الاثنين، يناير 25، 2010

لا تليفزيون لا



بناءا على الأحداث التالية، توصلت للمقولة الحالية: "مبقاش فيه حد بيقول، الكل بقى بيهيء"

افتح التليفزيون قلب فيه شوية هتلاقي شوية برامج كتير عن الأغاني والمغنيين أو بمعنى أدق المؤديين، وكل واحد بيتكلم عن كليباته الداعمة للحرية والمناضلة للنمطية والتقليدية، والمناصرة لكل مباديء الثورة الفرنسية الحب والحق والخير.. وتشوف المذيع بيتكلم بجدية كأنه بيتناقش في قضية سياسية من العيار التقيل.. ييجي في الفاصل بقى الكليب عشان تتفرج على اي هبل في أي جبل، ويا خسارة الربع ساعة اللي استحملت فيها الحوار ده

قلب شوية كمان.. هتلاقي يمكن برنامج من برامج المساء، بتاعة أحداث وأخبار البلد واللي مش ممكن تلاقي فيها خبر يفرح، عيلة بتولع، واحدة ماتت، قرية غرقانه، غرامة جديدة هتفرضها الدولة.. اهي لازم خبر نكدي والسلام

المهم.. بعد استعراض الاخبار يمكن تلاقي حد محترم المحاور بيرغي معاه، بس المشكلة ان عشان تسمع كلام مفيد فانت ممكن تسمعلك ساعة كلام مفيد، ساعة الا ربع كلام مفيد، انما 3 ساعات كلام مفيد؟؟ مستحيل يعني.. كدة كتير.. كدة صداع.

الليلة كانت ضيفة الحلقة المبجلة للبرنامج المحترم 90 دقيقة المطربة الصاعدة والنجمة الأسطورية نيكول سابا.. وبكل فخر كان بيسألها المحترم برضه جدا "معتز الدمرداش" عن لو انها في كليباتها وبأغانيها بتحرض المرأة ضد الرجل.. فطبعا الست هانم ردت انها مبتحرضش ولا حاجة ده واقع و.... (شوية رغي عن قضية المرأة اللي اقل من الرجل فبتدافع عن نفسها وانها نص الرغيف)

واخيرا بيسالها لو انتي مرتبطة او متزوجة هتقبلي جوزك يقولك اقبلي الدور ده وبلاش الدور ده.. الرد بقى المفحم: "أنا عمري ما عملت اصلا عمل غير مشرف ولا لائق وبالتالي مش هيلاقي حاجة اساسا يقولي عليها لا أو آه.. ده إذا كنت مرتبطة يعني"

ابقي قابليني يا ماما، اما نشوف مين اللي هياخدك.

قلب شوية أكتر..

هتلاقي برامج كتير برضه مبتقولش.. مهو مينفعش يبقى عندك قناة مفتوحة 24 ساعة كلها هتقول، لازملك كام ساعة تهيء فيهم.. وفيه كمان حاجة كدة اسمها Fillers دي ترجمتها الحرفية (الحشو) اللي بتملى وقت للقناة، ومعظم القنوات الحالية عايشة على الفيلرز، اديني ياعم اي كلام في 10 دقايق او 5 دقايق احشرهم بين اي برنامج او فيلم واخوه.

بلاش تقلب وتدخل في مفرمة المسلسلات اللي بقت ليها قنوات اكتر من قنوات الافلام.. على ايه؟ معرفش.. قال يعني بننتج مسلسلات جامدة.. بلا ستين نيلة، المسلسلات التركية لا تقل شيئا عن ملل وبطء المسلسلات المصرية.. واهو كله بيتنح في ربع ساعة وبيتكلم في نص ساعة وبينهم فواصل اعلانية خلصت الحلقة.

مش عارفة الصراحة التليفزيون المفروض يبقى ازاي.. انا فعلا مش عارفة الحل ايه بس الوضع الحالي انا بقيت حسه ان التليفزيون بقى رغي متواصل بلا توقف.. فعلا بقى بيجيبلي صداع.

هناك 9 تعليقات:

أحمد شريف يقول...

السلام عليكم
في هذه أقول لك .. صدق قلمك

Hassan يقول...

هههههههه
معاكي حق بجد...عموما الخط الفاصل بين الجد والهزل والمفيد وغير المفيد أصبح نفسه محل نقاش!!! مشغ قناة دينية أو إخبارية يبقى أكيد كلام محترم !! مع إن في حاجات كتير مش محترمة في دول كمان!!!
كمان الناس بقت تبص على الكلام ده على إنه الأساس وغيره هو الفرع!!! والنظام بيدعم ده جدا!!!! زي مابيدعم أي أفيون جديد يخدر الشعب الأهطل عن البلوه اللي هوا فيها

مي كامل يقول...

D:
مش عارفة اقولك ايه يا حسن، بس دمت لنا متمما ومدعما
D:

فارس الجبالى يقول...

السلام عليكم

يبدو أن هذه المدونة ستعجبنى

برغم تضايقى من استخدامك للانجليزية كثيرا ولا لعيب فيك أو فيها ولكن لعيب فىّ
يعجبنى كثيرا العرض الذى تقدمينة لموضوعك ممتع وسلس

بالمناسبة من أكثر الأفلام التى أحبها لديكابيريو الشاطئ رغم إنه خذلك ولكن أروع ما مثل على الإطلاق كان روميو وجوليت ولو كنت شاهدتيه هلا تنقذينى وتخبرينى ما اسم الممثلة التى قامت بدور جوليت ـ لأنها أجمل من رأيت على الشاشة ـ
أطلت ولست هكذا دائما
ورخمت وأنا خفيف
تحيتى

مي كامل يقول...

Claire Danes
كلير دانس
:))) منورني يا فارس
اشكر مرورك الكريم

Jack يقول...

شكرا علي هذه المعلومات

واتمني ان تتابعيني في مدونتي

http://mymobilephonear.blogspot.com/

شكرا

فارس الجبالى يقول...

السلام عليكم

ما هذا الإيجاز

ظننت فلا أننى ( رخم )
شكرا لك

عرفة فاروق عبد الله يقول...

السلام عليكم

ريحى بالك ومتتفرجيش على التلفزيون

اللى بتحبيه هاتيه من على النت

بالمناسبة


المدونة جميلة قوى

مي كامل يقول...

اشكر مرورك الكريم يا عرفة
D:
انا فعلا بقيت بعمل كدة
D: