا زيك وايه مستطاع
الحزن مبقالهوش جلال يا جدع
الحزن زي البرد زي الصداع
وعجبي

على عيني وراسي لما الدنيا تشتي.. ياريت تشتي.. بس بلاش عليا أنا!

لو لم اكن مصرية.. يافرحتي

لو لم اكن مصرية لوددت ان اكون ايرانية.. على الرغم من انى مش هقدر البس الاسدال اللى بيلبسوه!
الفكرة اني مش مدعية سياسة ولا بقول اني سياسية محنكة انا كبيري الجزيرة وكام جريدة من الجرايد التعبانة بتاعتنا.. ولا شيعية عشان احب اعيش في ايران بس الفكرة ان بتهيالى ان جوا كل واحد منا اتمنا ولو للحظة يعيش موقف ايران وهي بتقول لا
لا مش هوقف تخصيب اليورانيوم
لا مش موافقة على ضرب اسرائيل للبنان وزودت حسن نصرالله بفلوس.. حتى ولو في الخباثة ولو في السر او العلن بس واخدة موقف
لا مش هوافق على رسم الرسول عليه الصلاة والسلام بشكل ساخر.. وعملت مسابقة لرسم الهولوكست رغم الشك التاريخي في مصداقية وجود المحرقة وكل ده بس يكفي تذكير اليهود بان منهم كتير اتدبح ومات على ايد هتلر.
الممتع ان ايران معملتش مسابقة مخصوص عشان ترد بيها على الرسوم دي .. هي اصلا دولة لها مسابقة لرسوم الكارتون سنويا وما كانت تلك المسابقة الا تغيير لمضمونها عشان يردوا بيها.. وفي رأيي انا اسميها توظيف حدث سنوي لرد الاعتبار!

كلامي كله مش جديد.. ولا بيضيف اي حاجة جديدة يمكن الجديد اللى ممكن اقدمه في اللينك اللى هحطه لرسوم كارتونية ايرانيه.. الناس دي مسلمين بعيدا عن سنة او شيعة بس مسلمين وفي رايي انا الذاتي والذاتي جدا.. الناس دي عرفت طريق للتقدم وعرفت طريق لدينها وحكومتها ويا شعبها
كان فيه واحد ايراني اعرفه كان في مصر من سنة.. كان بيقولى مصر انهاردة –من سنة- عاملة زي ايران في السبعينات
انشكحت جدا طبعا وفرحت اوى وتمنيت ان اظل مصرية!
وفضلت طول مانا مروحة اردد "يافرحتي يا بهجتي يا سعدي ياهنايا يافرشي وغطايا" مانا مستحملتش الشعور بالهنا اللى كنت فيه!

كنت هنسى اللينك

http://www.irancartoon.com/
قولولي رايكو في الصور.

اليوم العالمي لمنع الانتحار

حبيت الحق قبل ما يخلص اليوم حيث فاضل نص ساعة وتبقى الساعة 12 وندخل فى 11 سبتمبر.. فلسه حتى الان احنا فى 10 سبتمبر يعني لسه فى اليوم العالمي لمنع الانتحار.. فيا جماعة أي حد ناوي بقى او كانت عنده النية ياريت يأجلها ع الاقل ع الاقل لبكرة
بكرة بس كلها نص ساعة واعمل اللى انت عايزة!

اليوم العالمي لمنع الانتحار!!!!
ولله عالم هايصه وعالم لايصه.. او بالادق عالم فاضية!

معاهدة صلح

ممكن نتصالح يابنتي؟؟
ولله انا ماكنت عارفة اننا متخانقين سوا بس الظاهر ان حد فينا مخنوق م التاني وعشان كدة انا وانتي تعبانين.. مهو مش طبيعي نزعل من بعض كتير
ده حتى الخصام اكتر من 3 ايام مش مستحب يعني
وبعدين مهو اصلك بتستهبلي بصراحة.. تزعلي شوية وتضايقيني شوية بعدين ترجعي كويسة.. طب اجيب طاقة منين احتملك!!
بصي.. انا اللى اعرفه اننا لو عايزين نتصالح بجد يبقى منتناقش فى سبب خناقتنا ونتعهد لبعض بالسلام وخلاص.

بصي ازاي انا بادية بالسلام وانتي ولا معبراني.. طب اعملك ايه بالذمة؟؟
من سنة واحدة مكانتش حاجة شاغلة بالي.. ولا كنت عايزة اكتر من قعدة صحاب حلوة وضحكة تملا الجو.. مكنتش عايزة اكتر من كتاب حلو اقراه استمتع بيه .. مش اكتر من فيلم يغير مودي ويحسسني ان فيه امل فى الحياة.. انهاردة حاجات كتير اتغيرت وانا اتغيرت وياها.. انهاردة بنتخانق كتير فوق العادة
عارفة اني السبب وعارفة ان طلباتي كترت وتشعبت.. عارفة انى بقيت لحوحة وملولة.. بقيت خنيقة كمان.. بقى خلقي ضيق ومبقتش بستحمل زي زمان.. بس مهو برضه الانسان طاقة يعني!!
وبعدين لو انتي مستحملتنيش طب مين يعني؟؟؟

بصي يا ستي انا شايفة حل واحد.. اننا نتصالح حتى وانا مش عجباكي.. مهو اصلك انتي كمان يعني مش الفظيعة مانتي كمان مش عجباني خالص تك نيلة اصلا!
شفتي اديني غلطت فيكي.. يا ستي حقك عليا
هما بيقولو ان الحل اننا نتصالح وانا مضطرة اصدقهم لان مفيش امل ولا سكة تانية غير دي مع ان صدقيني مكنتش اعرف اننا متخانقين اصلا
تعالى بقى للمهم..
كل اللى قالولى نتصالح سوا انا وانتي مقالوليش الطريقة
ازاي اتصالح مع نفسي؟؟؟؟

في انتظار السي تي إيه!!

حسه بحالة قهر.. حالة بهدلة نزلت على حياتي.. الضحك اللى م القلب فارقني.. ولو ان الضحكاية اللي بتترسم على الوش لساها محطوطة.
اهي محطوطة والسلام!!

كل يوم اصحى عشان البس والحق انزل استنى السي تي ايه اللى مش بييجي بسأل نفسي مليون مرة انا كان ايه اللى دخلني قسم صحافة؟؟
ولحد انهاردة منيش عارفة ايه اللى خبطني في نافوخي وخلاني ادخل القسم ده.. ماله علاقات عامة.. عالم بتذاكر وتنجح ولما تخلص الف شركة يبقو عايزينهم.. ولو حتى ملقوش شغل اهو على الأقل مبيبقوش مقهورين على موضوع اتكتب ولا اتنشرش ولا فكرة اتسرقت ولا مصدر مش عارفين يوصلوله..
ولو اني احيانا تانية من كتر خبطة الشمس في نافوخي وانا مستنيه السي تي ايه برضه بتهطل عليا الفكرة العظيمة الموروثة من تقاليدنا "اتجوز واقعد في البيت" ولان نسبة العنوسة في مصر زادت فمبقتش مشكلة " اقعد في البيت بدون جواز مش ازمة"

ساعات تانية تهل على بالي الفكرة الجريئة وياخدني التحدي والبطولة "لا طبعا اقعد في البيت يعني ايه.. ايه يعني الواحد يتبهدل شوية فى اول حياته .. مهو لو متبهدلتش وانا 19 ولا 20 سنة امال هتبهدل وانا عندي 50؟ ساعتها هكون عندي سويت جاهز في مستشفى"

اما الفكرة اليائسة البائسة واللى بتوجعلي مخي من كتر ما هموت عليها او منها –مش فارقة- فهي اني هموت واجيب عربية.. وللامانة شغلة الصحافة دي متنفعش بدون عربية.. او حتى اجيب توك توك* ولو ان حتى ده رغم انه –عره طبعا- لكنه بـ 12 الف جنيه.. ومع ذلك مش أزمة ان شالله سكوتر.. أي بتاع يرحمني من وقفة السي تي ايه اللى مبيجيش ده!

آخر الافكار اللي جاتلي في التشميسة اللى باخدها اغلب ايام حياتي هي فكرة متفائله زيادة عن اللزوم "ياسلام لو واحد ينسى جمبي مليون جنيه في شنطة ويمشي.. وانا اخد الشنطة بقى.. اجيب عربية اول حاجة طبعا!!
ولما قلت الفكرة دي لاقرب حد ليا.. ركبتني ساعتها الروح الشريرة وقلتله عربية وفيلا وهسيب بيتي اللى عايشة فيه واروح اسكن هناك.. وساعتها مش هعرفك طبعا !!

