Love, Work, Damn good shape

mmmm the same Damn Equation

Love or work? work or love.. re-arange your priority just to be in the good shape that we used to see you in

تقريبا انا كنت بكره المقدمات الطويلة، وكنت بكره كمان اني احط كام جملة انجليش وسط كلام عربي، بس الظاهر ان فيه حاجات لا مفر منها ، اولها التغيير فالطبيعي ان حاجات كنت بتكرهها مسيرك تحبها بالوقت والعكس صحيح، وثانيا المقدمات اللى لازم تعلل سبب انك فتحت بقك اصلا عشان تتكلم وتصدعنا بشوية كلام

وتالتها التهييس والهذي ومدى جدوى ذلك اصلا

a lot like love

الفيلم بيحكي عن اوليفر وايميلي، اتنين بتربطهم علاقة مدتها 6 سنوات اختلف العلماء في تصنيفها ومحدش عارف هما ايه؟ اتنين بيحبوا بعض ولا مجرد صحاب ولا اتنين اتحشروا سوا في علاقة مش مفهوملها معنى.. الله اعلم

بعد 6 سنوات يتخللها اختفاء وظهور مستمر، وتتضح العلاقة في شكلها بانها اقرب الى الحب او القدر الجامع بينهم اكتر من اي حاجة تانية.

بدأت علاقتهم باستفزاز ايميلي لاوليفر لما قالها انه بعد 6 سنين هيبقى غني جدا وعنده شغل وزوجة وعايش احلى عيشة، مع العلم انه في اواخر العشرينات ولسه عايش مع اهله، وطبعا العيشة مع الاهل لاواخر العشرينات شيء عار عار عار وعره في امريكا والمجتمعات الغربية.

خلال ست سنوات اوليفر بيفتح شركته الخاصة، وبيعمل فلوس كتير، وبيعيش في منزل رائع، وبيرتبط كمان بواحدة كويسة، بس قبل ما الست سنوات بتخلص بيفقد شغله وبيفلس وبينفصل عن البنت اللي عرفها وبيرجع تاني يعيش في بيت اهله.

عادي.. ايه يعني؟؟ مطب في حياته وعادي بيحصل في احسن العائلات، ومع تطور احداث الفيلم الرومانسية المعتادة بتوصل ايميلي في اخر لحظة ويرتبط اوليفر بايميلي ويعيشوا في حياة سعيدة :)

Love

Your Love Life won't wait for you to stand on your feet.. that's your own life not a prova to see how will you live it (from a lot like love movie)

الحب في حد ذاته مش هدف، مش هدفي في الحياة اني اعيش عشان احب، او اني جبت جول لما وقعت اخيرا في الحب، مؤمنة جدا بان الحب وسيلة، وسيلة من وسائل المساعدة للبقاء على قيد الحياة في ظل تلك الحياة، المشكلة تبقى مشكلة طول ما الاتنين بيدوروا على الهدف المشترك اللى عايزين يوجهوا حبهم ليه، وتتحل المشكلة لو اتفقوا على الهدف وصوبوا السهم وفووووووووووووووووو

Work

it may come, it may go.. nothing for granted.. you just do your best.

حاليا الشغل بقى اشبه بالمقامرة اكتر منه وظيفة واستقرار، واللي يبص للوظيفة على انها وسيلة من وسائل الاستقرار يبقى هياخد اكبر اسفين في نافوخه لما يسيب الوظيفة او الوظيفة تسيبه.. مفيش ضمانات.. انت عايش ع المحك وف لحظة ممكن تسيب كل ده.. ومتسمحش لحد انه يلوي دراعك بامثال خايبه زي عصفور في اليد خير من عشرة ع الشجرة والعته ده

اللي يخوفك م الوظيفة بخ في وشه بـ "وفي السماء رزقكم وماتوعدون" صدق الله العظيم

يبقى هتخاف من ايه اصلا؟؟ وحريص على ايه من الاساس.. اعمل اللي عليك وبس.. تستمر الوظيفة تغور الوظيفة.. تولع الوظيفة بناسها.. طظظظظظظظظظ

The Damn Good Shape

زمان كنت بخرج من بيتنا اكني طالعة ع المسرح، كل حركة محسوبة عليا.. كل خطوة جزء من العرض اللي كل الناس بتتفرج عليه، ومع مرور السنين الستارة وقعت والنور اتطفى واكتشفت ان مفيش جمهور اصلا في الصالة، وبالتالي العرض توقف، فعد الى الكواليس وعيش حياتك كما يحلو لك

منظري عامل ازاي، والقلق المستمر على الشكل والمنظر وهيقولو عليا ايه.. ساعات بتبقى فكرة مسيطرة على الواحد ميقدرش يتخلص منها ابدا ويرجع تاني للمسرح ويقدم العرض الوهمي بتاعه، وساعات تانية الفكرة دي بتتبخر وبيبقى ابو ام الجمهور اصلا وطظ

طريقة قد تجدي نفعا للتخلص من تلك الفكرة: حاول ارتداء نضارة شمس ضخمة وقت طويل، هتتعود على التصرف بحرية بدون ملاحظة ردود افعال الاخرين.

------------------------------------------------------------

إليه فقط: هتتهمني بإني لسه تحت تأثير فكرة "منظري عامل ازاي" ، بس صدقني انا بدأت اتخلص منها

Enchanted

With a fairytale like this i can't help it.. This fairytale princess is about to meet a real Prince Charming.. and for all the usual fairytales that we have known, it's a new real great theme.

if you go too deep in realism, you'll need badly that movie to wake your secret world up

اقرا الحريقة

حريق هائل بمجلس الشوري ادى الى احتراق بعض اجزاء من مبنى مجلس الشعب ودخل ايضا على بعض اجزاء من مبنى الضرائب واستمر الحريق من 3 عصرا للواحدة صباحا تاني يوم، الا ان قوات المطافي الخارقة المصرية كانت طول الوقت ده مسيطرة على الحريق بنسبة 98 %
صحيح.. ماهي المشكلة كلها كانت في الـ 2% اللى مسيطروش عليها، وهي دي بقى الـ 2% دي هما اللى حرقوا مبنى الضرايب ومجلس الشعب وهما اللى موتوا راجل المطافي وهما اللى سوأو صورة مصر بين الامم

مع اي حريقة او مصيبة في مصر تظهر التفسيرات الشعبية التي تحلل وتفسر بعمق طبعا اسباب الحادث، من قبل حتى ما الحكومة او الجرايد تعلن ايه الاسباب الحقيقية، مهو اصل هيا هياها يعني لو الاهرام طلعت وقالت ان سبب الحريق كذا يعني احنا هنصدق؟؟ فشر.. هتفضل تفسيرات كل مواطن هي السبب الخفي الصحيح وتفسيرات الجريدة هي الاسباب المعلنة.

المهم .. خلال نص ساعة من بداية ظهور الحريق ع التليفزيون تقدر تسمع اسباب الحريق الخفية

- ماس كهربائي أو مختل ابن مجنونة اللى ولع في المبنى (كالعادة يعني ايه الجديد) بس الجديد اننا ندمج بين السببين عشان يبقى تفسير قوي يعني السبب اكيد يا ماس مختل، يا بن مجنونة كهربائي
- قالك الحكومة كانت عايزة تنقل مبنى مجلش الشوري في 6 اكتوبر ولا مصر الجديدة وعشان المبنى تراث وبتاع ومحدش هيقبل بده فجابت عاليها واطيها عشان يتساوى بالاسفلت فتقول شفتوا؟؟ انقلوه بقى عشان نحميه
- بص يابني الحريق ده مفيش قوة في مصر تقدر تعمله بالدرجة دي الا حاجة واحدة بس (فار السبتيه)!!!!!!
- الاكيد انه عقب سيجارة اترمى من الجنايني بعنف حبتين على سطح المبنى وكان فوق شوية ورق من اللى نسيه واحد من اعضاء مجلس الشورى فالعقب لبس في الورق ع الحر واشعة الشمس عملوا قفلة وحريقة.
- جاري البحث عن أي عامل أو فراش أو بواب أو اي حد خولت له نفسه انه يحشش فوق سطح مبنى مجلس الشورى، دي ولعة شيشة واتنست
- وجاري البحث برضه عن العامل اياه والفراش اياه وكل جذمة خولت له نفسه انه يعمله كوباية شاي برضه فوق سطح المبنى على وابور جاز كان السبب في الحريق ده
- قالك فيه احتمال لان اعمال الصيانة اللى كانت بتتعمل في المبنى تكون السبب في الحريق، وده يرجعنا لاحتمال رقم 2 اللى بيقول ان عمال الصيانة بقى خدوا الامر من الحكومة عشان يتلككو وهما بيصونوا المبنى ويوقعوه عن عمد ويقولوا sorry

المهم الحريق سيطرنا عليه من اول ما اتعمل لحد ما اتحرق، ومجاتش على 2 % يعني متحبيكوهاش بقى، وادينا اتعلمنا من اخطائنا والمرة الجاية هنسيطر ع الحريق كله، وهنحاول نجيب عربيات المطافي على الفور بجد المرادي مش على الفور كدة وكدة، ورحمة الله على راجل المطافي اللي مات، قالك كان عليه تار من البلد اصلا والراجل اللي عايز يقتله استناه جوا المبنى اول ما شافه قتله، انما الحريق نفسه ولا عمله اي حاجة.

إعجاب حار

وسط زحام الحياة وسعي الناس كالوحوش وراء المال.. لابد وان تعجب بأحد هؤلاء

ولابد ان اعترف اني



أعجب بمن رفض الخضوع للمادة ليعبدها وحدها دون أي شيء

أعجب بمن رفض تقديم فروض الطاعة والولاء للنجاح، ليرفض عبودية النجاح أصلا

أعجب بمن رفض مبدأ "لوي الدراع" ، وتحياتي وسلامي وقناديل دموعي لمن قطع ذراعه من جذوره

أعجب بمن رفض الاستسلام لقهر متجبر لم يملك مفتاح حياته بالاساس، ولكل من اعلن مبدأ "البيج طظ" في وش كل واحد يستاهله

أعجب بمن طبق مبدأ العفو عند المقدرة

وأعجب بمن يستطيع فعل الأذى ولم يفعله

وأعجب بذوي الكبرياء الحليم

وأعجب بمن يقلب الصفحة سريعا ويرفض البكاء على الأطلال "ابو ام الاطلال يا جدع"

أعجب بمن يضحك وسط فترة حالكة من حياته



إليكم جميعا خالص إعجابي واحترامي ومساندتي أيضا، فلم يقل أي منهم عن كونه مناضلا في حرب المادة ضد الانسانية



التوقيع: معجبة بشدة جدا خالص



----------------------------------------



ملحوظة: قد يرى البعض أن الكلام يحمل سفسطة أو معاني تقليديه جدا.. بس جديا الناس دي بقت قليلة قوي

la science des reves

Hi, and welcome back to another episode of "Télévision Educative". Tonight, I'll show you how dreams are prepared.

People think it's a very simple and easy process but it's a bit more complicated than that.

As you can see, a very delicate combination of complex ingredients is the key. First, we put in some random thoughts. And then, we add a little bit of reminiscences of the day... mixed with some memories from the past.

That's for two people. Love, friendships, relationships... and all those "ships", together with songs you heard during the day, things you saw, and also, uh... personal... Okay, I think it's one.

That is the first 3 minutes from "La Science des Reves" movie

:)

الضحك قال ياسم ع التكشير

أمشير وطوبة وأنا ربيعي بشير

مطرح ما بأظهر بانتصر ع العدم

انشالله أكون رسمايه بالطباشير

وعجبي

محستش في مرة اني عايزة اقول حاجة وخذلني جاهين

دايما كنت بلاقي رباعية تقولي المضمون في الصميم كدة

اكنها اكلاشيهات بتيجي على بالي وقت العوزة

بس من فترة بدأت اسمع بعضا من الراي من الشاب أمادو

بدأ يوردلي شوية بضاعة كدة بالتدريج بكميات قليلة عشان المباحث بس متاخدش بالها، وشوية بشوية بدأ يشرحلي الكلمات اللى كانت هيروغليفي بالنسبالي

وبسببه تعرفت على رائعة خالد "انسى الهم ينساك"

الاغنية قد تكون كلماتها بديهية للناس، أو ان فيه الف اغنية تانية قالتلك انك لو ابتسمت الحياة هتبقى بمبى مسخسخ ، بس انا اول مرة اعمل ده بجد

اول مرة بجد اقرر وسط العتمة والغم والمصايب والكوارث اني هنفض للنكد واني مش قادرة اتنكد اكتر من كدة واني هبتسم واضحك غصب عن عين المشاكل اللى بتحصل

الظريف .. ان تقريبا الهم نسيني فعلا، الظاهر حد راح قاله اني نسيته ولا حاجة

فجأة برحمة من ربنا الحياة هديت، والبساطة رجعت ترفرف من حواليا تاني، والمشاكل خمدت ولله الحمد.



دي تاني مرة أوصل لمرحلة طويلة من الخنقة تخليني مش قادرة اعيش في نكد اكتر من كدة، أول مرة كانت في اولى كلية لما مدخلتش صحافة وكنت فى الويتينج ليستD:

وادي المرة التانية.. بس المرادي معرفش ليه ليها طعم مختلف

يمكن عشان المشاكل كانت هتدمر أهم مجالات حياتي.. ولله اعلم



ماعلينا.. تحياتي للشاب أمادو، والشاب خالد، وجاهين رحمة الله عليه:)

------------------------------

ع الهامش: اللى مسمعش اغنية انسى الهم لخالد، يجرب يسمعها كفاية كمية البهجة غير الطبيعية اللى موجودة في الموسيقى بتاعتها :)

