الاثنين، ديسمبر 04، 2006

باب النجار.. الله اعلم بحاله


مي كامل

سمعت منذ أشهر عن عودة مجموعة من المبرمجين المصريين من أحد الدول الغربية بعد أن قاموا بتحديث قاعدة البيانات والمعلومات هناك، وعادوا بعد أن قبضوا راتبهم أو المبلغ المساوي لما بذلوه من جهد.. وعجبت لشيئين.. أولهما أن مبرمجي مصر مطلوبين في الخارج.. فالظاهر والله أعلم مصر بتطلع مبرمجين عشرة على عشرة "اللهم لاحسد" لدرجة أن يتم طلبهم في الخارج مع أن الكمبيوتر والبرمجة اختراع غربي مائة بالمائة.
الأمر الثاني هو أننا نسافر ونسفّر لتحديث قاعدة البيانات لبلاد أخرى.. طب ما جحا أولى بلحم طوره!!.. مانحدث قاعدة بياناتنا الأول بعدين نبص بره!

قاعدة البيانات بالأساس هي شبكة تحتوي على معلومات يتم برمجتها بشكل منظم جدا.. ففي البلدان المتقدمة تعتمد على تفصيل البيانات والمعلومات تفصيلا سهلا يجعل المعلومات فى متناول اي شخص بالاضافة الى سهولة استخدامها.. فمثلا إذا أراد تاجر ما أن يفتح سوبر ماركت في الشارع الفلاني فبالوصول لقاعدة البيانات من الإنترنت يستطيع معرفة كم سوبر ماركت في الشارع.. وبالتالي يمكنه معرفة انسب مكان لعمله.. وهذا مثال واحد من سلسلة فوائد لقاعدة البيانات!.. طبعا عندنا اصلا هنحتاج نعلم التاجر اساسا يعني ايه كلمة سوبر ماركت ويعني إيه كلمة كمبيوتر!

ويظل السؤال هل نملك بالأساس قاعدة بيانات؟؟ ياترى قاعدة البيانات المصرية دي فين -ده لو موجودة-؟ لو حد يعرف قاعدة البيانات المصرية الواحد يلاقيها فين ياريت يبعتلنا ويقولنا.. واللي يعرف مين ماسك رئيس او مدير -او ايا كانت تسميته- قاعدة البيانات دي يقولنا برضه.. ياريت كمان لو نعرف موقعها.. مش الالكتروني؛ انا مش متفاءله كدة انا بس بقول مكان المكاتب ع الاقل.. ولو ان قاعدة بيانات من غير موقع الكتروني تبقى مش قاعدة!

السؤال الاهم ان لو مفيش قاعدة بيانات مصرية.. طب منين ممكن نبدأ نعملها.. بلاش.. طب ع الأقل نعرف نبعت لوزارة ايه عشان نطلب قاعدة بيانات مصرية؟!

نظرا لموجة الغضب الاخيرة على اننا ماسكين في تفاهات وسايبين اهم مشاكلنا زي البطالة والتلوث .. الى اخر مواضيع التعبير اللى بناخدها في المدرسة؛ فقاعدة البيانات احنا محتاجينها انهاردة قبل بكرة.. وامبارح قبل انهاردة!

اعتقد ان اول ميزة ستكون لقاعدة البيانات في مصر هي استيعاب عدد لا بأس به من خريجي كليات حاسبات ومعلومات.. او استيعاب عدد من المبرمجين المصريين اللى بقو سواقين تاكسي او حاجزين مكان دائم ع القهوة.. لان وجود تلك القاعدة سيحتاج لتحديث متواصل لمعلوماتها!

الحقيقة احنا بنصدر حاجات كتير غريبة وبنستورد حاجات اغرب.. كهربا وصدرناها وبطاطس واستوردناها وحتى البصل اللى احنا اصلا بنزرعه بقينا بنستورده.. احنا صدرنا واستوردنا كل حاجة تقريبا.. الا ان التميز المصري يتجلى في تصدير العمالة!
مصر صدرت طلبة.. تقدر دلوقتي تقف وبكل الاطه وفشخرة تقول احنا صدرنا عمالة لبلاد بره.. وده الجديد بجد!

لما قريت خبر سفر المبرمجين المصريين حسيت ان مصر نجار وبتصلح ابواب البلاد التانية.. بس المشكلة ان باب النجار الله اعلم بحاله! لا عارفين اذا كان خربان ولا مخلع ولا سليم ولا ايه وضعه بالظبط.. ده بفرض ان فيه باب!

هناك 12 تعليقًا:

واحد مستني الهجرة و هايطفشششششششششششششش يقول...

لما النجار يكون جشعه مغطيه هايصلح ببان الناس التانيه قبل ما يبص علي بابه هو، اصل ده اللي هايجيب فلوس وهسا بابه هو ، لو المصريين لقوا الخير في بلدهم مكانوش من الاصل خرجوا، اللي احنا فالحين فيه نجيب "خبير اجنبي" :) مع ان في مصريين كتير ممكن يعملوااللي هو بيعمله و من غير ما يقبضوا بالعملة الصعبه بس اهه "علي نفسها جنت براقش" و بالمناسبه دي انا باقترح من هذا المنبر الحر ان تقوم الهيئة المصرية للأستعلامات بعمال لجنة لبحث توريد و تركيب و صيانة عدد واحد خبير أجنبي لبحث الجخطوط العامه الوهجب اتباعها للبدء في إنشاء قاعدة بيانات مصر علي هن يتم الإنتهاء من هذا المشروع يوم ٥ اكتوبر و يسالم كاملن عاملن ليقوم ......... و لفيف من السادة ال......... بإفتتاحه في ذكري إنتصارات أكتوبر من نفس العام وفقنا الله و ايكم و السلام

Hassan يقول...

موضوع هايل كالعادة ،أحكيلك قصة ، في سياسة واقتصاد رجع اتنين من الشباب اللي كانوا بيعملوا دراسات عليا في أمريكا عشان يستلموا تعينهم في هيئة التدريس ، عارفة طلبوا منه إيه في الإجراءات ؟؟ شهادة تثبت انهم بيعرفوا يستخدموا كومبيوتر !! سألوا هما يجيبوها ليه وهما عاملوا دكتوراه في أمريكا وفي سنة 2002 يعني أكيد بيعرفوا كومبيوتر واستخدام بالعقل ؟؟ قالولهم لاااازم !! نجييبها منين ؟؟ روحوا مركز نظم المعلومات اللي في كلية تجارة !! هناك لاقوا ست بتحشي كوسة ( فعلا ) مدياهم قطعة يكتبوها على الوورد !!! النتيجة ؟؟ واحد قال البلد دي مش بتاعتي ورجع أمريكا ، والتاني بيدور يحصله
انتهت الحدوتة

mai يقول...

اول مرة اتضايق او احبط من موضوع انا كاتباه.. على عيني وراسي كل المآسي دي
بس للاخ اللى هيطفش يابني دي بلدنا بجد ولله مش كلام انشا بس لو مش احنا اللى هننضفها مين يعني؟؟

حسن.. مأساتك قوية جدا.. مش عارفة اقولك ايه
........

مصـ( الخير )ـعب يقول...

بما إني محسوب على المبرمجين أحب أدلق بجردلي في هذا الموضوع

أحب أقول شوية نقط :

1) مع إن زي ما انتي بتقولي البرمجة اختراع غربي بشكل بشع إلا أنها تتميز بحاجتين مهمين جدا مالهومش أدنى علاقة بمنشأها الأولى إنها تعتمد على الذكاء، و التانية إنها مش محتاجة رأس مال كبير، بمعنى إنها صناعة مربحة جدا جدا للي يفهم

2) المبرمجين المصريين هم أذكى المبرمجين على الإطلاق في العالم، حتى الهند اللي هي أكبر مصدر للبرمجيات لما بيجيبوا مطور حلول يا بيبقى مصري يا أمريكي..

3) قاعدة البيانات في مصر موجودة ولله الحمد بس معمولة
visual basic
و
access
أيوة أكسيس اللي في المايكروسوفت أوفيس .. هو الحقير ده! والكلام ده تلاقيه في بوااااااااااابة الحكومة الالكترونية اللي أؤكد لك إنها ما تحتاجش أكتر من 20 دقيقة بالتمام و الكمال لاختراقها!!