انتهت كل الافكار في بصة شريرة بصهالي اخينا.. انما لازالت فكرة العربية تراودني احيانا وانا نايمه.. هموت على عربية ياعالم.. هموت من البهدلة بجد!

------------------------------------------------------------

* التوك توك لمن لا يعرف هو عبارة عن موتوسكل وبيركبله من ورا صندوق فيه كنبتين عشان الناس تركب قدام بعض .. والسواق بيسحبهم من ع الموتوسكل والنفر بجنيه

ستين ألف طظ!!

يا طير يا عالي في السما طظ فيك
متفتكرش ربنا مصطفيك
برضك بتاكل دود وللطين تعود
تمص فيه يا حلو ويمص فيك
وعجبي

ستين ألف طظ ياللى في بالي
غطرسة على إيه ونبي؟ محسسني انكو ماسكين العالم بايدكو
أقدم لكم يا سادة اغرب جريدة في حياتي شفتها.. اسمها المدير.. وفيها 140 مدير قسم تحرير.. كلهم مديرين خلو بالكو.. وفوقهم المدير الكبير.. حتى الساعي فهو مدير الكافيتريا
ولما كان فيه حد واحد ملوش منصب مسكوه مدير قسم العلاقات العامة بالجريدة.

وبين المديرين مشاكل لان ميصحش حد يكلم المدير كدة ولان مدير اللي بيكلم مدير فميصحش برضه أنت كمان تكلمني كدة.. وكده ولا كدة كله مسك في خناق كله
أما سيادة المستهلك.. فميزعلش فهو كمان مدير.. أي حد ياخد فكرة أو يشتري الجرنان فهو مدير قسم المستهلكين
السؤال بقى
هما فين المحررين؟؟

متشوفش وحش

"بقالى كتير مشوفتكشي.. بقالي كتير مسلمتش ياروحي عليك"

انا فعلا بقالي كتير مسلمتش.. ولا شوفتكش.. طب موحشتكش؟؟
طب عامة انت واحشني قوي..
قلمي وورقتي.. وحشتني الكتابة.. وحشتني الليالي اللى بيحصلي فيها هستريا تخليني اقعد اكتب وانا مش عارفة بكتب ايه.. والصبح الاقي الناس بتقولى ياسلام تحفة اللى كتبتيه.. والله وحده اعلم التحفة ده اتكتب ازاي.
وحشني ردود الناس اياها بتاعة انتي بتقولي ايه يابنتي .. والاقي الجماهير الشماليل –جمع شملول- وهي بتدافع عني وتشرح لاخواننا البعدا انا كان قصدي ايه.. مع ان قصدي برضه ربنا وحده اللى يعلم.. ولاني مقدرش احرج الناس اللى ردت والناس اللى دافعت فبسيبهم يولعو فى بعض واتفرج انا في بيتنا وانا بشرب الشاي بلبن.. بلا وجع دماغ!!

عارف يا قلمي مين كمان واحشني؟؟
آه.. هو..
بس المشكلة اني مهما اشوفه ولا اقعد معاه برضه واحشني.. اقعد معاه ساعات وساعات واروح الاقيه واحشني.. مش عارفة ليه حسه انه واحشني الى مالانهاية .. واحشني للابد.. ايه سبب ده؟؟ معرفش
مع ان عمري ما كنت كدة.. ولا عمري حسيت كدة!!

مين كمان واحشني..
وحشوني كل اللى سافروا من اول اللى سافروا سفر ابدي لحد اللى سافروا في القارة اللى جمبنا..
وحشتني لمتنا واحنا صحاب.. واحنا قاعدين في بي فلاي ونسمة عمالة تلعب بالتلج جوا الكباية.. ورضوى عماله تلزق فيا وتضحك معايا.. ومحمد بيحدفني بالمخدة عشان انشن عليه واجيب هدف..
وحشتني الدوشة والزيطة!
وحشتني قعدة السلم ع الكلية واحنا بناكل بيتزا حورس.. او فطيرة من عند صفاء!
وحشتني اول مرة رحنا فيها رحلة اسكندرية.. وكان موجود فيها وقاعد ورا بس كان نايم يا حرام ومكانش حاسس ان عيني كانت عليه!

وحشتني كل ذكرياتي الحلوة.. وكلها وحشتني مرة واحدة..
معلش صدعتك يا فندم.. بس تعرف؟ انت كمان هتوحشني وعامة.. متشوفش وحش!!