حريق هائل بمجلس الشوري ادى الى احتراق بعض اجزاء من مبنى مجلس الشعب ودخل ايضا على بعض اجزاء من مبنى الضرائب واستمر الحريق من 3 عصرا للواحدة صباحا تاني يوم، الا ان قوات المطافي الخارقة المصرية كانت طول الوقت ده مسيطرة على الحريق بنسبة 98 %
صحيح.. ماهي المشكلة كلها كانت في الـ 2% اللى مسيطروش عليها، وهي دي بقى الـ 2% دي هما اللى حرقوا مبنى الضرايب ومجلس الشعب وهما اللى موتوا راجل المطافي وهما اللى سوأو صورة مصر بين الامم
مع اي حريقة او مصيبة في مصر تظهر التفسيرات الشعبية التي تحلل وتفسر بعمق طبعا اسباب الحادث، من قبل حتى ما الحكومة او الجرايد تعلن ايه الاسباب الحقيقية، مهو اصل هيا هياها يعني لو الاهرام طلعت وقالت ان سبب الحريق كذا يعني احنا هنصدق؟؟ فشر.. هتفضل تفسيرات كل مواطن هي السبب الخفي الصحيح وتفسيرات الجريدة هي الاسباب المعلنة.
المهم .. خلال نص ساعة من بداية ظهور الحريق ع التليفزيون تقدر تسمع اسباب الحريق الخفية
- ماس كهربائي أو مختل ابن مجنونة اللى ولع في المبنى (كالعادة يعني ايه الجديد) بس الجديد اننا ندمج بين السببين عشان يبقى تفسير قوي يعني السبب اكيد يا ماس مختل، يا بن مجنونة كهربائي
- قالك الحكومة كانت عايزة تنقل مبنى مجلش الشوري في 6 اكتوبر ولا مصر الجديدة وعشان المبنى تراث وبتاع ومحدش هيقبل بده فجابت عاليها واطيها عشان يتساوى بالاسفلت فتقول شفتوا؟؟ انقلوه بقى عشان نحميه
- بص يابني الحريق ده مفيش قوة في مصر تقدر تعمله بالدرجة دي الا حاجة واحدة بس (فار السبتيه)!!!!!!
- الاكيد انه عقب سيجارة اترمى من الجنايني بعنف حبتين على سطح المبنى وكان فوق شوية ورق من اللى نسيه واحد من اعضاء مجلس الشورى فالعقب لبس في الورق ع الحر واشعة الشمس عملوا قفلة وحريقة.
- جاري البحث عن أي عامل أو فراش أو بواب أو اي حد خولت له نفسه انه يحشش فوق سطح مبنى مجلس الشورى، دي ولعة شيشة واتنست
- وجاري البحث برضه عن العامل اياه والفراش اياه وكل جذمة خولت له نفسه انه يعمله كوباية شاي برضه فوق سطح المبنى على وابور جاز كان السبب في الحريق ده
- قالك فيه احتمال لان اعمال الصيانة اللى كانت بتتعمل في المبنى تكون السبب في الحريق، وده يرجعنا لاحتمال رقم 2 اللى بيقول ان عمال الصيانة بقى خدوا الامر من الحكومة عشان يتلككو وهما بيصونوا المبنى ويوقعوه عن عمد ويقولوا sorry
المهم الحريق سيطرنا عليه من اول ما اتعمل لحد ما اتحرق، ومجاتش على 2 % يعني متحبيكوهاش بقى، وادينا اتعلمنا من اخطائنا والمرة الجاية هنسيطر ع الحريق كله، وهنحاول نجيب عربيات المطافي على الفور بجد المرادي مش على الفور كدة وكدة، ورحمة الله على راجل المطافي اللي مات، قالك كان عليه تار من البلد اصلا والراجل اللي عايز يقتله استناه جوا المبنى اول ما شافه قتله، انما الحريق نفسه ولا عمله اي حاجة.
ليست هناك تعليقات:
إرسال تعليق