The Dark Knight

Sequel
بعد 8 سنوات من انتاج سلسلة باتمان والتي تضمنت 4 أجزاء، جاء فيلم batman begins في 2005 معلنا عودة السلسلة من جديد بشكل مختلف، والجزء الجديد بالفعل مختلف عن الاجزاء الأخرى التي سبقته رغم ان أحداثه مرتبطه إلى حد ما بفيلم batman begins.. هل لاحظت انه أول فيلم لباتمان يحمل عنوان خالي من اسم Batman؟

دعاية
شركة "وارنربروس" المنتجه للفيلم استخدمت كم من الدعاية المكثفة لتضمن عدم توقف الحديث عن الفيلم منذ الاعلان عن البدء فيه وحتى الآن، وجاءت وفاة الممثل هيث ليدجر لتزيد من الدعاية المكثفة للفيلم الذي يشهد الظهور السينمائي الأخير لـ"ليدجر" خاصة وأن شخصية الجوكر التي جسدها في الفيلم شخصية محورية تعتمد عليها أغلب أحداث الفيلم.

www.Whysoserious.com
هي جملة الجوكر الشهيرة وأحد شعارات الفيلم والموجودة على عدد من البوسترات، وهي أيضا عنوان موقع http://whysoserious.com والذي بدأ في مارس 2007 ليضمن تواصل شخصية "الجوكر" مع كافة معجبيه. الموقع نجح بالفعل في ضم كثير من المعجبين ليصبح واحد من أهم المواقع التي يمكنك التعرف من خلالها على رحلة الجوكر منذ أن قدمها جاك نيكلسون وحتى وفاة هيث ليدجر داخل وخارج أحداث سلسلة باتمان.

Posters
عدد لانهائي من البوسترات تم انتاجها منذ ديسمبر الماضي وحتى الآن، البوسترات ذات العدد المهول لم تتصدرها سوى شخصيتي باتمان والجوكر بالطبع فيمكنك التأكد من هذه اللحظة أنك ستصطدم كثيرا بإعلانات الفيلم أينما كنت.

Soundtrack
منذ عام تحديدا أكّد كل من "جيمس نيوتن هوارد" و"هانز زايمر" أحد أشهر المؤلفين الموسيقيين في العالم أنهما سيعملان معا مرة أخرى في فيلم The dark knight مثلما عملا معا في فيلم Batman begins من قبل، وبالفعل يمكنك شراء الألبوم من خلال مواقع الإنترنت منذ 1 يوليو القادم قبل نزول الفيلم في دور العرض.

خدعة نولان
فيلم بهذه الضخامة كيف يمكنك تصويره في أكثر من دولة دون تدخل وسائل الإعلام وتسرب المعلومات؟ الأمر سهل، فوسائل الإعلام ستتجاهلك أصلا إذا علمت أنك تصور فيلم بعنوان "قبلة روري الأولى" وليس فيلم لباتمان، خاصة إذا كانت الأفيشات والسيارات التي تنقل كافة المعدات والممثلين تحمل عنوان "قبلة روري الأولى"، اضف إلى هذا موقع إلكتروني بنفس عنوان الفيلم المزيف يحمل معلومات مزيفة عن الفيلم.. قد تكون الفكرة خادعة ولكنها مقنعة خاصة إذا كان صاحبها هو كريستوفر نولان مخرج الفيلم.

افتتاح
العرض الأول للفيلم سيبدأ من دولة ايسلندا يوم 16 يوليو القادم، ثم ينتقل إلى الولايات المتحدة الأمريكية في 18 من الشهر نفسه، وفي مصر ستبدأ دور العرض باستقبال الفيلم منذ 23 يوليو ، هل لاحظت تزامن عرض الفيلم مع عيد ثورة يوليو في مصر؟

ميزانية $$$$$$
150 مليون دولار تقريبا، ويبقى الوقت كفيلا بالرد عما اذا كان الفيلم سيحقق ارباحا تفوق تكاليفه أم لا.. هل تحب المراهنة؟

كريستوفر نولان
من غيره يمكن أن يقدم الجزء الثاني لفيلم Batman Begins والذي أخرجه في 2005 ليضاف الفيلم إلى قائمة أفلامه والتي لم تزد عن 7 أفلام، إلا إنه استطاع من خلال تلك القائمة القصيرة أن يترشح لجائزة الأوسكار، ويكفي ذكر فيلم The prestige أو Memento لتدرك أي نوع من المخرجين هو.

الجوكر
بعد أداء الممثل جاك نيكلسون لشخصية الجوكر في سلسلة أفلام باتمان الماضية كان من الصعب إعادة تقديم الشخصية مرة أخرى بنفس الدقة، خاصة وأن أول ماسيتبادر لأذهان الجمهور هو عقد مقارنه سريعة بين الاثنين، ربما هذا ما جعل هيث ليدجر يحبس نفسه في غرفة باحد الفنادق لمدة شهر بالكامل ليتقمص شخصية الجوكر بالكامل حتى في طبيعة صوته، وينتهي ليدجر من تصوير مشاهده في الفيلم لتأتي مأساته الحقيقية بعدما توفي في 22 يناير الماضي لتزيد حادثة وفاته من فضول الجمهور نحو الفيلم وتلغي فكرة المقارنه بين شخصيتي الجوكر القديمة والحديثة، فالتعاطف مع "ليدجر" سيصبح سيد الموقف!

حاجات بقيت بشتاقلها

الطبيعي ان الحاجات دي يبقى اي حد عنده وقت يعملها.. بس مش عارفة ليه مؤخرا بقت الحاجات دي مش من حقي
بقت حاجات بشتاقلها، نفسي فيها قوي جدا خالص

نفسي اعدي الـ 100 وأصوت باعلى حسي بدون ما احتاج ادوس فرامل
نفسي اقعد على يوتوبيا اخلصها للاخر في ظرف يومين بالكتير في الساحل، واخلص بعدها هامبورغ
نفسي اقعد قعدة حلوة مع صحابي واضحك من قلبي زي زمان لحد ما ضهري يوجعني
نفسي احس من تاني اني الفار الرصاصي الصغير اليتيم بتاع توم وجيري، واللى بيخلق بهجة من اول ما يظهر ع الشاشة
نفسي احس ولو للحظة اني خلصت الشغل اللى عليا
ونفسي احلم بوسام تاني
نفسي العب سكيت ولو مرة كمان
ونفسي أنام وانا مبرتبش اولويات تاني يوم
نفسي اتفرج على فيلم يعملي موود مشابه لفيلم Amelie أو Eternal sunshine of the spotless mind أو ع الأقل يخلقلي حالة فيلم The prestige.
نفسي اكلم نسمة واميرة ورضوى وسحر وانا مش مستعجلة، ولا قرفانه من حاجة.
نفسي أقابله واخرج معاه واضحك معاه اوى ونتبسط اوى.
نفسي احس ان ربنا راضي عني وعنا......

أنا نفسي غمت عليا ع الآخر..

كفاية كدة النهاردة، م الاخر كان ممكن اختصر كل الكلام ده واقول "أنا وحشاني" ، أمانة اللي يشوفني يبقى يسلملي عليا
----------------------------------------
بقالى كتير مبتواجدش هنا، شكرا للي سألوا عني وشكرا للي مسألوش عادي يعني D: ، ع العموم انا كويسة الموضوع كله وقت وسارقني، ربنا يستر

وصايا العرافة المحكمة

لم تفصح لي عن اسمها، فبحكم معارفها الانسية والجنيه اشفقت عليّ من أن اعلم ماهيتها الحقيقية، ولاني لم اؤمن ابدا بتلك التخاريف آثرت الصمت وتركت سر اسمها الحقيقي دون كثرة استفسار، وبعد كثير من الخزعبلات والتصرفات التي توحي كثيرا بالجنون فضلا عن التواصل مع الجن بدأت الحديث.. بعد طول انتظار يكاد يصل الى حد الملل.

"
هناك جن ما يوسوس لبعض من الأنس ليسلطوا عليك كي يضمنوا تحقيق ما أقوله لك، فلا تبدي عدم الاكتراث كثيرا

ليس مكتوبا عليك الابتسام والفرح، ستدفعين ثمن كل ابتسامة تخرج من ثغرك، ولا تتحدي الاقدار كثيرا فلست مؤهلة لتلك النوعية من الحياة.

لن تتمكني من ارتداء القناع طويلا.. فسرعان ما سوف يتساقط وحده.. بشرتك ليست جافه بشكل كاف لتعدك ببقاء القناع طويلا (وكأن المشكلة مشكلة بشرة.. أليس هناك كريما ما لعلاج تلك النوعية من البشرة؟!!)

هي ليست الحادثة الاولى في حياتك، فالحياة مليئة بالحوادث وكما تمت الحوادث الأولى في صمت ولم تفصحي عنها، ستموتين في واحدة اخرى في صمت وهدوء تام"

وفي هدوء تام.. قررت الانسحاب.. اذ بدأت كلامها بالموت والغم والحزن، فما سوف يأتي بعده سيكون أكثر غما.. حسنا، شكرا، وتحياتي للجن والانس وكل من يضمن او لا يضمن هذا الكلام.

انطلقت وكلمات اغنية عبد الحليم حافظ تتردد في اذني
فطريقك يا ولدي
مسدود
مسدود
مسدود

دوري مصارعة المرشحين

مرشح للرئاسة وتريد الفوز.. هل هناك افضل من الكوميديا لجمع اصوات الناخبين؟


رغم ظهور مرشحي الحزب الديمقراطي باراك اوباما وهيلاري كلينتون في كافة البرامج الحوارية الأمريكية تقريبا، إلا أن عدد محدود من البرامج استطاعا أن يظهرا فيها جانبهم الكوميدي، لتتحول معركة الرئاسة الامريكية الى دوري كوميدي.

الجولة الأولى:
في أكتوبر الماضي استضافت "إلين ديجينريس" أوباما في برنامجها الحواري "Ellen" والذي ما أن ظهر اوباما على المسرح حتى فاجأ الحاضرين برقصه على ايقاع اغنية دخوله، وشاركته إلين الرقص لتبدأ موجه من الضحك الهيستيري في الحضور، ولقبته إلين بـ"أفضل راقص في مرشحي الرئاسة حتى الآن" أثناء إلقاءها إحدى الدعابات.

الجولة الثانية:
في نوفمبر الماضي ظهرت هيلاري في برنامج Saturday Night Live الامريكي والذي يعرض على شبكة NBC حيث شاركت في فقرة خصصها البرنامج للحديث عن المرشحين السياسيين، وقامت بتقديم فقرة مع ممثلة تقدم شخصيتها، لتظهر هيلاري وشبيهتها معا وتبدأ هيلاري في إلقاء بعض الدعابات معها.

الجولة الثالثة:
في مارس الماضي في نفس البرنامج "Saturday Night Live" شارك أوباما في نفس الفقرة الخاصة بالمرشحين السياسيين، حيث قدم البرنامج مشهد لحفل عيد القديسين ظهرت فيه أحدى الممثلات وكأنها هيلاري كلينتون مرتديه زيا تنكريا كإحدى الساحرات، وفي المشهد تذهب هيلاري لتفتح الباب ليظهر شخص يرتدي قناع "باراك اوباما" وعندما يرفعه الممثل يكون بالفعل المرشح الديمقراطي اوباما والذي استغل ذلك المشهد ليوضح انه ليس لديه سوى وجه واحد واذا ماتنكر فسوف يرتدي قناعا يشبه وجهه ايضا دليلا على شفافيته ومصداقيته.

الجولة الرابعة:
في إبريل الماضي استضاف "جاي لينو" هيلاري في برنامجه "Tonight show" حيث فاجأ "لينو" الحاضرين بموسيقى فيلم "روكي" الشهيرة لتصاحب هيلاري في دخولها بسبب وصفها لمعركة الانتخابات بأنها تشبه مباريات المصارعة التي شاهدها الملايين في سلسلة أفلام روكي، وتلى ذلك عدد من الدعابات التي أطلقتها هيلاري خاصة حين سخرت من تعرضها لمحاولة إغتيال من أحد القناصين في البوسنة وقت أن كان بيل كلينتون رئيسا للولايات المتحدة الأمريكية.

نتيجة المباراة:
أوباما 1

هيلاري 0

فرغم ظهور كلا المرشحين في أغلب البرامج وحرص كليهما على إظهار الجانب المرح فيهما إلا أن وسائل الإعلام الأمريكية لاتزال تصف هيلاري بالمرأة حادة الطباع، الأمر الذي جعلها تكثر من ظهورها في البرامج الحوارية ربما تحاول تغيير صورة الشخصية الحادة التي وصلت لوسائل الإعلام، أما أوباما فوسائل الإعلام -حتى الآن- تصفه بالسياسي المرح.

لايزال الدوري قائما وربما تتغير نتيجة الفريقين في المباريات القادمة والمستمرة منذ الآن وحتى نهاية الانتخابات الرئاسية.

-------------------------------------

أعلنت مؤخرا هيلاري كلينتون عن انسحابها من سباق الانتخابات الرئاسية الامريكية، وقررت ترشيح نفسها لمنصب نائب الرئيس الأمريكي

حلل السياسيون موقف هيلاري بالدهاء السياسي، فالتوقعات عن اغتيال اوباما اذا فاز بالانتخابات الامريكية مرتفعة جدا، هو اول رئيس "باعتبار ماسيكون" امريكي من اصل افريقي، ولن يكن أغلى على الأمة الأمريكية من كنيدي مثلا.

هذي

لعلك لن تفهم شيئا.. وانا كمان
واحد حياته المهنيه كويسة.. الشغل تمام وحياته العملية تمام بس مش راضي
تعبان.. ناقصه الحبيبة.. وييجي يشتكي غياب الحبيبة
وواحد بيحب.. بيموت حبا.. بيتنفس عشق.. ومع ذلك بيشتكي
تعبان.. ناقصة الشغل.. مخنوق م الشغل ومش راضي ع الشغل
كل واحد فيهم مستني الحاجة اللى ناقصاه ومتصور انه لما هيكمل اخر قطعة في بازل حياته هيعيش الحياة الكاملة
هيعيش حياة سنووايت والامير بعد ما تغلبوا على الساحرة الشريرة

امتى هنعيش مرتاحين؟؟ امتى هما هيعيشوا مرتاحين؟؟
مين قالك ان بعد ما الاميرة والامير اتجوزوا محصلش عندهم مشاكل؟؟
مين قال ان اخر قطعة فى البازل هتكمل حياتك؟؟
مين قالك اصلا انها اخر قطعة فى البازل؟؟

عايز رأيي؟؟ فكك م البازل.. واستمتع بيها حتى وهي ناقصة.. خاف اوى وحرص اوى واحتضن اوى كل القطع اللى عندك عشان متفقدهاش وانت بتركب القطعة الاخيرة
حياتك ناقصة اه.. تعبان وجزء ناقص اه.. بس حاسب لكله يروح

الغريب بقى ان الشريحة التالتة لا عندها الحبيبة ولا الشغل وبيقولو اهو.. بكرة البازل تكمل.. مع ان معندهمش حاجة يخافوا عليها
اما الشريحة الرابعة واللى دايما بتبقى محسودة عندها الحبيبة والشغل.. والأمرّ انه مخنوق من كتر الشغل اللى بيشتغله عشان يكفي الست، ومخنوق من كتر الحب اللى بيديه عشان ميحسسهاش بالنقص، وفى الاخر برضه مخنوق وتعبان وبيشتكي
محدش عاجبه حاله

ايه بقى لازمة كل الكلام اللى انا قلته ده
ولا حاجة.. فكك من المدونة دي كلها على بعض هي كمان

مبارك ممثلا

اكتشفت بالصدفة البحته الكليب ده من فيلم وداع في الفجر
واللقطة طالع فيها حسني مبارك وكان شاب صغير

نقطة فاصلة

جرعة زايدة من مورفين الهروب من الواقع جعلني اشاهد بشكل متتالي الافلام التالية

وبعد انتهاء الجرعة ومفعول المورفين والعودة الى ارض الواقع جاري البحث عن واحدة من النقاط الفاصلة التي تحيل الحياة من حال الى آخر واحاول ان اخرس ذلك الصوت الصارخ في رأسي "محلك سر" دون جدوى.

Daniel Powter - Bad Day

it's a nice clip

ماعاد الحديث يجدي

هي ترفض الحديث.. فلم يعد يستهويها حديث الاحلام الضائعة والخيبات المتكررة ورغم انها تحدث نفسها الف مرة في اليوم الا انها صارت بارعة في التكتم على الامر معلنة بإيماءاتها الصغيرة ان كل شيء على مايرام وتستجدي الاطمئنان على الاحوال ممن حولها وهي مدركة تماما الى انهم جميعا لايعرفون الغيب ولا يملكون طمأنتها ان كل شيء سيكون بخير.

لانها ترفض الحديث.. فلن تفصح عن يأسها المكتوم، ولن تعلن عن هذه الفوضى التي تغلف حياتها الآن وحين يأتي السؤال مباشرا اكثر من اللازم لتسألها عما تطمح –هي- اليه لن تجيبك بانها تبحث عن الاستقرار على كافة المستويات وانها ملت من التشتت بين نواحي الحياة، ستلتزم بملامح جادة هادئة وصمت ملائم او ربما ستلقي دعابة ما بما تسميه "صنعة لطافة" وتضحك انت او تبتسم وستنسى كيف كان الحوار من الاساس.

"وهل للحديث جدوى؟؟ متى غير الحديث الظروف والاحداث؟؟ هو تعليق على الاحداث لا يسمن ولا يغني من جوع.. وتنخدع انت بكل سذاجه بنظريات علم النفس ليقنعوك بان الحديث يريحك مما يكبس على انفاسك.. لو كان الحديث يريح لتحدثت الى مالانهاية.. استجمع شجاعتك وانه الحديث ولاتطيل الكلام.. اوتعلم شيئا؟؟ قد مل الناس الحديث".

what weather are you ;)

You Are Sunshine

Soothing and calm You are often held up by others as the ideal But too much of you, and they'll get burned You are best known for: your warmth Your dominant state: connecting

What Type of Weather Are You?

Risk

you should have some risks at least to feel that you are alive, otherwise what is the point of being such a human

"Big things happen to those who dream big"

just refuse to be one of those guitars that they have never been played by

No-where

شوفي قد ايه

يا بخت من يقدر يقول

واللي في ضميره يطلعه

يا بخت من يقدر يفضفض بالكلام

وكل واحد يسمعه

يقف في وسط الناس ويصرخ : آه يا ناس

ولا ملام

ييجي الطبيب يحكي له ع اللى بيوجعه

يكشف مكان الجرح ويحط الدوا

ولو انكوى

يقدر ينوح

وانا اللي مليان بالجروح

ما اقدرش اقول

ما اقدرش ابوح

والسهم يسكن صدري ما اقدرش انزعه

شوفي قد ايه ؟

احنا النهاردة إيه فى أيام السنة .

شتا والا صيف ..

وفين انا ..

إيه اللى وصلنى هنا ..

أنا صاحب البيت والا ضيف ..

صوتي انحبس ..

ما اقدرش اقول ..

ما اعرفش حاجة عشان اقول ..

ما اعرفش غيرك انتى بس ..

يا بت يا للى ف حبك العقل اتهوس ..

مكان غريب ..

كأنه سجن كأنه مخدع لحبيب ..

كأنه بير ..

شباك حديد وعليه ستاير من حرير ..

والريح بينفد منه زى المسامير ..

الريح عوى ..

قلبي انقبض ..

قلبي اتلوى ..

الشمس تلج اصفر شعاعها صاروخ هوا ..

الضلمة تلج اسود كتير ..

ألوف ألوف القناطير ..

خبينى فى شعورك يا بت ..

أحسن عروقى اتخشبت ..

شعرك خشن زى الحِرام الصوف يا بت ..

خبينى فيه م الزمهرير ..

ونيمينى فى السرير ..

دخل النبى بردان خديجة لَفته ..

حطت عليه غطيان لحد ما دفته ..

دخل النبى بردان وقال: فين الغطا ..

البسمة غطت شِفته ..

للعبقري صلاح جاهين

من 20 سنة

هييييه.. ولله والواحد كبر وبقى يتحسبله حساب.. لاحساب بجد يعني مش مجازا.. حساب جاري وودايع وكلام كبير كدة
في عامي الواحد وعشرين احب افتكر التطور اللي ظهر عليا بما اني بقيت م الراشدين وكدة.. اكيد مش هقعد احسب الغم والهم اللى حسيت بيه على مدار سنة يغور يعني.. خلينا فى الحاجات الحلوة.. الواحد ايه غير ذكريات وشوية حاجات فوق بعض كدة
اسباب كتير تخليني مبسوطة ان كل الحاجات دي حصلت قبل ما اتم الواحد وعشرين وابقى من الراشدين

اتعلمت سواقة وطلعت الرخصة وبقيت بتخانق مع الخلق بالعربية وجربت نفسي في شوية حوادث على قدي
خلصت كلية واتخرجت وطلعت عيني وعين اللى جابوني فى تطليع الشهادة وطلعت الحمد لله
باعتبار ما سيكون هنهي مرحلة شغل سخيفة كانت فى حياتي.. وربنا يسهل واعرف اخلع منها.
حد مهم في حياتي علمني ان مش كل الفرص بتيجي على مقاس الناس وان مهم الواحد يقدر يقول لا في وش الاغراءات ومفيش حاجة اسمها فرصة متتعوضش.. (اشكرك بجد).
عملت شغل في مجلة جود نيوز سينما افتخر بيه مع اني مكملتش فيها اكتر من 6 شهور حتى الان ، والاكثر فشخرة طبعا الملفين اللى عملتهم واحد بصحبة محمد قرنة والتاني اول ملف اعمله لوحدي وربنا يستر.
هو انجاز عبيط اوى يعني بس هتحس بيه كل واحدة بتعشق الكوتشي.. بس بقيت بعرف امشي بكعب .. واقدر دلوقتي اقف بفخر واقول لعيالي انا يا ولاد عشان امشي بكعب قعدت 20 سنة بتعلم D:
من ساعة ما تميت 20 لحد الـ 21 خسرت ناس زي الفل وكسبت ناس زي الفل وسعيدة جدا باللى خسرتهم وسعيدة اكتر باللى كسبتهم وطايرة م السعادة بقى باللى اثبتولي انهم صحابي بجد ولسه انا وهما صحاب .. واهو الكل كسبان :)

مش قادرة افتكر اكتر من كدة .. بس احب اتمنى قبل ما اتم العام الـ 23 تحصلي شوية حاجات حلوة تانية (ايوة يعني في خلال سنتين من دلوقتي) واهو ربنا يسهل:
ابقى ثابتة في شغل انا راضية عنه وعن ناسه
ابقى سافرت ايطاليا وجيت واحكي عن التجربة دي
ابقى مخطوبة او متجوزة او متطلقة D: واحكي برضه عن التجربة دي ههههههههههههههههههههههههههههه
ابقى رايحة جايه بزكزوكة بتاعتي
اكون عملت حجة او عمرة على الاقل ....
يلا مين عارف بقى.. يامين يعيش :)