4)النقط اللي فاتت كلها متعلقة بالذكاء والعقلية، بالنوسبة للنشأة (اللي كله بيتحجج بيها) مع ظهور حركة زي حركة أو مجتمع المصادر المفتوحة
open source
أصبح مفيش حاجة اسمها "منشأ" البرنامج ده في أنهي دولة لأن ناس من كل أنحاء العالم بكل الثقافات والأديان والأجناس و الألوان والأعمار وكل حاجة بيعملوا نفس البرنامج سوا!

5) احنا نروح نولع فينا أحسن

mai يقول...

مصعب .. مش هقول انك منورني تاني
بس ردك ولله كله فوايد
انا بجد متشكرة لردك.. مفيش احسن من انك تسمع من واحد محترف

اشكرك بشدة

أحمــــــــدبــــــــــلال يقول...

هى دى مصر

أه يا بلد

أحمد المصري يقول...

الاستاذة مي
يبدوا انني امام احد تلك المدونات المتميزة بعيدا عن الاجواء المشحونة بالنقد للنقد فقط في المدونات المعروفة
اول مرة أأتي الى هنا فعلا على الرغم من اني اتجول كثيرا .
عموما
بالنسبة للموضوع التي كتبتي عنه فلا ادري ان كنتي عشتي في الخارج من قبل ام لا و لكن صدقيني لو عشتي حتى في بلاد الواء الواء فستصلي الى قناعتين
اولها انك تحبين مصر فعلا لا لشيء الا لانها مصر
ثانيها انك لت تستطيعي ان تعيشي في مصر بعد الان و لا تعرفي كيف كنتي تعيشي من قبل
قناعتين متناقضتين تماما و لكن اسألي فيها من عاش بعيد عن مصر سنتين على الاقل .
مهما كانت الاوضاع سيئة في البلد التي تعيشين فيها فأنت على الاقل تجدين انك لا تحملين هم اساسيات الحياه بل و مضاف عليها بعض الرفاهية القليلة ايضا
تحسين انك بدون مشاكل او ضغوط نفسية تضغط على كاهلك المثقل اصلا بسبب اشياء كثيرة
لذلك من الظلم و الاجحاف ان نقول ان عدم الاهتمام بالبحث العلمي في مصر هو ما يدفع الباحثين للهرب خارجا و التلكيك لاول فرصة للرجوع مرة اخرى ان جائوا
انها المنظومة الاجتماعية بالكامل ان كنتي تفهمين ما اقصد التي تحتاج الى اعادة نظر .
و عندما ارى العمالة المصرية كيف يتم النظر اليها في الخارج اشعر باشياء كثيرة
اشعر بالفخر لانهم يعتبرونهم من المهرة فعلا و زوى العقول المتميزة سواء كان عامل محارة او استاذ جامعي
و اشعر بالحنق الشديد و الغيظ منهم عندما ارى منهم و الكثير يهدر تلك الثقة و يتصرف تصرفات من شأنها تلويث سمعة المصريين جميعا.
المهم هو اننا لا نعاني ابدا من الانفجار السكاني الذي من شانه تأخير تقدم اي شعب
بل اننا نعاني من الانفجار في العمال المهرة و بدل من ان نستعملهم في الداخل نبعث بهم الى الخارج حتى اصبح لدي المصري قناعه ان العامل الماهر ان لم يسافر الى الخارج فقد دفن نفسه.
تخيلي اصبح العمل في مصر دفن
و الله هذا مصطلح سمعته بنفسي من احدهم
الموضوع طويل و سوف اكتب عنه تدوينة طويلة بعد الاعداد لها ان شاء الله
شكرا

mai يقول...

احمد انا مش هقول انشا ولا ان المصري بيثبت نفسه في كل الظروف والكلام ده
بس انا مؤمنة جدا ان المصري ازكى م الامريكي ع الاقل.. انا مسافرتش بره ولا خرجت بره مصر ولا عايزة اخرج
انا سمعت م اللى سافروا .. المصري زكي جدا بس معندوش الامكانيات اللى تطور زكاءه من ساعة ما يتولد الطفل وهو زكي يتفرج على كام حلقة لبرامج الاطفال وخلاص
الزكاء يروح من عينيه ويبدا يطق غباوة

احنا مش عندنا الامكانيات الكويسة.. انما اللى بره عندهم الامكانيات مع انهم متوسطين.. عشان كدة بيبانو متميزين

مستنيه موضوعك على مدونتك

elkamhawi يقول...

الحاجة الوحيدة اللى بسطانى دلوقتى انى عرفت اعلق بعد محاولة دامت لمدة 24 ساعة وبجد نسيت كنت عايز اقول اية

mai يقول...

kamhawi..
اعتذر لك عن المشقة في وضع تعليق ولو اني لا اعرف ما السبب.. ولكن ربما يكون العطل من البلوجز نفسها بس عموما منور ولما تفتكر تعالى تاني ولو مفتكرتش تعالى وانا افكرك
هههههههههههههههههههههههههههه

مصري يقول...

مش معنى ان البرمجه علم انشاء في الدول الغربية ان المصريين مينفعش يبرمجوا، الغرب تقدم بسبب الحضارة الاسلامية، والحضارة الاسلامية تطورت بفضل الحضارة الاغريقيه، والحضاره الاغريقيه تطورت على اسس الحضاره المصرية القديمه، وهتفضل الموجه تلف على الناس حتى النهاية، وده مش لتوفر العقول المبدعة في الحضارات المختلفة، ولكن بتوافر نظام إداره جيد، مصر فيها عقول مبدعة كتير، وليها عقول مهاجرة أكتر بتفيد أعدائنا ومبتفدناش، وده سببه قانون الطوارئ والاستأثار بالسلطة (اللي بتحكم مش السلطة اللي بتتاكل)، فاذا اراد المبرمجون انشاء قاعدة بيانات مهما كانت موهبتهم لن يستطيعوا ببساطة لان الدولة لم تطلب انشاء قاعدة بيانات، لان المسؤليين مشغولين بالسرقة والاستجمام بشرم الشيخ وتوفير عرش امن لابنائهم...

قلم جاف يقول...

هوة من امتى فيه تقدير للمعلومة ولقيمتها ولدورها في اتخاذ أهيف قرارات حياتنا؟

درست شوية عن فكرة قواعد البيانات ، بولة كبيرة زي بولة الأيس كريم الجامبو بتجمع فيها كل المعلومات وتنظمها وتصنفها تحسباً للحاجة إليها .. يعني معلومات وآلية ..

فين المعلومات؟

أنا علشان أتعلم برمجة بألف على المعلومة بمنكاش .. الكتب قليلة ومعظمها فاحش السعر ، الدورات الحقيقية شبه منعدمة ، وتشعر ببشاعة الكلام دة لما تكون بعيد عن العاصمة المدللة..

حصول الصحفي على معلومة لتحقيقه أصعب من خلع ضرس العقل بصوابع طفل يبلغ من العمر سنة!

علاقة وسائل الإعلام المصرية بالمعلومات معروفة .. مش عايزين نغلط..

وبتفكري في داتابيس للمجتمع المصري ..قلبك أبيض بشكل!

مصعب الخير : ما تزعلش من البقين اللي جايين دول :

إحنا آه عندنا ناس كويسين ، وفي كل مجال فيه ناس كويسين ، وفي كل دولة ناس كويسين ،الذكاء ما بيرتبطش بدولة ولا بجنس ولا بعرق ..

ودي فرصة بقى لينا نبطل "سخاع" ونفوق بقى من دور "أعلى مستوى" اللي احنا عايشين فيه ..

إحنا لا عندنا أحسن مبرمجين في العالم ولا يحزنون ، وكويس قوي إن مستوانا كدة في وقت فيه تعليم التقنية بالمستوى المزري اللي احنا عايشينه..

للمرة الثانية .. حاول ، بل ولنحاول ما نعملش زي الحكومة اللي بننتقدها ، واللي بتضحك على دقوننا كل شوية بعبارة إن كل حاجة في مصر على أعلى مستوى..

وأنا مش مع حكاية إني أتحيز للمجموعة اللي أنا منتميلها للدرجة دي .. أنا شخصياً راجل تجاري وشايف إن المحاسب المصري - نتيجة للطريقة الـ(......) اللي درس بيها محاسبة - أحد أسباب كراهية الخليجيين للشعب المصري ، وليهم حق!