الأربعاء، أكتوبر 24، 2012

لساها الهبلة




لسه الهبلة بتحاول ترضي كل اللي حواليها
لسه فاتحة قلبها وصدرها للدنيا وعايز تلم الكل في حضنها
لسه الخلايا العاطفية مخلصتش.. لساها بتدور في تفاصيل الناس وبتتعلق بيهم
الهبلة متعرفش ان مش كل الناس بقو بيهتموا..
الهبلة متعرفش ان مش كل الناس اصلا بيهتموا..
لسه الهبلة بتسرح في ايام زمان وذكريات زمان وبتفتكر ناس رسموا البسمة على وشها ولسه فاكرالهم مواقف ياما
على اثر المواقف والايام دي.. لسه الهبلة بتقول انهم صحابها، 
رغم ان اخر مرة كلمتهم أو عرفت عنهم حاجة كانت من شهور!!

لسه الهبلة بتحاول ترضي كل اللي حواليها
وجحا وابنه معرفوش يعملوا ده، بكل الطرق فشلوا..
يعني هي الهبلة هتقدر؟!

الهبلة مش عايزة تكبر.. ولا بتفكر هتنجح يا ترى ولا هتقدر..
هي هبلة.. مش بمزاجها، بس هي قررت تبقى على طبيعتها رغم هبلها ورغم ادراكها للهبل ده

الهبلة عندها أمل يوم ما تموت الناس تفتكر إنها كانت بتفكر فيهم
يمكن حد منهم يرضى.. وتبقي قدرت ترضي حد من اللي حواليها

ليست هناك تعليقات: